Read Medumba Yohané 21 Bible Online

Yohané 21 - Medumba bible

Yohané 21

¹Tshen tshu là lo be tshùa, Yésu bèn ntswite wul i ghazi'te nu i num kaṅ dibantse Tibériade, a tswite wul i ndù:

²Simon Pétro, Tomas ze bo ke ntsiaṅ i Didime nà, Natanaél ze Kana mà Galiléa, bon Zèbèdéo mba tsemo' ghazi'te nu Yésu bàa lo be à dù' ntshù'.

³Simon Pétro tshob bo ndù: M'a' nèn ghom ngontse. Bo tshob yi ndù: Mba bag à nèn yag bag à wù. Bo tum, ntsho ntùm kenu. Yen tèttswe' là bo ke ghom sàm ju.

⁴Mba njù ké'te là, Yésu tsin kaṅ ntse, là ghazi'te nu i ke lèn ndù a b'a Yésu.

⁵Ndùlala Yésu tshob bo ndù: Bônke', bin ke' ghù ngontse ké? Bo bùnte yi ndù: Nga.

⁶A tshob bo ndù: Bin ma' mbunjà num bag kenu ze zwim, bin nsi fone, ndùlala bo ma', ke bèn ngù neta nesô mbunjà num bwoṅ ngontse z'a be ntùm bwe là.

⁷Ngazi'te nu Yésu yen nà z'a ke nkô i là tshob Pétro ndù: A b'a Tshùaben. Simon Pétro be ju' ndù a b'a Tshùaben, ndo' nzwe i, ntaṅ tun i, nummbe a na' mb'a tunntôg; a vù ntùm dibantse.

⁸Là tsemo' ghazi'te nu Yésu se' boa kenu, (nummbe bo lo ke b'a ngùanesà num tsha'a, là nguan nkam mfi' nkù bàa), nsoṅ mbunjà boa ngontse.

⁹Ngelaṅ bo tum num tsha' là, bo yen mo' tse nge'mbwôg bwe, mba ngontse num bwe mba bàn.

¹⁰Yésu tshob bo ndù: Bin lo' ngontse num tse bin lo neghom ndonni là nse' yi.

¹¹Simon Pétro ko' nsô mbunjà num tsha'a, ndù a dun ndô ngontse ndùbndùb ntshob tat bon tàn nkù. Mba mb'a na' njàm ntùm bwe là, mbunjà ke fagte.

¹²Là Yésu tshob bo ndù: Bin se' njù jujù. Là sàm mèn netèt ghazi'te nu i ke fèn ntù nebètt'é ndù: O b'a we? Nummbe bo lèn ndù a b'a Tshùaben.

¹³Yésu kù'te ndo' bàn mfà bo, mba ngontse be ndaṅndaṅ.

¹⁴Yen ni b'a mbatte yoṅ tat mba Yésu tswite wul i ghazi'te nu i, ngelaṅ a lo num vù là.

¹⁵Ndùlala ngelaṅ bo jù jujù là, Yésu tshob Simon Pétro ndù: Simon mén Yohané, o num nkô àm ntshùa tshen ben ni ké? A tshob yi ndù: Ṅ, me Tshùaben, o lèn ndù me num nkô o. A tshob yi ndù: Béb bon njùmbwe tshàm.

¹⁶A tshob yi mbatte bàa ndù: Simon mén Yohané, o num nkô àm ké? A tshob yi ndù: Ṅ me Tshùaben, o lèn ndù me num nkô o. A tshob yi ndù: Béb njùmbwe tshàm.

¹⁷A tshob yi mbatte yoṅ tat ndù: Simon mén Yohané, o num nkô àm ké? Pétro nywin mb'a tshob yi num mbatte yoṅ tat ndù: O num nkô àm ké là, ntshob yi ndù: Tshùaben, o lèn njoṅ tshu fa, o lèn ndù me num nkô o. Yésu tshob yi ndù: Béb njùmbwe tshàm.

¹⁸Kua' nenùne, kua' nenùne, me tshob wù ndù: Ngelaṅ o na' mbe kua' ménnshum nà, o lo ke ntaṅ kob so tu wul o, nke nèn dù' z'o kô là. Là ngelaṅ z'o nsi tù' njwèn mèn nà, o nsi nyit mbu mu, mo' mèn taṅ kob so, lo' o nèn yi dù' z'o ke nsi kô là.

¹⁹A ke ntshob ndùlal'a nelo' nda'te lèn vù se Pétro nsi ghamte Nsi yi là. A tshob yen nà, ntshob yi ndù: Tam njam àm!

²⁰Pétro kaṅ wul i njam, njen ngazi'te nu Yésu, yen nà z'a ke nkô i là, ndù a tam njam bo. A b'a yen nà z'a na' mben wul i num ndàntù Yésu, ngelaṅ bo be téblé, ntshob yi ndù: Tshùaben, ngaswèn o b'a we?

²¹Pétro be yen i, ntshob Yésu ndù: Tshùaben, yen mèn ni o?

²²Yésu tshob yi ndù: A be ze me kô ndù a ghô tà nkum ngelaṅ me nsi se' là, mba yu be bwe à ndùke? Tu wul o, tam njam àm.

²³Ndùlala men ntshob là sa netèt fètfèt, ndù yen ngazi'te nu Yésu là ke nsi kwù. Là ndù Yésu lo ke tshob ndù a ke nsi kwù, là ndù: A be ze me kô ndù a ghô tà nkum ngelaṅ ze me se' là, mba yu be bwe à ndùke?

²⁴A yen ngazi'te nu Yésu là bèn nkwé nta tshen tshu là, a yi bèn nkite tshen nà; bag lèn ndù ze nekwénta b'a nenùne.

²⁵Tsemo' tshu bèn mbe bwe yàm tse Yésu na' ngù là. A lo mbe ndù bo kite yub ntshù', ntshù' mba me kwate ndù ṅwa'ni tse be bo kite là ke' ku'ni netsho ntùm njù li.