Read Medumba Mfa' Ghantum 16 Bible Online

Mfa' Ghantum 16 - Medumba bible

Mfa' Ghantum 16

¹A nèn nkum Dèrbe mba Listra. Tshù, mo' ngazi'te nu Yésu lo be bwe, lén se Timôtio, mén mo' ngon Yuda z'a bam nu Yésu là, tàab be ze Grikia.

²Fètfèt tse bo be Listra mba Ikônia là lo ke nkwé nta mi kua' mebwô.

³Paulo kô nenèn bo yi, ndo' i, ngù a si ket num ba Yuda tse bo be tshen dù' là là, nummbe njoṅ yub fa lo lèn ndù tàab b'a ze Grikia.

⁴Ntùm njoṅ ngô fa tse bo tshùa bwe là, bo soṅ yub ju ze ghantum mba ghakwé mbwe nabte Yérusalém ndù bo ke nze là.

⁵Ndùlala bamntù njoṅ ntse'te benkristô fa nke nta nèn mbwe, bo nke nkwi'te njoṅ ngelaṅ fa.

⁶Mba Ywèt Nelàn to' yub ndù kà bo tshob ntshob Nsi Asia là, bo tshùa ntùm ngô Frigia Galatia.

⁷Bo be kum mbaṅ Mésia, nkwate nenèn Bitinia, là Ywèt Yésu ke bam bo.

⁸Bo tshùa Mésia ke tsin, nswe' nèn Trôa.

⁹A be tèttswe', Paulo yen mo' njem: Mo' ze Makédônia tsin tù mbwe i, mbu' mbu yi, ntshob ndù: Dut nse' Makédônia, njwimte yage!

¹⁰Be kua' ngelaṅ Paulo yen njem nà, bag diag nenèn Makédônia, nummbe bag lo bam ndù Tshùaben bèn ntsiaṅ yag netshob nkùn mebwô bo.

¹¹Bag tsho kenu Trôa, ntshùb nze ndaṅndaṅ, nèn nkum Samotraké, nkum Néapoli mbatte lé'njù,

¹²ndo bwe, nkum Filipi z'a be mbwe ngô Makédônia, mbèn mbe nte' ba Roma là. Bag tswe tsemo' lé'njù ntùm yen ngô là.

¹³A be lé'njù Sabbat, bag tum ntùm ngô, nèn kaṅ ntse dù' ze bag kwate ndù nele'te Nsi a' be là. Bag tswe nsi ntshobte bag à bènnzwi tse bo na' ntse'te là.

¹⁴Mo' mènnzwi lén se Lidia, nke nju'u; a na' mb'a ngaswèn nzwe meba z'a fe ngô Tiatire là, mbe ngaghamte Nsi. Tshùaben gha' ntù i ndù a ju' ju ze Paulo tshwèt ntshob là kua' mebwô.

¹⁵Ngelaṅ ze bo nyu' i ntse mba tunndà i là, a tsiaṅ yag ntshob ndù: A be ze bin yen ndù me b'a ngabam Tshùaben nà, bin tsho ndà àm ntswe bwe. A bu' mbu bag, mbèn nànte yage.

¹⁶Mo' lé'njù bag nke nèn dù' le'te Nsi, mbumte bag à mo' ngafa' ze mènnzwi z'a ghù ywèt netshaṅ ngàm nà, a lo ke mfà bin yàm ba tàfa' tse njam netshaṅ ngàme.

¹⁷A tam njam bag, nke nkua' ntshob ndù: Tshen ben ni b'a kuan Nsi mfe tù, bo ke nsoṅ zin à nze yôg. A ghù ndùlala lé'njù yàme.

¹⁸Yen nu là ya ntù Paulo, a kaṅ wul i njam ntshob ywèt là ndù: Me tshob wù num lén Yésu Kristô ndù o tum num i. Be ngelaṅ mbile, a tum.

