Read Medumba Mfa' Ghantum 13 Bible Online

Mfa' Ghantum 13 - Medumba bible

Mfa' Ghantum 13

¹Netèt ntse'te benkristô Antiôkia, ghatshob ntshob Nsi mba ghatswite lo be bwe: Barnaba, Simon ze bo num ntsiaṅ i Niger là, Lukiô ze Kiréné, Manahèm ze bo kwiagt'é bo mfen Hèrodé là, mba Saulo.

²Ngelaṅ bo ke mfa' fa' Tshùaben, mbèn nke ntswe nziku' là, Ywèt Nelàn tshob bo ndù: Bin sô Barnaba mba Saulo, njab me num fa' se me na' ntsiaṅ yub bwe là.

³Bo be miagte netswe nziku'u, mba nele'te Nsi, njab mbu num bo, ndé'te yub bo nèn.

⁴Bo tse Ywèt Nelàn na' ntum yub là swe' nèn mà Selekia, ntsho kenu nèn Kiprô.

⁵Ngelaṅ bo kum Selekia là, bo to' netshob ntshob Nsi ntùm ba sinagogue ba Yuda. Bo lo ghù Yohané ngaywimte yube.

⁶Bo be miagte netshùa ntùm ngô tètntse, nkum Pafôs, njen mo' mén Yuda lén se Baryésu, ngaka, mbèn mbe ngatshob ntshob Nsi ze tatte.

⁷A lo be mbaṅ ngomna Sérgiô Paulo nkummèn. Yen ni ghù bo tsiaṅ Barnaba mba Saulo, a lo kô neju' ntshob Nsi.

⁸Là Elima ngaka, yen ni b'a mbagte tun lén se, nke ntshètte yube, ndiag neto' ngomna ndù k'a bam Yésu.

⁹Là Saulo ke Paulo lo dun Ywèt Nelàne, nte miag mi num i, ntshob yi ndù:

¹⁰Ngankùnkù mba ngatatte, mén Satan, ngakeban njoṅ nunetsin fa, o ke' ku' nefaṅ ke bèn nebagte manze Tshùaben ts'a b'a tse netsin nà ké?

¹¹Tshù, be ndonni bu Tshùaben tshùb o, o nsi tù' mfùmiag, ke bèn neyen lagnyam num mo' ngelaṅ. Be ngelaṅ mbile, miag mi sènte, ntam njame; a to' nediaṅ dù' mbume, nèn bag bag, nke ndiag mèn z'a tshagt'é là.

¹²Ngomna be yen nu z'a tshùa là, nyàmte nu Tshùaben ze bo tswite là.

¹³Paulo mba shun tse tsho kenu Pafôs, nèn Pèrgé mà Pamfilia. Là Yohané fagte bo à bo, mbèn njam Yérusalém.

¹⁴Mba bo là, bo lo Pèrgé nèn tà nkum Antiôkia mà Pisidia. A be lé'njù Sabbat bo tsho sinagogue, ntswe nsi.

¹⁵Bo be miagte nesiaṅ ntshù' mba ghatshob ntshob Nsi, ghalôte sinagogue tum bo tshob bo ndù: Fèt tshag, a be ze bin ghù memo' ntag nefà benntùn nà, bin tshob.

¹⁶Paulo lo tù, ma' bu i bo, ntshob ndù: Bin ba Israél mba bin tse bin num mbwôg Nsi là, bin ju'u!

¹⁷Nsi tshen ba Israél li lo tsho' ba tà tshage, mbù'te yub ngelaṅ bo na' mbe ghùn ntùm ngô Egipto là, mbèn mbù' bu i, nsô yub yi bwe.

¹⁸Num kônkwa, a nke mfènte yub num ngu'njù ṅam nkuà,

¹⁹mbiagte ngô sammbàa Kanaan, mfà tsha' tse bo mba ju ntsi' là,

²⁰num nguan ngu'njù bon tàn nkù kuà. Yen nà be tshùa, a fà ghakeb ntsha bo tà nèn nkum ngelaṅ ngatshob ntshob Nsi Samuél.

²¹Yen ngelaṅ nà bo to' nebètte mfen, Nsi fà Saulo mén Kis ntùm tunndà Benjamin bo, a tô yub ngu'njù ṅam nkuà.

²²Nsi be ghua' Saulo, tsho' David num fen, nkwé nta mi ntshob ndù: Me yen David mén Isaï, a mèn ze ntù àm kô là, a nsi ghù yàm nekô bumte.

²³A ntùm nzwil i ze Nsi tsho' ngayôg Israél, Yésu, ndaṅndaṅ mb'a na' nka' là.

²⁴Yohané lo bwôgmbwe nse'e, nke ntshob nu nekwéntse ze nekaṅ ntù njoṅ ba Israél fa.

²⁵Yohané lo be kum num ze miagte fa', nke ntshob ndù: Mèn ze bin num nkwate ndù me b'a yi là, me ke' b'a yi; tshù, mèn njam àm nse' ndù me ke' ku'ni neké'te mba nkù nketo' mi nku mi.

