Read Medumba Nebwôgte 8 Bible Online

Nebwôgte 8 - Medumba bible

Nebwôgte 8

¹Bin nsi ke tshùbe, ke ze njoṅ nkàn fa mi me tshwèt nkite bin sènni là, ndùlala ndù bin yôge, mbèn ntsho ntùm ngô ze Tshùaben saṅlaṅ bwe nefà tà tsin nà, ndo' a tù' zine.

²Israél, kwimte manze fa ze Tshùaben Nsi o na' ngù o zin bwe num ngu'njù ṅam nkuà kônkwa là. A na' ngù ndùlal'a nelo' ndab o yi mfà nsi bo nelaṅt'o yi, ndèn mba ntù o be yi num i là, mba neyen mbe z'o nsi lé' nkàn mi ke nga lo là.

³A lo lab o mfà nsi, ngù nziku' ya o, a lo' mana nkém o yi, mana z'o ke' lèn tshaṅ i, ndù mba tà tsho lo ke lèn nà. A na' nelo' nda'te wù yi mbe mènntùn ke' ke njôg à nda' num bàn, là nda' num ntshob mi a tum ntshu Tshùaben nà.

⁴Nzwe o lo ke fagte num o, nku mu ke mot num ngu'njù ṅam nkuà.

⁵Lèn ntù o nda' ndù Tshùaben Nsi o ke ntshobt'a a mba ta' mènntùn be ntshobte mén i là.

⁶O nsi ke ze nkàn Tshùaben Nsi o, ke zin num tse manze mba neke mbwôg i.

⁷Nummbe Tshùaben Nsi o a' ghù o tsho ntùm ngô ntùn, ngô ze nta'ntse yàm bwe, ba tumnsi ntse yàm bwe boa diaṅnkat ntse yàm bwe, nke mbèt ntùm ntômbo' boa mbat là;

⁸yen ngô là b'a ngô ngefele, ngô nsa, ze nkùa, ze nten bo ze ntàm tù; a b'a ngô mbatsi bo ngô ṅwa'a;

⁹o nsi jù bàn ntùm yen ngô là yàme, ke bwoṅ sàm ju ntùm yen ngô là; a b'a ngô ze ndoṅ mi a bwe b'a tùn nà, o nsi ke sô tùn meba num mbat tse.

¹⁰O nsi nyàmte Tshùaben Nsi o ndùs'o jù njwèt là, num ngô z'a fà wù là.

¹¹Zete là nelag Tshùaben Nsi o, ke tshùb nkàn mi, ntag mi boa ntshù' mi, mi me kite wù sènni là.

¹²Ndùs'o nsi jù ywèt là, ndùs'o nsi kut mbwô mbwô mba' tswe ntùm bwe,

¹³yen nyàm tsho tse ndùb boa tse nke' ke njàme, silba o bo yu gol ke nkwi'te, tshu tsho ke nsin nesin nà,

¹⁴o zete ndù kà ntù o ka'te, o lag Tshùaben Nsi o z'a na' nsô o Egipto ndà kuan nà;

¹⁵a yi na' ngù o zin num yen mà zi kônkwa z'a bag neshu, dù' ze ba mba nyu bo nenya'tshum be, num ba dù' njam tse ntse ke bwe là; a lo ghù ntse bèt wù num gholoṅ s'a ta neshu là;

¹⁶a yi na' ngù o njù mana kônkwa, mana ze tà tsho ke' lèn tshaṅ i là, ndùlala ndù a lab o mfà nsi, ndaṅt'o, mbèn ntshùa njam bwe ngù mebwô wù.

¹⁷Zete netshob ntù o ndù: Neta àm bo ngù' bu àm bèn mfà men mfu' li me.

¹⁸Kwimte Tshùaben Nsi o, nummb'a yi nsi bèn fà neta wù neghù men mfu' là yi. A b'a mèn nenùn num kàn s'a wat boa tà tsho saṅlaṅ bwe là, a b'a mèn nenùn mb'o tshwèt njen kua' yu tu sènni là.

¹⁹A be z'o lagte Tshùaben Nsi o, nèn mbaṅ tsemo' nsi, a be z'o fa' bo, nte nkekwi' mu mbwe bo là, mba me tshob bin ndaṅndaṅ sènni ndù mba Tshùaben nsi biagte zine.

²⁰Tshùaben nsi biagte zin mba ngôngô ts'a na' mbiagte yub mbwe bin nà, a be ze bin ke' ju' nze Tshùaben Nsi zin nà.