Read Medumba Yohané 1 Bible Online

Yohané 1 - Medumba bible

Yohané 1

¹Neto'te, ntshob lo be, ntshob na' mb'a bo Nsi, ntshob na' mb'a Nsi.

²A lo be fe neto'te bo Nsi.

³A lo nabte njoṅ tshu fa. Sàm ju ke bwe num ts'a be, ndù a lo ke bèn nabt'é là.

⁴Yôg lo be num i, yôg na' mb'a nka' benntùn.

⁵Nka' ké' ntùm njame, njam ke tshùb i.

⁶Mo' mèn lo be bwe ze Nsi tum i là, lén se Yohané.

⁷A lo se' num nu kwénta, ndù a kwé nta num nka', ndù njoṅ benntùn fa tshùa njam i mbame.

⁸Ke b'a ndù tu wul i b'a nka', là ndù a kwé nta num nka'.

⁹A na' mb'a kua' nka' nenùne, z'a num nké' njoṅ benntùn fa bo se' ntùm njù là.

¹⁰A lo be ntùm njù; a lo nabte njù, njù ke lèn i.

¹¹A lo se' la' i, tse ben ke lèn i.

¹²Là njoṅ benntùn fa bo lo' i, mbam lén se là, a lo fà ngù' bo ndù bo tù' bon Nsi,

¹³tse bo ke' bwe yub à lem ke nekô mbàb wut, ke nekô mènntùn lo, là tse Nsi bwe yub là.

¹⁴Ntshob lo tù' mènntùn, nke ntswe netèt be; be yen nkuni mi, nkuni mi a kwé Tà, yi z'a be nkwi Mén ntshù', ndù a dun kondèn mba nenùn nà.

¹⁵Yohané kwé nta num i, nkua' ntshob ndù: Yen mèn ni b'a ze me na' ntshob ndù a tshwèt nse' njam àm nà; a kwé mbwe me. Nummbe a na' mbèn mbwôg be me.

¹⁶Ntùm ze nedune, be lo kwé kondèn num kondèn njoṅ be fa.

¹⁷Nummbe ntshù' lo tshùa njam Mosé nse'e, kondèn mba nenùn njam Yésu Kristô nse'e.

¹⁸Sàm mèn ke' yoṅ nto' yen Nsi; a b'a nkwi Mén Nsi ntshù' z'a be num ndàntù Tà là, a b'a yi bèn nto't'é.

¹⁹Yen *gi*ni b'a kwénta Yohané: Ngelaṅ ba Yuda tum ghale'te Nsi mba ba Lévi tse bo be Yérusalém, mbaṅ i ndù bo bètt'é ndù: O b'a we là,

²⁰a tshob nunenùne, ke gha, ntshob nunenùn ndù: Me ke' b'a Kristô.

²¹Bo bètt'é ndù: K'o b'a we? O b'a Elia ké? A tshob ndù: Me ke b'a yi. O b'a ngatshob ntshob Nsi ké? A bùnte ndù: Nga.

²²Ndùlala bo tshob yi ndù: O b'a we bag tsho mfà bùn ntshob ben tse bo tum yag l'à? Ke z'o tshob mfà num tu wul o à?

²³A tshob ndù: Me b'a nze mèn z'a tshwèt nkua' num kônkwa là, bin late manze Tshùaben mba Esaya ngatshob ntshob Nsi na' ntshob là, ngù a tsine.

²⁴Ben tse bo tum yub là na' mb'a benntùn netèt ba Férésia.

²⁵Bo bèn mbètt'é, ntshob yi ndù: Kà numk'o nke nyu' benntùn ntse, a be z'o ke' b'a Kristô, ke be Elia, ke be ngatshob ntshob Nsi lo l'à?

²⁶Yohané bùnte bo ntshob ndù: Mba me là, me ke nyu' benntùn à ntùm ntse, là netèt bin, mo' mèn tsin bwe, ze bin ke' lèn i là.

²⁷A tshwèt nse' njam àm, me ke' ku'ni tshàm neké'te nkù nketo' mi.

²⁸Yen nu là tôg Bètania mo' yoṅ Yordan, dù' ze Yohané ke nyu' benntùn ntse là.

²⁹Njù be làne, Yohané yen Yésu, a nke nse' mbaṅ i, a tshob ndù: Tshù mén njùmbwe Nsi z'a ket nukebwô njù là.

