Read Medumba Yohané 8 Bible Online

Yohané 8 - Medumba bible

Yohané 8

²Njù yoṅ mbe làne, a bèn njam ntùm ndà Nsi, njoṅ benntùn fa se' ntèl i; a tswe nsi, nke ntswite yube.

³Ghalèn ṅwa'ni Nsi mba ba Férésia lo' mo' mènnzwi ze bo na' ntshùb i num nu màndà là nse' yi, nte i netèt,

⁴ntshob Yésu ndù: Ngatswite, bag lo tèt yen mènnzwi li a nke ngù màndà kà bag ntshùb i.

⁵Là ntùm ntshù', Mosé lo tshob ndù bo tamte lèn tshen bènnzwi li ndoṅ. Ndùlala, tu wul o, o tshob yu ndùke?

⁶Bo ke ntshob ndùlal'a num nelo' ndaṅt'é yi ghù nu ze bo tshùa bwe kà bot'é là. Là Yésu ben wul i nsi, nke nkite ju num tsha' ntubu i.

⁷Là mba bo ke nke' mbètt'é là, a bù' wul i ntshob bo ndù: Mèn z'a netèt bin ndù a ke' ghù nukebwô num i là, a bwôgmbwe ma' loṅ num i;

⁸a bèn mben wul i nsi, nke nkite ju num tsha'a.

⁹Là bo be ju' men ntshob li, nke ntum ntshù' ntshù', nto' num ywèn benntùn; Yésu tù' ndà tù' i bo mènnzwi ndù a tsin bwe, netèt.

¹⁰Là Yésu bèn mbù' wul i ntshob yi ndù: Mènnzwi, bo yà? Sàm mèn ke' naṅ ntsha tu o ké?

¹¹A tshob ndù: Sàm mèn me Tshùaben. Yésu tshob ndù: Mba tu wul àm me ke' naṅ ntsha tu o. Nène, fe ndonni kà bèn neghù nukebwô.]

¹²Ndùlala Yésu bèn ntshob bo mo' yoṅ i ndù: Tu wul àm, me b'a nka' njù, mèn z'a tam njam àm nà ke nsi zin ntùm njame, là, a nsi ghù nka' yôg.

¹³Ndùlala ba Férésia tshob yi ndù: O tshwèt nkwé nta tu wul o yu tu, yu kwénta ke b'a nenùne.

¹⁴Yésu bùnte ntshob bo ndù: A be ze me kwé mba nta tu wul àm yam tu là, mba yàm kwénta b'a nenùne; nummbe me lèn dù' ze me fe bwe là, mba dù' ze me nèn nà, là bin ke' lèn dù' ze me fe bwe là ke dù' ze me nèn bwe là lo.

¹⁵Bin ke ntsho't'a num ze mat mènntùn, là tu wul àm, me ke tshwèt ntsho'te sàm mèn.

¹⁶Là, a be ze me tsho'te là, mba yàm netsho'te ntsha b'a ze nenùne; nummbe me ke' b'a tù' me, là me num bwe, mba Tà z'a tum àm nà.

¹⁷Là bo lo kite ntùm ntshù' mi a b'a min nà ndù: Kwénta ben bàa b'a nenùne.

¹⁸A b'a me bèn nkwé nta tu wul àm yàm tu, mba Tà z'a tum àm nà tshwèt nkwé nta màm.

¹⁹Ndùlala bo tshob yi ndù: Tàan b'a yà? Yésu bùnte ndù: Bin ke' lèn, ke me, ke Tàa lo, a lo mbe ndù bin lèn àm, mba bin nsi lèn mba Tàa.

²⁰Yésu ke ntshob men ntshob li à dù' ze koṅ nkàb be là, ngelaṅ a ke ntswite ntùm ndà Nsi là. Sàm mèn ke tshùb i nummbe ze ngelaṅ lo ke yoṅ nku'u.

²¹Ndùlala a bèn ntshob bo ndù: Me tshwèt nène, bin nsi diag àm, bin nsi kwù ntùm nukebwô zin. Dù' ze me tshwèt nèn nà, bin ke' ku'ni nese' bwe.

²²Ndùlala ba Yuda nke ntshob ndù: A nsi zwi wul i ze tu ké? K'a nke ntshob ndù: Dù' ze me tshwèt nèn nà, bin ke' ku'ni nese' bwe à?

²³A tshob bo ndù: Bin, bin b'a ba mànsi, tu wul àm, me b'a mfe tù. Bin b'a ba ntùm yen njù li; me ke' b'a ze ntùm yen njù li.

²⁴Ndùlala me lo tshob bin ndù bin nsi kwù ntùm nukebwô tsine; nummbe, a be ze bin ke' bam ndù me num bwe là, mba bin nsi kwù ntùm nukebwô tsine.

²⁵Bo nke ntshob yi ndù: O b'a we? Yésu tshob bo ndù: Me b'a ze me na' ntshob bin fe neto'te là.

²⁶Me ghù nu netshob mba netsho'te num bin yàme, là mèn z'a tum àm nà b'a mèn nenùne; tshu tse me ju' yi là, a b'a tshen nà tse me tshwèt ntshob ntùm njù là.

²⁷Bo ke lèn ndù a ke ntshob nu boa num Tàab.

²⁸Ndùlala Yésu tshob ndù: Ngelaṅ ze bin nsi bù' Mèn mèn tù là, yen ngelaṅ nà, bin nsi lèn ndù me num bwe, mba ndù me ke' be ghù sàm ju num yàm tu, là ndù me ke ntshob tshen tshu l'a ndaṅndaṅ mba Tàa na' ntswit'àm nà.

