Read Medumba Mfa' Ghantum 10 Bible Online

Mfa' Ghantum 10 - Medumba bible

Mfa' Ghantum 10

¹Mo' mèn lo be Késaréa lén se Kôrneliô, z'a ke ntô ntshu ntsho soyé nkù (bo nke ntsiaṅ yen ntshu ntsho là ndù ba Italia),

²mbe ngaghamte Nsi, nke mbwôg Nsi boa njoṅ tunndà i fa, nke njwimte benntùn, mfà tshu yàm bo, mbèn nke nde'te Nsi njoṅ ngelaṅ fa là.

³A yen njem mo' mbwôgtshù nguan nyam tat, njen mo' Angél ndaṅndaṅ, Angél là se' ntèl i, ntshob yi ndù: Kôrneliô!

⁴Kôrneliô te miag num i, mbwôge, ntshob ndù: A ke là Tshùaben? Angél tshob yi ndù: Njoṅ le'te Nsi tsho fa, njoṅ tshu tsho fa, ts'o be mfà ghayennge' là, ko' nèn mbwe Nsi: A tshwèt nkwimte.

⁵Ndonni, tum benntùn Yôbé bo nèn ngù mo' Simon, lén se Pétro se'e.

⁶A ke ntswe à ndà mo' Simon, nganabte ngub, ze ba' i be kaṅ dibantse là.

⁷Ngelaṅ Angél ze bo yi ke ntshobte nèn nà, Kôrneliô tsiaṅ tsemo' ghafa' tse bàa mba mo' soyé ngaghamte Nsi netèt tse boa Kôrneliô ke ntamte là,

⁸nsoṅ yub njoṅ nu fa, ntum yub Yôbé.

⁹Njù be làne, bo zin nke ngebte mbaṅ ngô là. Num yen ngelaṅ nà, nguan njagnyam, Pétro ko' num tuba' nele'te Nsi.

¹⁰Nziku' ya i a diag nejù ju. Ngelaṅ ze bo ke nabte jujù yi là, ntù i tum.

¹¹A yen kamànyam gha' nte nge, mo' ju mba kam nzwe ndùb ze bo tshùb ntôg mi nkuà là, swe' bwe, nse' num nsitsha'a.

¹²Njoṅ bon nyàm nku nkuà fa, njoṅ nyàm fa tse bo num nsoṅ bam sob nsi là, mba bon nsaṅ mfe kamànyam be ntùm yen ju là.

¹³Mo' nze tshob yi ndù: Pétro, lo tù nzwi mfèle!

¹⁴Là Pétro tshob ndù: Nga me Tshùaben, me ke' yoṅ nto' fèt tshàm nyàm ts'a sagte là mba ts'a ke' làn nà.

¹⁵Nze là bèn ntshob yi mo' yoṅ i ndù: Ju ze Nsi lànte là, kà lo' i mba ju z'a sagte là.

¹⁶Yen nà tum ndùlala yoṅ tat; be ndùse, ju là bèn nko' nèn mfe kamànyam.

¹⁷Yen nu là tshùa Pétro. Mb'a ke nkwate tu i num tun njem z'a yen nà, tshù, benntùn tse Kôrneliô tum yub là bètte ba' Simon, nse' nke'te nzendà, mbètte ndù:

¹⁸Simon ze bo num ntsiaṅ i Pétro là ke ntswe à ndà li ké?

¹⁹Ywèt tshob Pétro ngelaṅ a ke nkwate tu i num njem nà ndù: Tshù, ben tat tshwèt ndiag o,

²⁰lo, swe' nèn bin à bo kà me'te, nummbe me bèn ntum yube.

²¹Pétro swe' nèn mbaṅ tshen ben nà, ntshob ndù: Tshù, me b'a mèn ze bin tshwèt ndiag i là; bin se' à num ke?

²²Bo bùnte ndù: Kôrneliô ngatô soyé nkù, mèn netsin mba ngabwôg Nsi, ze njoṅ ba Yuda fa num nkwé nta mi kua' mebwô là lo yen Angél nelàne, a tshob yi ndù: Tshùaben tshwèt nkô ndù o se' ndà Kôrneliô ndù yen ni ju' ntshob mu.

²³Pétro lo' yub mfà dù' zi bo. Njù làn, a lo nèn bo à bo. Tsemo' fètfèt tse bo be Yôbé là nèn ntshag i.

²⁴A be num mbatte lé'njù bo zin nkum ntùm ngô Késaréa. Là Kôrneliô tswe nke mbéb yube, ntse'te ba la' bo mba ko' shun tse.

²⁵Pétro yoṅ mbe kume, Kôrneliô nèn mbumte bo yi, ngwù num nku Pétro kabkab, ngamt'é.

