Read Medumba Yohané 4 Bible Online

Yohané 4 - Medumba bible

Yohané 4

¹Ngelaṅ Tshùaben lèn ndù ba Férésia ju' ndù Yésu tshwèt ngù ghazi'te nu i yàme, mbèn nke nyu' benntùn ntse ntshùa Yohané là,

²là tu wul i Yésu lo ke nyu' benntùn ntse, là ghazi'te nu i,

³a tum Yudéa mbèn njam mà Galiléa.

⁴A lo bwô ndù a tshùa netèt Samaria.

⁵Ndùlala a kum ntùm mo' ngô Samaria, lén se Sikar, mbaṅ nà ze Yakob na' mfà mén i là.

⁶Tôntse Yakob lo be yen dù' là. Yésu z'a zin mbot là tswe nsi bwe, mbaṅ ntse. A na' mb'a nguan njagnyam.

⁷Mo' mènnzwi se' netu' ntse, Yésu tshob yi ndù: Fà mén ntse me, me nu.

⁸Nummbe ghazi'te nu i lo nèn ntùm ngô jun jujù.

⁹Là nzwi Samaria tshob yi ndù: Numke wù z'o b'a ze Yuda là bètt'àm ntse, me ze me b'a nzwi Samaria l'à? (Nummbe ba Yuda mba ba Samaria lo ke be tamte num sàm ju).

¹⁰Yésu bùnte ntshob yi ndù: O lo ndèn ju ze Nsi num mfà là, mbèn ndèn mèn z'a tshwèt ntshob wù ndù: Fà mén ntse me, me nu là, kà mbu' mbu yi yu tu, mb'a fà ntse yôg wù.

¹¹A tshob yi ndù: Tshùaben, o ke' ghù ju netu' ntse yi, tôntse bèn nèn nsi neshu; o lo' men ntse yôg l'à yà?

¹²O b'a mèn ndùb ntshùa tà yag Yakob z'a na' mfà sen tôntse li bag là ké? Tu wul i lo nu ntùm bwe, bon tse mba nyàm tse.

¹³Yésu bùnte ntshob yi ndù: Mba we lo z'a nu men ntse li là, ntù i nsi bèn kù;

¹⁴là mèn z'a nsi nu ntse mi me nsi fà yi là, ntù i ke nsi bèn kù mo' yoṅ i, là ntse mi me nsi fà yi là nsi tù' lagntse num i, se ntse nsi tum bwe num yôg matmat là.

¹⁵Mènnzwi là tshob yi ndù: Tshùaben, fà men ntse là me ndù kà ntù àm bèn nekù, mba ndù kà me bèn nese' nsen ni, netu' ntse.

¹⁶Yésu tshob yi ndù: Nèn ntsiaṅ ndu o, nse' nsen ni.

¹⁷Mènnzwi là bùnte ntshob ndù: Me ke' ghù tshàm ndu. Yésu tshob yi ndù: O tshob mebwô netshob ndù: me ke' ghù tshàm ndu;

¹⁸nummbe o lo ghù du tàn, mba z'o ghù ndonni là ke' b'a ndu o; num ndùlala o tshob nenùne.

¹⁹Mènnzwi là tshob yi ndù: Tshùaben, me yen ndù o b'a ngatshob ntshob Nsi.

²⁰Tà tshag lo ke ngamte Nsi num mbat li, bin nke ntshob ndù Yérusalém bèn mbe dù' z'a bwô neghamte Nsi bwe là.

²¹Yésu tshob yi ndù: Mènnzwi, bam me ndù ngelaṅ ku'u, ze bo ke nsi bèn ghamte Tà num yen mbat li, ke mba Yérusalém lo là.

²²Bin lo ke ngamte ju ze bin ke' lèn nà; bag nke ngamt'a ju ze bag lèn nà; nummbe yôg fe à ba Yuda.

²³Là ngelaṅ bwe nku'u, ndù a ku' ndonni ze ghaghamte Nsi tse nenùne, nsi ghamte Tà ntùm Ywèt mba ntùm nenùn nà, nummbe a b'a lèn tshen ghaghamte Nsi là tse Tà num ndiag là.

²⁴Nsi b'a Ywèle, a bwô ndù ben tse bo ke ngamt'é là ke ngamt'é ntùm Ywèt mba nenùne.

²⁵Mènnzwi là tshob yi ndù: Me lèn ndù Mésia tshwèt nse' ze bo ke ntsiaṅ i Kristô là; ngelaṅ ze yen mèn nà nsi se' là, a nsi soṅ yag njoṅ nu fa.

²⁶Yésu tshob yi ndù: Me b'a yi, me ze me tshwèt ntshob wù là.