²⁹Bag mèn z'a tum àm nà bèn mbe, a ke' faṅ àm tù' me, nummbe me ke ngù à be tshu ts'a bwô i là njoṅ ngelaṅ fa.

³⁰Mb'a ke ntshob ndùlili là, benntùn yàm bam i.

³¹Ndùlala Yésu nke ntshob ba Yuda tse bo bam i là ndù: A be ze bin ghô num ntshob màm nà, mba bin b'a kua' tshàm ghazi'te nu.

³²Mba bin nsi lèn nunenùne, mba nunenùn nsi ghù bin tswe zin tu.

³³Bo bùnte yi ndù: Bag b'a nzwit Abraham, bag lo ke to' yoṅ mbe kuan sàm mèn. Be o tshob ndù: Bin nsi tù' zin tu à ndùke?

³⁴Yésu bùnte bo ndù: Mba we lo z'a ghù nukebwô là, b'a nkuan nukebwô.

³⁵Là nkuan ke' be ghô ntùm ndà yoṅ ntshù', mén num ngô bwe yoṅ ntshù'.

³⁶A ndùlala, a be ze Mén ghù bin tù' zin tu là, mba bin nsi tswe kua' zin tu.

³⁷Me lèn ndù bin b'a nzwit Abraham, là bin tshwèt ndiag nezwi àm, nummbe ntshob màm ke' tshote zine.

³⁸Ju ze me yen mbaṅ Tàa là, me tshwèt ntshobe; mba bin zin, ju ze bin ju' tà zin nà, bin nke ngù.

³⁹Bo bùnte ntshob yi ndù: Tà yag b'a Abraham. Yésu tshob bo ndù: A be ze bin b'a bon Abraham nà, bin fa' mfa' Abraham.

⁴⁰Là ndonni bin tshwèt ndiag nezwi àm, me ze me tshob nunenùn ze me ju' mbaṅ Tà bin nà; Abraham lo ke ghù yen nà.

⁴¹Bin ke mfa' à mfa' tà zin. Bo tshob yi ndù: Bo ke' bwe yag à ntùm ghàne: Bag ghù tà yag nda' ntshù', Nsi.

⁴²Ndùlala Yésu tshob bo ndù: Nsi lo mb'a Tà zin mba bin kô àm; nummbe me tum à num Nsi kà nse'e. Nummbe me ke' se' à num yàm tu, là, a yi bèn ntum àm.

⁴³Numke bin be ke lèn nu me tshob l'à? Nummbe bin ke' ku'ni neju' ntshob màm.

⁴⁴Bin ghù tà zin z'a b'a Satan nà, a tse nekô tà zin nà tse bin tshwèt nkô neghù a bumte là. Yen mèn nà b'a ngazwimèn fe neto'te, a lo ke to' tsin ntùm nenùne. Nummbe nenùn ke' be num i. A num mbe ngelaṅ z'a tshob tatte là, a tshob à be kua' ju z'a be yi là, nummbe a b'a ngatatte, mba tà tatte.

⁴⁵Là tu wul àm, mba me tshob nenùn nà bin ke' bam àm.

⁴⁶We z'a netèt bin z'a nsi la'te yàm nukebwô à? A be ze me tshob nunenùn nà, numke bin ke bam à?

⁴⁷Mèn z'a fe à Nsi là num nju' ntshob Nsi; a num ndùlala bin ke' ju', nummbe bin ke' fe à Nsi.

⁴⁸Ba Yuda bùnte ntshob yi ndù: Bag ke tshob à nenùne, a be ze bag tshob ndù o b'a ze Samaria mba ndù o ghù ywètkebwô là ké?

⁴⁹Yésu bùnte ndù: Me ke' ghù ywètkebwô, là me ke ngamt'a Tàa, là bin nke ngwag àm.

⁵⁰Là tu wul àm, me ke ke ndiag à yàm ghamte, mèn num bwe z'a be ntsho'te mbèn nkeb ntsha là.

⁵¹Kua' nenùne, kua' nenùne, me tshob bin ndù: A be ze mèn lé' ntshob màm nà, mb'a ke nsi kwù yoṅ ntshù'.

⁵²Ba Yuda tshob yi ndù: Ndonni bag lèn ndù o ghù ywètkebwô, Abraham lo kwù mba ghatshob ntshob Nsi bèn nkwù, là wù, o tshwèt ntshob ndù: A be ze mèn lé' ntshob màm nà, mb'a ke nsi kwù yoṅ ntshù'.

⁵³O b'a mèn ndùb ntshùa tà yag Abraham z'a na' nkwù là ké? Mba ghatshob ntshob Nsi lo kwù, o ke ndiag neba we?

⁵⁴Yésu bùnte ndù: A be ze me ke nkuni à tu wul àm nà, mba màm nkuni ke sàm ju; a b'a Tàa bèn nke nkuni àm, yi ze bin tshwèt ntshob ndù: A b'a tà yag là.

⁵⁵Bin ke' lèn i, là tu wul am me lèn i, me lo nke ntshob ndù: Me ke' lèn i mba me nsi tù' ngatatte mba bin nà. Là me lèn i mbèn nke ndé' ntshob mi.

⁵⁶Abraham tà zin lo tsiaṅte mb'a nsi yen lé'njù sàm nà, ne njene, mbèn ntsiaṅte.

⁵⁷Ndùlala ba Yuda tshob yi ndù: O ke' ghù ngu'njù ṅam ntàn, mbe ndù o yen Abraham.

⁵⁸Yésu tshob bo ndù: Kua' nenùne, kua' nenùne, me tshob bin ndù: Abraham lo be be, ndù m'a be.

⁵⁹Ndùlala bo tswitte ndoṅ num netam Yésu yi, là Yésu lemte, ntum ntùm ndà Nsi.