²⁶Là Pétro bù' i nsi, ntshob yi ndù: Lo nsi, mba me yàm b'a mènntùn.

²⁷Pétro na' ntshob bon ntshob yi, ntsho ndà bo yi, njen benntùn yàm ndù bo tse'te bwe.

²⁸A tshob bo ndù: Bin lèn ndù a b'a nu ṅu' mèn Yuda, mb'a be a tamte bo mènntùn, ntsho ndà i là. Mba me là, Nsi la'te me ndù kà me bèn nelo' sàm mèn mba mèn z'a sagte là ke mba mèn z'a ke' làn nà lo.

²⁹A ndùlala bèn ngù kà me nse' ke diag ntun, ngelaṅ bin tum bo se' tsiaṅ àm nà. Ndùlala me bètt'a ju ze bin tum bo se' diag àm num bwe là.

³⁰Kôrneliô tshob ndù: A ndonni lé'njù tat, me lo ke nde'te Nsi ndà àm num nyam tat mbwôgtshù, tshù, mo' mèn tsin mbwe àm ndù a ket nzwe ṅwa'ṅwa',

³¹ntshob me ndù: Kôrneliô, Nsi ju' le't'o, mbèn nkwimte tshu tsho ts'o num mfà ghayennge' là.

³²Tum bo nèn Yôbé, ntsiaṅ Simon ze mo' lén se be Pétro là, a ke ntswe à ndà Simon nganabte ngub, mbaṅ dibantse.

³³Ndùlala me yoṅ ntum yub mbaṅ o. O ghù a bwô mb'o se' là. Ndonni, njoṅ yag fa b'a mbwe Nsi neju' ju ze Tshùaben tshob wù ndù o tshob bag là.

³⁴Pétro nabte ntshu i ntshob ndù: Kua' nenùne, me yôg ndèn ndonni ndù Nsi ke' be tôte sàm mèn,

³⁵là ntùm njoṅ nzwit benntùn fa mba zit mèn no z'a num mbwôg i, mbèn nke ngù nunetsin nà, num mbwô i.

³⁶Yen ni b'a ntshob mi Nsi na' ntum bon Israél ngelaṅ a ke ntshob nkùn fite njam Yésu Kristô bo là: A b'a Tshùaben njoṅ benntùn fa.

³⁷Bin lèn nu z'a bumte ntùm njoṅ ngô Yudéa fa, nto' fe Galiléa njam kwéntse ze Yohané tshob là.

³⁸A b'a nu Yésu ze Nazarèt: Nsi lo yo' i Ywèt Nelàne, mba neta; a nke nèn ntùm dù' nzenze, nke ngù numebwô, mbèn nke njate njoṅ benntùn fa tse Satan ke ngùtni yub là, nummbe Nsi lo be bo yi.

³⁹Bag b'a ghakwénta njoṅ tshu fa ts'a na' ngù ntùm ngô ba Yuda mba Yérusalém nà; bo na' nzwi i, nkwimt'é num fanta'tù,

⁴⁰Nsi bam i num vù num mbatte lé'njù tat, ngù a tswite wul i,

⁴¹ke b'a njoṅ benntùn fa, là be nda' ghakwénta tse Nsi na' mbwôgmbwe ntsho' yub là; bag tse bag à bo jù mbèn nu, ngelaṅ a bam num vù là.

⁴²A lo bam bag ndù bag tshob ntshob mi benntùn, mbèn nkwé nta ndù Nsi yab i ngakeb ntsha benntùn mba fe ben.

⁴³Njoṅ ghatshob ntshob Nsi fa lo kwé nta num i ntshob ndù: Mèn z'a bam i là mba Nsi a' lagte nukebwô tse njam lén se.

⁴⁴Ngelaṅ Pétro ke nke' ntshob men ntshob li là, Ywèt Nelàn swe' num njoṅ yub fa tse bo ke nju' ntshob là.

⁴⁵Ba Yuda tse bo na' mbam nu Yésu, tse bo se' tshag Pétro là lo tshàm neshu, mba Nsi fà, mbèn naṅ Ywèt tse mba num ghakelèn Nsi là.

⁴⁶Nummbe bo lo ke nju' bo nke ntshob ntshob nzenze, mbèn nke ngamte Nsi.

⁴⁷Ndùlala Pétro tshob ndù: Be mèn ku'ni netshètte ndù kà bo nyu' tshen ben ni tse bo kwé Ywèt Nelàn mba be là ntùm ntse à ndùke?

⁴⁸A tshob bo nyu' yub ntùm ntse num lén Yésu Kristô. Bo labt'é ndù a tswe tsemo' bon lé'njù.