²⁷Mb'a ke nke' ntshob là, ghazi'te nu i se', ntshàm neshu mb'a tshwèt ntshobte bo mènnzwi là. Là sàm mèn ke tshob ndù: Ke z'o tshwèt mbètte yi à? Ke ndù: A nu ke ze bin yi tshwèt ntshob à?

²⁸Ndùlala mènnzwi là faṅ tentse i, nèn ntùm ngô, ntshob benntùn ndù:

²⁹Bin se' njen mo' mèn z'a soṅ àm njoṅ tshu fa tse me ghù là, mo' ndù a b'a Kristô!

³⁰Bo tum ntùm ngô nèn mbaṅ i.

³¹Ngelaṅ mènnzwi là nèn nà, ghazi'te nu i nke nde't'é, ntshob ndù: Rabbi, jù ju.

³²Là, a tshob bo ndù: Me ghù jujù ze me jù, ze bin ke' lèn nà.

³³Ndùlala ghazi'te nu i nke ntshob bo bo ndù: Mo' ndù mo' mèn se' mfà jujù yi.

³⁴Yésu tshob bo ndù: Yàm jujù b'a ndù me ghù nekô mèn z'a tum àm nà, mba ndù me nsi miagte fa' se.

³⁵Bin ke' be tshob ndù: A tù' maṅwù kuà netsho' tshu ku' ké? Tshù, me tshob bin ndù: Bin bù' miag min ndôte ntùm nà njene, tshu netsho' à fôge, a bwô netsho' tshu.

³⁶Mèn z'a num ntsho' tshu là num nkwé ntsho'fa', nke ntse'te ntàm num yôg matmat, ndù mèn z'a ywit là mba mèn z'a tsho' là tamte ntsiaṅte.

³⁷Nummbe men tshob li b'a nenùn nsen ni ndù: Mo' mèn b'a ngaywit, mo' mèn be ngatsho'.

³⁸Me lo tum zin netsho' tshu dù' ze bin na' mbe ke fa' là, tsemo' ben lo fa'a, là bin tsho' ntùm fa' sobe.

³⁹Là ba Samaria yàm tse bo be ntùm yen ngô là là, bam i, ntshùa num ntshob mi mènnzwi tshob bo, nkwé nta yi là, ndù: A soṅ àm njoṅ tshu fa tse me ghù là.

⁴⁰Ngelaṅ ba Samaria kum mbaṅ i là, bo le't'é ndù a ghô bo à bo. A ghô bwe lé'njù bàa.

⁴¹Benntùn yàm yàm bèn mbame, ntshùa num ntshob mi.

⁴²Bo nke ntshob mènnzwi là ndù: Bag ke' bèn mbam à nda' num mb'o lo ntshob là. Nummbe mba bag ju' yag tu, ndèn ndù yen mèn ni b'a kua' ngayôg njù.

⁴³Là tshen lé'njù bàa là lo be tshùa, a tum yen dù' là, nèn Galiléa.

⁴⁴Nummbe tu wut Yésu lo kwé nta ndù bo ke' be nyàmte sàm ngatshob ntshob Nsi ntùm ko' ngô i.

⁴⁵Ndùlala, ngelaṅ z'a kum Galiléa là, ba Galiléa lo' i mba bo na' njen njoṅ tshu fa ts'a na' ngù mà Yérusalém mum lé'njù jùa là, nummbe mba bo lo nèn mum lé'njù jùa.

⁴⁶Ndùlala, a bèn nse' Kana dù' z'a ghù ntse tù' ndu' là. Mo' tshe'mfen lo be bwe ze mén i ke ngon Kapernaum nà.

⁴⁷Yen mèn nà be ju' ndù Yésu fe Yudéa nse' Galiléa, nèn mbaṅ i, nde't'é ndù a swe' nèn njate mén i yi, nummbe a tù' nekwù.

⁴⁸Yésu tshob yi ndù: A be ze bin ke' yen nsa mba tshu netshàm nà mba bin ke bame.

⁴⁹Tshe'mfen tshob yi ndù: Tshùaben, swe' kà mén àm kwù.

⁵⁰Yésu tshob yi ndù: Nène, mén o yôge. Yen mèn nà bam ntshob mi Yésu tshob yi là, nène.

⁵¹Là, mb'a be num manze nke nswe' là, ghafa' tse se', mbumte boa yi, ntshob ndù mén i yôge.

⁵²A bètte yub nyam ze mén to' netswe mebwô là.

⁵³Ndùlala tàab lèn ndù a b'a num yen nyam nà ze Yésu lo ntshob yi ndù: Mén o yôg là. A bam, yi, mba njoṅ tunndà i fa.

⁵⁴Yen ni b'a mbatte nsà bàa ze Yésu ghù ngelaṅ a fe Yudéa nse' Galiléa là.