Read Medumba Mfa' Ghantum 17 Bible Online

Mfa' Ghantum 17 - Medumba bible

Mfa' Ghantum 17

¹Bo tshùa Amfipoli mba Apôlônia dù' ze sinagogue ba Yuda be là.

²Paulo tsho bwe, mb'a be ze matnu là. Mum lé'njù Sabbat tat, a tshobte bo à bo num tsemo' dù' ṅwa'ni Nsi,

³nke ntote mbèn nke nda'te bo ndù a lo bwô ndù Kristô yen nge', mbèn mbam num vù; yen Kristô là b'a Yésu ze me tshwèt ntshob bin nà.

⁴Tsemo' ben netèt bo tshùa num ntshob Paulo mbame, ntamte num Paulo mba Silas, mba mo' bwoṅ ba Grikia ghaghamte Nsi, mba bènnzwi ndùbndùb yàme.

⁵Là ghe'te ko' ntù ba Yuda, bo tum, ndo' tsemo' bagkèt benntùn ntàne, bo à bo tsiaṅte benntùn, ma' tshu'te ntùm ngô, nèn nkùmte ntshundà Yason, nke ndiag Paulo mba Silas num nesoṅ yub nèn yi mbwe benntùn.

⁶Là, mba bo be ke yen yub là, bo soṅ Yason mba tsemo' fètfèt nèn yi mbwe ghatô ngô, nkua' ntshob ndù: Tshen ben nà tse bo tshwèt mbagte njù là, se' tà nkum mba nsen ni.

⁷Yason lo' yube; njoṅ yub fa tshwèt mbagte ntshù' Kàsà, nke ntshob ndù mo' mfen num bwe, Yésu.

⁸Men ntshob là ma' tshu'tu netèt bwoṅ benntùn mba ghatô ngô.

⁹Bo ghù Yason mba tsemo' yab tshwèt, bo faṅ yub bo nèn.

¹⁰Be tèttswe' mbile, fètfèt ghù Paulo nèn Bèréa; bo kum bwe, nèn ntùm sinagogue ba Yuda.

¹¹Tshen ben ni na' mb'a benntùn ntshùa tse Tésalônikà, nkwé nkùn mebwô njoṅ ngô ntù yub fa, nke nzi'te ṅwa'ni Nsi njoṅ lé'njù fa num nelèn a be z'a b'a nenùn nà.

¹²Benntùn yàm netèt bo bam, mba ba Grikia yàme, bènnzwi ndùbndùb mba bandum.

¹³Là ngelaṅ ba Yuda tse bo be Tésalônikà ju' ndù Paulo tshwèt ntshob ntshob Nsi mba Bèréa là, bo se' bwe nyi'te dù', ma' tshu'tu netèt benntùn.

¹⁴Be ndùse fètfèt lo' Paulo nèn ntshag i mà kaṅ dibantse, là Silas mba Timôtio tù' Bèréa.

¹⁵Ben tse bo nèn te Paulo là, nèn ntshag i tà Atèn. Paulo be miagte netswi nkùn bo ndù Silas mba Timôtio se' ndende ntèl i, bo bèn njam.

¹⁶Paulo z'a ke mbéb shun tse Atèn nà, be yen ndù ngô là dun nsi neto, nja ntù neshu.

¹⁷A nke ntshobte ntùm sinagogue boa ba Yuda mba ghaghamte Nsi, mbèn nke ntshobte njoṅ lé'njù fa boa benntùn num ntàne.

¹⁸Tsemo' ghazi'te zenu Epikurô mba tse Stôa nke nta ntshu boa Paulo; tsemo' nke ntshob ndù: Ke ze yen ngantshob li tshwèt ndiag netshob à? Tsemo' bèn nke ntshob ndù: Mo' ndù a b'a ngatshob tshô tsemo' nsi ba ghùn. Nummbe Paulo lo ke ntshob nkùn mebwô num Yésu mba num nelo num vù.

¹⁹Bo lo' Paulo, bo à bo nèn Aréôpage, bo tshob yi ndù: Be bo soṅ yag tun yen tshô nswe là z'o tshwèt ntswite là ké?

²⁰Nummbe tshô ts'o tshwèt ntshob là be bag à tse ba ghùn, bag tshwèt ndiag nelèn mb'a tshwèt mbagte là.

²¹Njoṅ ba Atèn fa mba ba ghùn tse bo ke ntswe netèt bo là, lo ke njôg à bwe, nke nkô netshobte, mbèn nju' ba tshô nswe.

²²Paulo tsin tù netèt Aréôpage, ntshob ndù: Bin ba Atèn, me yen ndù ntùm njoṅ bag tse fa bin num ngamte Nsi ntshùa tsemo' benntùn.

²³Ngelaṅ me ke ntshùa ntùm ngô zin nà, me lôte dù' le'te Nsi tsine, njen ndù bo kite num mo' tômbwôg neghamte Nsi yi ndù: Num Nsi ze bo ke' lèn i là. Mèn ze bin ke ngamt'é ke lèn i là, a yi ze me tshwèt ntshob bin nà.

²⁴Mèn z'a nabte njù mba njoṅ tshu fa ts'a be ntùm bwe là, mbèn mbe Tshùaben kamànyam mba tsha' là, ke' be tswe ntùm mba' mi mbu benntùn bèn nkut là,

²⁵ke bèn nke mbètte ndù benntùn fa' yi mbu mube, nummbe a ke' be bwoṅ sàm ju, là, a yi ke mfà yôg, zwiag mba njoṅ tshu fa njoṅ benntùn fa.

²⁶A lo ghù njoṅ nzwit benntùn fa tse bo b'a lem ntshù' là tswe num njoṅ nsitsha' fa. A lo yab njoṅ ngu'njù yôg sube, mba ndùngô yube,

²⁷ndù bo ke ndiag Nsi, nkagtùn momt'é, mfon i, yi z'a ke' ne mb'a ngùanesà mba sàm mèn netèt be là.

²⁸Nummbe be à yi ke njôge, nke nzine, mbe ntùn ndaṅndaṅ mba tsemo' ghakite ṅwa'ni njobkwi tsin tshob là ndù: Be b'a nzwil i.

²⁹Mba be b'a nzwit Nsi là, a ke' bwô be bam ndù Nsi be ndaṅndaṅ à mba gol, silba ke loṅ se mènntùn be ndo' zenu i bo ve nabte yi là.

³⁰Là Nsi lagte ngelaṅ femni; ndonni a tshwèt ntshob njoṅ benntùn fa ndù bo kaṅ ntù tshob ntùm njoṅ dù' fa.

³¹Nummbe a yab lé'njù s'a nsi keb ntsha ntùm netsine, njam mèn z'a na' ntsho' i num bwe là. A lo la'te lèn njoṅ benntùn fa mb'a ghù a lo num vù là.

³²Bo be ju' mb'a tshob nu nelo num vù là, tsemo' tshabt'é, tsemo' tshob ndù: Bag a' bèn nju' yen nu là mo' yoṅ i.

³³Ndùlala Paulo tum netèt bo.

³⁴Mba ndùlala, tsemo' benntùn tamte num i, mbame; netèt bo Denis ze Aréôpage, mo' mènnzwi lén se Damaris, mba tsemo' bo à bo.