Read Medumba Yohané 18 Bible Online

Yohané 18 - Medumba bible

Yohané 18

¹Yésu tshob tshen nu là, ntum boa ghazi'te nu i, nèn mo' yoṅ fub ntsitmbaṅ Kédron dù' ze mo' nà na' mbe là, a tsho bwe mba ghazi'te nu i.

²Là mba Yuda ngaswèn i lo lèn yen dù' là, nummbe Yésu lo ke nèn bwe ngelaṅ yàm boa ghazi'te nu i.

³Ndùlala Yuda lo' soyé mba ghafa' tse ghale'te Nsi tse ndùbndùb mba ba Férésia tum nà, nse' bwe boa ndàmbo, nka' mba tshu ntsho.

⁴Ndùlala Yésu z'a lèn njoṅ tshu fa ts'a nsi se' yi là, tum, ntshob bo ndù: Bin diag à we?

⁵Bo bùnte yi ndù: Yésu ze Nazarèt! A tshob bo ndù: A b'a me. Mba Yuda ngaswèn i lo tsin bwe bo à bo.

⁶Ndùlala, ngelaṅ ze Yésu tshob bo ndù: A me là, bo bènte tuntun, ngwùte num tsha'a.

⁷Ndùlala a bèn mbètte yub ndù: Bin diag à we? Bo tshob ndù: Yésu ze Nazarèt.

⁸Yésu bùnte ndù: M'a tshob bin ndù a b'a me. Ndùlala a be ze bin tshwèt ndiag à me là, bin faṅ tshen ben ni bo nèn;

⁹ndùlala ndù ntshob mi a na' ntshob là bumte ndù: Ben ts'o na' mfà me là, me ke' ghù sàm mèn bi netèt bo.

¹⁰Ndùlala Simon Pétro z'a na' ngù ṅwi là, tsho', ndab tshe' ngale'te Nsi ze ndùb yi, nkeb toṅ i ze zwim. Lén yen tshe' ngale'te Nsi ze ndùb là b'a ndù Malkus.

¹¹Ndùlala Yésu tshob Pétro ndù: so ṅwi mbàn! Me ke nu ntu' ze Tà na' mfà me là ké?

¹²Ndùlala ba soyé, tà ba soyé mba ghafa' ba Yuda tshùb Yésu, nkul i,

¹³mbwôgmbwe ndo' i nèn yi mbwe Ana. Nummbe a na' mb'a mba ntse Kaïfa, z'a na' mbe ngale'te Nsi ze ndùb yen ngu'njù là là.

¹⁴Là, Kaïfa na' mb'a mèn z'a na' mfà men ntag li ba Yuda ndù: A b'a fu' sin mb'a be ta' mèn kwù num tu njoṅ benntùn fa là.

¹⁵Là Simon Pétro lo tam njam Yésu bo mo' ngazi'te nu Yésu. Yen ngazi'te nu Yésu là ze ngale'te Nsi ze ndùb lèn i là, tsho boa Yésu ntshundà ngale'te Nsi ze ndùb.

¹⁶Là Pétro tsin à njù mbaṅ nzendà. Ndùlala ngazi'te nu Yésu mbile, ze ngale'te Nsi ze ndùb lèn i là, tum, ntshob mènnzwi ngabéb nzendà, ngù Pétro tsho ntshundà.

¹⁷Ndùlala ngafa' ze mènnzwi yen nà z'a ke mbéb nzendà là tshob Pétro ndù: Mba wù yu ke b'a mèn netèt ghazi'te nu yen mèn ni ké? A tshob ndù: Me ke b'a yi.

¹⁸Tshe' ngale'te Nsi ze ndùb mba ghafa' tse lo tsin bwe, ndù bo nabte mbwôge, nummbe mfùag lo ke nko, nke njôg mbwôge.

¹⁹Ngale'te Nsi ze ndùb bètte Yésu nu mfà num ghazi'te nu i mba num ze netswite.

²⁰Yésu bùnte yi ndù: Me ke ntshob nu njù à be ndaṅndaṅ; njoṅ ndù fa me lo ke ntswit'a ntùm sinagogue mba ntùm ndà Nsi dù' ze njoṅ ba Yuda fa be ntse'te là, me ke' tshob sàm nu ntùm tsham.

