Read Medumba Mfa' Ghantum 18 Bible Online

Mfa' Ghantum 18 - Medumba bible

Mfa' Ghantum 18

¹Yen nà be tshùa, Paulo lo Atèn nèn mà Korintô.

²A yen mo' mén Yuda bwe, lén se Akila ze bo bwe i mà Pontô là; a yôg nke nese'e, mfe à Italia bo nzwi i Priskila, nummbe Klaudia lo yab ntshù' nta' njoṅ ba Yuda fa mà Roma. A nèn ndà bo.

³Mba bo na' ndèn ta' fa' ntshù' là, Paulo nke ntswe, mbèn nke mfa' bo à bo. Bo na' mb'a ghaba' ntàb nzwe.

⁴A nke ntshob nu ntùm sinagogue njoṅ lé'njù Sabbat fa, ngù ba Yuda mba ba Grikia bam Yésu.

⁵Ngelaṅ Silas mba Timôtio fe Makédônia nse' là, Paulo fà njoṅ wul i fa netshob ntshob Nsi, nke nkwé nta mbwe ba Yuda ndù Yésu b'a Kristô.

⁶Mba bo ke nga, mbèn nke ntshabte là, a tshwètte nzwe tse, ntshob bo ndù: Lem tsin nèn be tu bin! Yàm nu ke bwe, me b'a nelàne; neto' ndonni, m'a' nèn ntèt ghakelèn Nsi.

⁷A lo be nèn ndà mo' ngaghamte Nsi, lén se Titô Yustô ze ba' i na' mbe mbaṅ sinagogue là.

⁸Là Krispô ngalôte sinagogue bam Tshùaben boa njoṅ tunndà i fa; mba tsemo' ba Korintô yàm ju', mbame, bo nyu' yub ntse.

⁹Tshùaben tshob Paulo mo' tèttswe' ntùm njem ndù: Kà bwôg, tshobe, kà mi'. Nummbe bag wù bèn mbe, sàm mèn ke nsi kwag o neghù nukebwô num o,

¹⁰nummbe me ghù ben tshàm ntùm yen ngô li yàme.

¹¹A tswe bwe tamngu' ṅwù ntôge, nke ntswite ntshob Nsi netèt bo.

¹²Là ngelaṅ Galiôn be ngomna Akaya là, ba Yuda be ntshu ntshù', ntsho' ngwù num Paulo, ndo' i nèn yi dù' netsho'te ntsha,

¹³ntshob ndù: Yen mèn ni tshwèt mbagte ntshù', nke ntshagte benntùn ntùm mo' mat neghamte Nsi ze ghua.

¹⁴Ngelaṅ Paulo ke nabte ntshu i tshob nu là, Galiôn tshob ba Yuda ndù: Ba Yuda, a lo mb'a nu num nuketsin ke mo' nukebwô lo, mba me ju' bin mb'a ku'ni là;

¹⁵là mb'a b'a tantshu num nu nezi'te zin nà, num ndèn mba num ntshù' zin nà, yen nà ke ndôt'a bin. Me ke' kô nekeb lèn tshen ntsha là.

¹⁶A ta' yub ndàntsha.

¹⁷Njoṅ benntùn fa tshùb Sôstène ngalôte sinagogue, nto' nelab i mbwe ndàntsha; yen nu là ke ghù mo' ju Galiôn.

¹⁸Paulo bèn ntswe Korintô yàme, mbe mo' lé'njù ndé'te fètfèle, ntsho kenu nèn Siria bo Priskila mba Akila. A lo ghù bo kom tu i Kenkréa, nummbe a lo ghù nka'ni.

¹⁹Bo kum Efésô, a tôg nèn sinagogue, ntshobte boa ba Yuda.

²⁰Bo labt'é ndù bo à bo tswe ngelaṅ yàme, là Paulo ke bam.

²¹A lé'te yub ntshob ndù: M'a' bèn nse' lôte zin mo' yoṅ i, a be ze Nsi bam nà; a tshob ndùlala, ndo Efésô nène.

²²A kum Késaréa, nko' nèn ntsha'te benkristô, nswe' nèn Antiôkia.

²³A tswe bwe bon lé'njù ke nsag, ndo nèn Galatia mba Frigia, nke mfà tànntù njoṅ ghazi'te nu Yésu fa.

²⁴Mo' mén Yuda, lén se Apôlô ze bo bwe i Aléksaṅdria là, lo se' Efésô; a na' mb'a ngafùag ntshu ndù a zi'te, mbèn ndèn ṅwa'ni Nsi kua' mebwô.

²⁵Bo zi't'é manze Tshùaben, a ghù tànntù, nke ntshobe, mbèn nke ntswite nu mfà num Yésu kua' ndaṅndaṅ, mba mb'a na' ndèn kwéntse Yohané là.

²⁶Yen mèn nà to' netshob nu ke bwôg ntùm sinagogue. Priskila mba Akila be ju' i, ndo' i netèt bo, ntet'é manze Tshùaben mb'a ku'ni là.

²⁷Là mb'a ke ndiag nenèn Akaya là, fètfèt kwi'te fènntù i, nkite ghazi'te nu Yésu tse bo bwe là ndù bo lo' i mebwô ngelaṅ z'a kum bwe là, a tshùa num kondèn Nsi, mbe ywimte ndùb ghabam Yésu.

²⁸Nummbe a lo ke mfènte neta ba Yuda mbwe benntùn, nke ntshùa num ṅwa'ni Nsi, nda'te ndù Yésu b'a Kristô.