¹⁹Ba tàfa' tse be yen mba bin ze bo ke nywinte bi là, ntshùb Paulo mba Silas, nsoṅ yub nèn yi ntshundà ngomna,

²⁰mbèn ndo' yub nèn mfà ghakeb ntsha, ntshob ndù: Tshen ben nà tshwèt mbagte ngô yage; bo b'a ba Yuda.

²¹Bo tshwèt ntshob matnu ze ntshù' ke' bam ndù bag ba Roma bame, ke bèn nze là.

²²Bwoṅ benntùn tamte nja ntù num bo, ghatsho'te ntsha ghù bo sô nzwe num bo, ntshob bo lab yub nshua'a.

²³Ngelaṅ bo kebte yub nshua' yàm nà, bo ma' yub ndàtsha, ntshob ngabéb ndàtsha ndù a béb yub kua' mebwô.

²⁴Ngabéb ndàtsha ju' ndùlala, ndo' yub ma' tshaṅ ndàtsha, ma' kebu' nku bo.

²⁵A be nguan tshaṅ tèttswe', Paulo mba Silas nke nde'te Nsi, mbèn nke njob kwi ngamt'é yi; ghandàtsha nke nju' mba bo tshwèt njob là.

²⁶Tshù, tsha' nyi'te kua' mà neta, kà tun ba' ndàtsha nke mvètte. Be ndùse, njoṅ nzendà fa gha' nte nge, nkù ntùn tse bo kut ghandàtsha yi là kebte ngwùte nsi.

²⁷Ngabéb ndàtsha bam num miaglo, njen ndù nzendà ndàtsha b'a nge, nsô ṅwi i, nke ndiag nesob wul i yi, nummbe a ke nkwate ndù njoṅ ghandàtsha fa kù.

²⁸Là Paulo kua' neta, ntshob ndù: Kà ghù nukebwô num o, njoṅ yag fa b'a nsen ni.

²⁹Ngabéb ndàtsha bètte nka' nkù nde nèn tshaṅ ndàtsha, ngwù num nku Paulo mba Silas, nke mvètte,

³⁰ngù bo tum, a tshob bo ndù: Tà tshàm, ke z'a bwô ndù me ghù kà njôg à?

³¹Bo tshob ndù: Bam Tshùaben Yésu o nsi yôge, wù mba tunndà o.

³²Bo tshob ntshob Nsi yi mba njoṅ benntùn fa tse bo be ndà i là.

³³Be num yen ngelaṅ nà, tèttswe', ngabéb ndàtsha lo' yub nèn nsôg ntshu mfaṅ num bo. Be ndùse, bo nyu' i ntse mba njoṅ ben tse fa.

³⁴A lo' yub nèn yi ndà i, mfà jujù bo, mbèn ntsiaṅte boa njoṅ tunndà i fa, mb'a bam Nsi là.

³⁵Njù be làne, ghatsho'te ntsha tum ghabéb ntshundà ju ngabéb ndàtsha, ntshob ndù: Kag tshen ben nà.

³⁶Ngabéb ndàtsha tshob men ntshob là Paulo: Ghatsho'te ntsha tum benntùn, ntshob ndù bo kag zine. Ndonni, bin tum nzin fite nène.

³⁷Paulo tshob bo ndù: Bo lo ndab yag nshua' mbwe benntùn ke tsho'te ntsha, mbèn ma' yag ndàtsha, bag tse bag b'a ba Roma là; ndonni bo tshwèt nsô yag nelemte! Nga, a ke b'a ndùlala, a bwô nese' yub tu, nsô yag ntum yi njù.

³⁸Ghabéb ntshundà bèn njam, ntshob men ntshob li ghatsho'te ntsha; bo be ju' ndù bo b'a ba Roma, bwôg tshùb yube.

³⁹Ghatsho'te ntsha se' mfite ntù yube, nsô yube, mbu' mbu bo ndù bo tum ntùm ngô nène.

⁴⁰Ngelaṅ bo tum ndàtsha là, bo nèn ndà Lidia, mbe yen fètfèt, ntagte yube, ndo nène.