Read Medumba Yohané 17 Bible Online

Yohané 17 - Medumba bible

Yohané 17

¹Yésu tshob ndùlala mbù' miag mi mfe kamànyam, ntshob ndù: Tà, ngelaṅ ku'u, kuni Mén o, ndùlala ndù Mén o kuni o.

²Mb'o na' mfà ngù' yi num njoṅ benntùn fa, ndùlala ndù njoṅ i fa ts'o fà yi là, a fà yôg matmat bo là.

³Là yen ni b'a yôg matmat ndù bo lèn o, wù z'o be nda' ta' Nsi ntshù' ze nenùn nà, mba mèn z'o tum i là, Yésu Kristô.

⁴Me lo kuni o num nsitsha' mba m'a miagte fa' s'o na' mfà me ndù me fa' là.

⁵Ndonni, wù Tà, kuni àm mbaṅ tu wul o lèn nkuni mi me ghù mbaṅ o, kà njù njôg mbe là.

⁶M'a la'te lén so benntùn ts'o na' mfà yub me ntùm njù là. Bo na' mb'a ben tsho, o lo fà yub me, bo lé' ntshob mu.

⁷Ndonni bo lèn ndù njoṅ tshu fa ts'o na' mfà me là fe à wù.

⁸Nummbe me lo fà ntshob mi o fà me là bo. Bo kwé ndèn kua' nenùn ndù me fe à mbaṅ o, mbam ndù a b'a wù bèn ntum àm.

⁹Me ke nde't'a num bo, me ke ke nde't'a num njù, là num ben ts'o na' mfà me là, nummbe bo b'a ben tsho.

¹⁰Njoṅ tshu tshàm fa b'a tsho; njoṅ tshu tsho fa b'a tshàm, nkuni màm à tswite wul i num bo.

¹¹Me ke' bèn mb'a ntùm njù, là bo b'a ntùm njù; mba me là me tshwèt nse' tèl o. Tà ze nelàn, lé' ben ts'o na' mfà yub me là ntùm lén su, ndùlala ndù bo be ntshù' ndaṅndaṅ mba be là.

¹²Ngelaṅ me be bag à bo là, me lo lé' ben ts'o na' mfà yub me là ntùm lén su. Me lo zi tshùalo num bo, sàm mèn netèt bo ke' bi, mb'a nda' mèn nebi, ndùlala ndù ṅwa'ni Nsi bumte.

¹³Là ndonni me tshwèt nse' tèl o, me ke ntshob tshen tshu li à ntùm njù, ndù bo ghù yàm tsiaṅte a dun num bo.

¹⁴Me lo fà ntshob mu bo, njù mbàn yube, nummbe bo ke' b'a ba ntùm njù, mba tu wul àm, me ke' b'a ze ntùm njù là.

¹⁵Me ke ke nde't'a ndù o sô yub ntùm njù, là ndù o lé' yub num nukebwô.

¹⁶Bo ke' b'a ba ntùm njù, mba mba tu wul àm me ke' b'a ze ntùm njù là.

¹⁷Lànte yub ntùm nenùne; ntshob mu b'a nenùne.

¹⁸Mb'o tum àm ntùm njù là, tu wul àm, me tum yub yàm ntùm njù.

¹⁹Me lànte tu wul àm à num bo, ndùlala ndù mba bo yub be nelàn ntùm nenùne.

²⁰Là me ke ke nde't'a nda' num tshen ben ni, là mba num ben tse bo nsi tshùa num ntshob mub bam nà,

²¹ndùlala ndù njoṅ yub fa be ntshù', ndaṅndaṅ mba wù Tà be num àm, mba me be num o là, mba bo yub be num be, ndùlala ndù njù bam ndù a b'a wù bèn ntum àm.

²²Nkuni mi o fà me là, me lo fà bo, ndùlala ndù bo be ntshù', mba be be ntshù' là.

²³Me num bo, wù num àm, ndùlala ndù yub nebe ntshù' zwiagte, ndùlala ndù njù lèn ndù a b'a wù bèn ntum àm, mba ndù o be nkô yub mb'o num nkô àm nà.

²⁴Tà, ben ts'o fà me là, me kô ndù dù' ze me be bwe là, mba bo be yub bwe bag à bo, ndùlala ndù bo yen nkuni màm mi o fà me là. Nummbe o lo kô àm kà nenabte njù mbe.

²⁵Tà ze netsin, ṅ njù ke' lèn o, là me lèn o, tshen ben ni bèn ndèn ndù a b'a wù bèn ntum àm.

²⁶Me lo ghù bo lèn lén so, me nsi bèn ghù bo lène, ndùlala ndù nkôni z'o kô àm yi là be num bo, mba me yàm be num bo.