²⁶Fèt tshàm, bon nzwit Abraham mba bin tse bin num mbwôg Nsi là, bo na' ntum ntshob sen yôg li à be.

²⁷Mba ba Yérusalém mba kamkam tshob be ke lèn i là, bo tsho't'é, ndùlala bo ghù ntshob ghatshob ntshob Nsi mi bo num nsiaṅ lé'njù Sabbat là bumte.

²⁸Mba mba bo ke' yen sàm nu z'a ku'ni neghù ndù bo zwi i là, bo bètte Pilato ndù bo zwi i.

²⁹Ngelaṅ bo na' ngù njoṅ nu fa bo kite num i là bumte là, bo swe' fe i num fanta'tù njab ntùm mo' fi.

³⁰Là Nsi bam i num vù.

³¹Ntùm lé'njù yàme, a nke ntswite wul i ben tse bo à bo lo Galiléa nko' nèn Yérusalém nà. Tshen ben ni bèn mbe tse ghakwénta ndonni netèt benntùn.

³²Bag, bag ke nsoṅ zin à nkùn mebwô ndù nka'ni mi Nsi na' nka' ba tà be là,

³³Nsi ghù a bumte num be bon tshobe, mbam Yésu num vù ndaṅndaṅ mba bo kite ntùm ṅwa'ni Yobkwi mbatte bàa là; O b'a Mén àm, me bwe o sènni.

³⁴Nsi lo bam i num vù ndù k'a bi, a ju z'a num ntshob ndù: M'a' fà tshu nelàn David bin, ts'a b'a kua' tse nenùn nà.

³⁵A ndùlala a bèn ntshob mo' dù' ndù: O ke nsi bam ndù Mén o ze nelàn bi.

³⁶Nummbe David lo be miagte nefa' ze nekô Nsi num ze ngelaṅ, nkwù, bo bèn njab i mbaṅ ba tà tse, a bi.

³⁷Là mèn ze Nsi bam i num vù là lo ke bi.

³⁸Fèt tshàm, bin lèn ndù a tshùa njam i kà bag ntshob bin ndù Nsi lagte nukebwô tsine.

³⁹A tshùa à njam i mèn z'a bam i là b'a mèn netsine, netsin ze ntshù' Mosé na' mbe ke ku'ni nefà bin nà.

⁴⁰Bin bam nà ndù kà nu ze bo na' ntshob ntùm ṅwa'ni ghatshob ntshob Nsi là tshùb zine.

⁴¹Bin ghawag, bin lôte, ntshàme, mbèn nsate, nummbe me nsi fa' mo' fa' ntùm tsin lé'njù, fa' se bin ke' ku'ni nebame, a be ze mèn soṅ zin nà.

⁴²Bo be tume, bo labte yub ndù bo bèn nzi nse' ntshob be tshen nu là bo mbatte lé'njù Sabbat.

⁴³Ngelaṅ mbumte fagte là, tsemo' ba Yuda mba ben tse bo bam nu ba Yuda, nke ngamte Nsi là, tam njam Paulo mba Barnaba; bo à bo tshàm nu, bo tshùa bwe ntagte yub ndù bo ghô ntùm kondèn Nsi.

⁴⁴A be num mbatte lé'njù Sabbat, njoṅ benntùn fa ntùm ngô tse'te num neju' ntshob Nsi.

⁴⁵Là ba Yuda be yen yen bwoṅ benntùn nà, ghe'te dun ntùm ntù tshobe, bo to' nebagte ntshob Paulo, mbèn nke ntshabt'é.

⁴⁶Paulo mba Barnaba tshob bo kua' ndaṅndaṅ ndù: A lo bwô ndù bag bwôgmbwe ntshob ntshob Nsi à bin; là mba bin tshwèt nga ntshob Nsi, nke ndo' wut tsin mba bin ku'ni num yôg matmat là, tshù, ndonni bag tù' nèn tshag tèl à ghakelèn Nsi,

⁴⁷nummbe tshù ju ze Tshùaben na' ntshob bag li: Me lo yab o ndù o be nka' ghakelèn Nsi, mbèn mbe yôg tà nèn nkum num ntôg tsha'a.

⁴⁸Num men ntshob là, ghakelèn Nsi tsiaṅte, ngamte ntshob Tshùaben, mba ben tse Nsi tsho' yub num yôg matmat là bam.

⁴⁹Ntshob Tshùaben sa ntùm njoṅ dù' fa.

⁵⁰Là ba Yuda tènte bènnzwi ndùbndùb tse bo ke ngamte Nsi là mba kamkam ntùm ngô, bo kam ntsha; ntsho' nku Paulo mba Barnaba kebàn, nta' yub ntùm yub bag ngô.

⁵¹Bo bé'te mbab num nku mub num bo, ndo nèn mà Ikônia.

⁵²Mbe se' mba ghazi'te nu Yésu là, tsiaṅte mba Ywèt Nelàn lo dun ntùm ntù tshobe.