Read Medumba Yohané 14 Bible Online

Yohané 14 - Medumba bible

Yohané 14

¹Kà ntù tsin mvètte, bin bam Nsi, mbèn mbam mba me.

²Dù'ntswe num ntùm ndà Tàa yàme; a lo mbe ndù a ke' be, mba me lo tshob bin, nummbe me tshwèt nèn nenabte dù' bin.

³Ngelaṅ ze me nsi nène, kà nabte dù' là, me nsi bèn se' lo' zine, ndù dù' ze me be bwe là, mba bin be zin bwe.

⁴Dù' ze me tshwèt nèn nà bin lèn manze.

⁵Tomas tshob yi ndù: Tshùaben, bag ke' lèn dù' z'o tshwèt nèn nà, bag nsi lèn manz'a ndùke?

⁶Yésu tshob yi ndù: Tu wul àm me b'a manze mba nenùne, mba yôg. Sàm mèn ke' be kum mbaṅ Tà ke be ndù a tshùa num àm.

⁷A lo mbe ndù bin lèn àm, mba bin lèn mba Tàa, fe ndonni bin lèn i, bin à yen i.

⁸Filibo tshob yi ndù: Tshùaben, la'te Tà bag, yen nà ku' num bag.

⁹Yésu tshob yi ndù: Me tswe bag à bin ngelaṅ yàme, o ke' lèn àm ké Filibo? Mèn z'a yen àm nà yen Tà. O tshob ndù la'te Tà bag à ndùke?

¹⁰O ke' bam ndù me num Tà, Tà be num àm ké? Ntshob mi me tshwèt ntshob bin nà, me ke ke ntshob à num yàm tu; là Tà z'a be ntswe num àm nà bèn nke mfa' mfa' mi.

¹¹Bin bam me ndù me num num Tà, Tà be num àm; ntag ndùlala, bin bam nda' num mfa'!

¹²Kua' nenùne, kua' nenùne, me tshob bin ndù: Mèn z'a bam àm nà nsi fa' mfa' mi me tshwèt mfa' là; a nsi fa' mfa' ndùb ntshùa men ni, nummbe me tshwèt nèn tèt Tà.

¹³Mba ke lo ze bin nsi bètt'a num lén sàm nà, me nsi ghù yen nà, ndùlala ndù nkuni Nsi tswite wul i num Mén.

¹⁴A be ze bin bètte ju num lén sàm nà, mba me nsi ghù.

¹⁵A be ze bin kô àm nà, mba bin nsi lé' ntshù' màm,

¹⁶mba tu wul àm me nsi le'te Tàa; a nsi fà mo' ngafitentù bin, ndùlala ndù a be bin à bo yoṅ ntshù'.

¹⁷Ywèt nenùn ze njù ke' ku'ni nekwé là, nummbe a num ntswe bin à bo, mbe ndù a nsi be bin à bo.

¹⁸Me ke nsi faṅ zin mba bontse là, me nsi se' bin.

¹⁹Num mo' ngelaṅ njù ke bèn neyen àm; là bin, bin nke njen àm, nummbe me tshwèt njôge, mba bin zin nsi yôge.

²⁰Num sen lé'njù là, bin nsi lèn ndù me b'a num Tàa, bin be num àm, me be num bin.

²¹Mèn z'a ghù ntshù' màm mbèn nke ndé' là, yen ni b'a mèn me nsi kô i, bèn tswite wul àm yi.

²²Yuda, ke b'a ze Iskariot, tshob yi ndù: Tshùaben, ke z'a ghù o kô netswite wul o bag ke b'a njù à?

²³Yésu bùnte ntshob yi ndù: A be ze mèn kô àm nà, mb'a nsi lé' ntshob màm, mba Tàa nsi kô i, mba bag nsi se' yi, mba bag nsi ghù dù' ntswe mbaṅ i.

²⁴Mèn z'a ke' kô àm nà ke' lé' ntshob màm. Ntshob mi bin tshwèt nju' là ke' b'a màm, là mi Tà z'a tum àm nà.

²⁵Me lo tshob tshen tshu li bin ngelaṅ me tswe mbaṅ bin nà.

²⁶Là ngafitentù, Ywèt Nelàn tse Tà nsi tum num lén sàm nà, yen nà nsi tswite zin njoṅ tshu fa, bèn nkwimte njoṅ tshu fa tse me tshob bin nà bin.

²⁷Me faṅ fite bin, me fà yàm fite bin, ke fà bin à mba njù num mfà là. Kà ntù tsin vètte, ke bèn mbwôge.

²⁸Bin lo ju' mba me tshob bin ndù: Me tshwèt nène, bèn se' bin nà. A be ze bin kô àm nà, mba bin nsi tsiaṅte mba me tshwèt nèn tèt Tà là, nummbe Tà b'a mèn ndùb ntshùa àm.

²⁹Me tshob bin ndonni kà yen nu là se'e, ndùlala ndù ngelaṅ z'a nsi se' là, bin bam.

³⁰Me ke nsi bèn tshobte bag à bin yàme; nummbe mfen yen njù li tshwèt nse'e, a ke' ghù sàm ju num àm.

³¹A bwô ndù njù lèn ndù me num nkô Tà, mbèn nke ngù à be ndaṅndaṅ mba Tà na' ntshob me là; bin lo tù bag bin tum nsen ni.