³⁰A b'a yi ze me na' ntshob num i ndù: Mo' mèn tshwèt nse' njam àm z'a kwé mbwe me là.

³¹Nummbe a na' mbèn mbwôg be me. Mba tu wul àm lo ke lèn i, là me na' nse' nke nyu' benntùn à ntùm ntse ndù bo tswit'é Israél.

³²Yohané kwé nta ntshob ndù: Me lo yen Ywèt Nsi swe' mba bwoṅsaṅ nà mfe kamànyam nse' ntswe num i.

³³Mba tu wul àm, me lo ke lèn i, là mèn z'a tum àm ndù me se' nyu' benntùn ntùm ntse là, yen mèn nà lo tshob me ndù: Mèn z'o nsi yen Ywèt Nsi swe'e, nswe' ntswe num i là, a b'a yi z'a nyu' benntùn Ywèt Nelàn nà.

³⁴Mba tu wul àm lo yene, me lo kwé nta ndù yen mèn ni b'a Mén Nsi.

³⁵Njù be làne, Yohané bèn ntsin bwe, mba ghazi'te nu i bàa;

³⁶a be yen Yésu z'a ke ntshùa là, nte miag mi num i, ntshob ndù: Tshù Mén njùmbwe Nsi là.

³⁷Tshen ghazi'te nu i bàa là ju' mb'a tshob là, ntam njam Yésu.

³⁸Là Yésu kaṅ wul i njam, mbe yen mba bo tshwèt ntam njam i là, ntshob bo ndù: Ke ze bin tshwèt ndiag à? Bo tshob yi ndù: Rabbi (yen nà bagt'a ndù ngatswite), o ke ntswe à yà?

³⁹A tshob bo ndù: Bin se' njene. Ndùlala bo nèn, njen dù' z'a ke ntswe bwe là. Bo à bo tswe num sen lé'njù là. A na' mb'a nguan nyam kuà mfetnjù.

⁴⁰Andréa mfèt Simon Pétro na' mb'a mo' mèn netèt tshen ben bàa li tse bo na' nju' ntshob Yohané, ntam njam Yésu là.

⁴¹A bwôgmbwe mfon mfèl i Simon, ntshob yi ndù: Bag fon Mésia, (yen nà bagt'a ndù Kristô).

⁴²A lo' i nèn yi mbwe Yésu. Yésu lôt'é ntshob ndù: O b'a Simon mén Yohané, bo nsi ke tsiaṅ o ndù Kéfa, (yen nà bagt'a ndù Pétro).

⁴³Njù be làne, Yésu kô nenèn Galiléa, mfon Filibo, ntshob yi ndù: Tam njam me.

⁴⁴Filibo na' mb'a ze Bètania, ngô Andréa mba Pétro.

⁴⁵Filibo fon Natanaél, ntshob yi ndù: Bag fon mèn ze Mosé kite nu num i ntùm ntshù', ghatshob ntshob Nsi bèn ntshob là, Yésu mén Yosèf, Yésu ze Nazarèt.

⁴⁶Natanaél tshob yi ndù: Be ju mebwô tum Nazarèt ké? Filibo tshob yi ndù: Se' njene.

⁴⁷Yésu be yen Natanaél mb'a tshwèt nse' yi là, ntshob num i ndù: Tshù kua' mén Israél ze nenùn ze nkùnkù ke' be ntùm ntù i là.

⁴⁸Natanaél tshob yi ndù: O lèn àm à yà? Yésu bùnte ntshob yi ndù: Filibo lo mbe tsiaṅ o ndù m'a yen o ngelaṅ o lo ntswe nsi tun mbatsi là.

⁴⁹Natanaél bùnte yi ndù: Rabbi, o b'a Mén Nsi. O b'a mfen ba Israél.

⁵⁰Yésu bùnte ntshob yi ndù: O bam à nummbe me tshob wù ndù me lo njen o ngelaṅ o lo ntswe nsi tun mbatsi là. O nsi yen tshu ndùbndùb ts'a tshùa tshen nà là.

⁵¹A tshob yi ndù: Kua' nenùne, kua' nenùne, me tshob bin ndù: Bin nsi yen kamànyam gha' ntenge mba ba Angél Nsi tse bo tshwèt nko'o, mbèn nke nswe' num Mèn mèn nà.