Read Medumba Mfa' Ghantum 14 Bible Online

Mfa' Ghantum 14 - Medumba bible

Mfa' Ghantum 14

¹Mà Ikônia, Paulo mba Barnaba bèn ntsho ntùm sinagogue ba Yuda, ntshob nu bwe kà bwoṅ ba Yuda mba ba Grikia ju', mbame.

²Là ba Yuda tse bo be ke bam nu Yésu là, tènte ghakelèn Nsi, ngù ntù tshob ya num fètfèle.

³Bo bèn ntswe Ikônia yàme, nke ntshob ntshob Tshùaben ke bwôg, nummbe a lo ke nkwé nta ntshob kondèn i, nke mfà neta neghù nu nsà mba nu netshàm bo.

⁴Là bwoṅ benntùn ghabte bag bàa ntùm ngô, tsemo' be num ze bag ba Yuda, tsemo' be num ze ghantum.

⁵Ghakelèn Nsi, ba Yuda mba kamkam tshob tum, ndiag neghùtni yube, mbèn ntamte yub ndoṅ.

⁶Paulo mba Barnaba be yen yen nu là, nkù nèn Listra, Dèrbe mà Likaônia mba ntùm dù' ts'a ghebte bwe là;

⁷bo to' netshob nkùn mebwô bwe.

⁸Mo' mèn lo be Listra ndù nku mi be'te, a be kekat fe bam màab ke to' yoṅ nzine.

⁹A lo tswe nsi, nke nju' mba Paulo tshwèt ntshob là. Mbe yen ndù a ghù bamntù z'a ku'ni neyat'é là,

¹⁰ntshob yi nze neta ndù: Lo tù, tsin tù ndaṅndaṅ num nku mu. A tsho' ketshat, nzine.

¹¹Bwoṅ benntùn be yen nu ze Paulo ghù là, ntshob kua' mà neta ntùm ntshob Likaônia ndù: Ba nsi kaṅ ntù' benntùn, nswe' nse' netèt be.

¹²Bo tsiaṅ Barnaba ndù Zeus, ntsiaṅ Paulo ndù Hèrmès, nummbe a b'a yi na' mbèn nke ntshob nu.

¹³Ngale'te Nsi Zeus ze ndà i na' mbe ntshu mbu' ngô là, lo' ba mfô nse' yi mbwe nzendà ndùb ndù bo taṅte nsàmtù num bo, nke ndiag ndù boa bwoṅ benntùn lo' ngamte yub yi.

¹⁴Ghantum, Barnaba mba Paulo be ju' yen nu là, mfagte nzwe tshobe, nkù nde, ntsho netèt benntùn, nkua' neta.

¹⁵Ntshob ndù: Shun tshag, numke bin nke ngù tshen tshu l'à? Mba bag yag b'a benntùn ghayennge' mba bin nà. Bag ke ntshob à nkùn mebwô z'a tshwèt ntshob bin ndù bin ghua' tshen tshu banban nà, nkaṅ ntù tsin, ntam njam Nsi z'a be ntùn nà, yi z'a na' nabte kamànyam, tsha'a, dibantse mba njoṅ tshu fa ts'a be ntùm bwe là.

¹⁶Ntùm zwiaṅ njù ts'a tôg là, Nsi lo faṅ ghakelèn Nsi nke nzin ntùm manze tse ntù tshob kô là,

¹⁷mba ndùlala, a ke be tag ke kwé nta tu wul i ntshùa njam numebwô tse, nke mfà mbaṅ kamànyam mba ndùsàn bin, nke ngù ntù tsin ndun jujù mba tsiaṅte.

¹⁸Bo tshob ndùlala, nto' yub ndù kà bo ghamte yube, là njen nge' yàm neto' yube.

¹⁹Là tsemo' ba Yuda lo Antiôkia mba Ikônia, nse' mbagte tu bwoṅ benntùn, ntamte Paulo ndoṅ, nsoṅ i, ma' njam ngô, nke nkwate ndù a kwù.

²⁰Là mba ghabam Yésu se' ndiaṅ i mbum nà, Paulo lo nsi ntsho ntùm ngô. Njù be làne, bo Barnaba lo, nèn Dèrbe.

²¹Ngelaṅ bo tshob nkùn mebwô ntùm yen ngô li kà benntùn yàm tù' ghazi'te nu Kristô là, bo bèn njam Listra, Ikônia mba Antiôkia,

²²nke mfite ntù benkristô, ntagte yub ndù bo ghô ntùm bamntù, mbèn nke ntshob ndù: Be nsi tshùa à ntùm nge' yàm kà tsho ntùm nufen Nsi.

²³Bo ghù bo tsho' ghakwé mbwe mba netèt zit ntse'te benkristô lo, nde'te Nsi, ntswe nziku'u, ndem yub ntùm mbu Tshùaben ze bo na' mbam i là.

²⁴Bo tshùa mà ngô Pisidia nèn mà Pamfilia.

²⁵Ngelaṅ bo tshob ntshob Nsi Pèrgé là, bo lo, nèn mà Atalia,

²⁶ndo bwe, ntsho kenu nèn Antiôkia dù' ze bo na' mbètte kondèn Nsi num bo kà bo nèn tshwèt fa' se bo fe neghù a bumte là.

²⁷Bo be kume, ntse'te ntse'te benkristô, nto' nesoṅ njoṅ tshu fa tse Nsi ghù bo à bo là, mba mba Nsi gha' nze bamntù ghakelèn Nsi là.

²⁸Bo tswe boa ghazi'te nu Yésu ngelaṅ yàme.