²¹O bètt'àm numke? Bètte ju ze me na' ntshob là ben tse bo na' nju' àm nà. Tshù, bo lèn ju ze me na' ntshob là.

²²Ngelaṅ z'a tshob ndùlala là, mo' ngafa' z'a tsin mbaṅ i là, tam bu toṅ i, ntshob ndù: A mb'o tshwèt mbùnte ngale'te Nsi ze ndùb là ké?

²³Yésu bùnte yi ndù: A be ze me tshob a ke bwô là, o kwé nta num nukebwô, là, a be z'a bwô là, numk'o lab àm à?

²⁴Ndùlala Ana tum i ntùm mvèt mbwe Kaïfa ngale'te Nsi ze ndùb.

²⁵Simon Pétro lo tsin bwe, nke njôg mbwôge. Ndùlala bo tshob yi ndù: Mba wù yu ke b'a mèn netèt ghazi'te nu i ké? A gha ntshob ndù: Me ke b'a yi.

²⁶Mo' tshe' ngale'te Nsi ze ndùb, mèn ntùm tunndà mèn ze Pétro na' nkeb toṅ i là tshob ndù: Me lo ke yen o ntùm nà bin yi ké?

²⁷Ndùlala Pétro bèn nga, be ndùse kù'ngab tô.

²⁸Ndùlala bo lo' Yésu ju Kaïfa, nèn yi ntshundà ngomna. A na' mb'a kua' nkebnjù. Là tu wut tshob ke tsho ntshundà ngomna, ndùlala ndù kà bo sagte wut tshobe, là ndù bo ku'ni nejù Pasa.

²⁹Ndùlala Pilato tum njù nse' mbaṅ bo, ntshob ndù: Bin bote yen mèn ni à num ke lèn nu à?

³⁰Bo bùnte ntshob ndù: A lo mbe ndù yen mèn ni ke' b'a ngaghù nukebwô mba bag ke' fà i wù.

³¹Ndùlala Pilato tshob bo ndù: Bin lo' i ntsho't'é zin tu num ntshù' zin. Ba Yuda tshob yi ndù: Bo ke' bam bag ndù bag zwi mèn.

³²Ndùlala ndù ntshob Yésu mi a na' ntshobe, nela'te lèn vù z'a nsi kwù là bumte.

³³Ndùlala Pilato bèn ntsho ntshundà ngomna, ntsiaṅ Yésu ntshob yi ndù: O b'a mfen ba Yuda ké?

³⁴Yésu bùnte ndù: O tshob yen n'a be yu tu ké, ke tsemo' ben bèn ntshob wù num àm à?

³⁵Pilato bùnte ndù: Me b'a ze Yuda ké? Ngô o mba ghale'te Nsi tse ndùbndùb fà o me, ke z'o ghù à?

³⁶Yésu bùnte ndù: Yàm nufen ke b'a ze ntùm yen njù li, yàm nufen lo mb'a ze ntùm yen njù li mba ghafa' tshàm ma' ntsho ndù kà bo fà àm ba Yuda; là ndonni yàm nufen ke b'a ze mànsi.

³⁷Ndùlala Pilato tshob yi ndù: Ndùlala o b'a mfen ké? Yésu bùnte ndù: O tshob ndù me b'a mfen. Bo bwe àm à num bwe, me se' ntùm njù à num bwe: Ndùlala ndù me kwé nta num nenùne. Mba we lo z'a b'a njam nenùn nà num nju' nz'àm.

³⁸Pilato tshob yi ndù: Nenùn b'a ke? Ngelaṅ z'a tshob ndùlala là, a bèn ntum nèn mbaṅ ba Yuda, ntshob bo ndù: Me ke' fon sàm nu z'a ku'ni neghù a vù ntsha là.

³⁹A b'a matnu zin ndù me ke nsô ta' mèn ndàtsha mfà bin num lé'njù Pasa. Ndùlala, bin kô ndù me sô mfen ba Yuda mfà bin ké?

⁴⁰Bo bèn nkua' ntshob ndù: Ke b'a yen mèn nà, là Baraba, Baraba na' mb'a fimntshu.