Read Medumba Mfa' Ghantum 20 Bible Online

Mfa' Ghantum 20 - Medumba bible

Mfa' Ghantum 20

¹Ngelaṅ ze tshu'tu mi là, Paulo tum bo tsiaṅ ghazi'te nu Yésu, a tagte yube, ndé'te yub nèn Makédônia.

²A tshùa ntùm tshen ngô là, ntagte yub njam ntshob yàme, nèn nkum Grikia. A tswe bwe ṅwù tat.

³Ngelaṅ a ke ndiag netsho kenu nèn Siria là, ba Yuda bùn i ywi', ndùlala a yen ndù mebwô b'a nebèn njam ntshùa Makédônia.

⁴Shun zin tse na' mb'a Sôpatèr mén Pirô ze Bèréa, Aristarkô mba Sekundô bon Tésalônikà, Gayô ze Dèrbe mba Timôtio, Tikikô mba Trôfimô bon Asia.

⁵Tshen ni kwé mbwe, mbéb yag Trôa.

⁶Mba bag là, lé'njù Pasa be tshùa, bag tsho kenu Filipi, ntswe num ntse lé'njù tàn kà nkum mbaṅ bo Trôa dù' bag à bo tswe bwe lé'njù sammbàa là.

⁷A be num mbwe lé'njù ntùm ngabnjù, bag tse'te nebe'te bàn, Paulo tshobte bo à bo tà nèn nkum tshaṅ tèttswe', nummbe njù lo ke ndàn a nèn nkebnjù.

⁸Ndambo lo be ntùm to'ndà tù, dù' ze bag tse'te là.

⁹Mo' ménnshum lén se Eutikô, tswe num tôndà, miaglo tshùb i kua' yàme, ngelaṅ Paulo ke nke' ntshobte boa fètfèt là. Miaglo ghùtni i k'a ba' num mbatte laṅ ba' tat ngwù nsi. Bo be bù' i ndù a kwù.

¹⁰Là Paulo swe' nsi, mben wul i num i, nkel i mum mbu mi, ntshob ndù: Kà bin neghùtni wut tsine, nummbe zwiag se ke' ntùm wul i.

¹¹Paulo bèn nko' tù, mbe'te bàn njù, mbèn ntshob ntshob Nsi tà nèn nkum mfôgnjù, ndo nène.

¹²Bo lo' ménnshum nà ntùn, nse' yi. Yen nu là fite ntù benntùn neshu.

¹³Mba bag là, bag tsho kenu, nkwé mbwe nèn Asôs dù' ze bag à Paulo nsi bumte, mb'a na' ntshob bag là. Nummbe tu wul i zin à nku.

¹⁴Ngelaṅ z'a kote yag Asôs là, bag lo' i ntùm kenu, nèn bag à bo mà Mitiléné.

¹⁵Bag lo bwe, nkum mbaṅ Kiôs nkebnjù, ntshùa mbaṅ Samôs mbatte lé'njù, ntsin Trôgilion, nkum Milét ntum kenu bwe mbatte lé'njù tat.

¹⁶Paulo lo yen ndù a ke' bwô netsin Efésô, nummbe a lo ke kô nebagte ngelaṅ Asia. A lo ke nànte nebe Yérusalém ntùm lé'njù Pentekôte, a be ze ngelaṅ bam nà.

¹⁷Mà Milét, Paulo tum bo nèn ntsiaṅ ghakwé mbwe netèt ntse'te benkristô.

¹⁸Ngelaṅ bo se' nkum mbaṅ i là, a tshob bo ndù: Bin lèn mat mba me na' mbe netèt bin njoṅ ngelaṅ fa, fe num mbwe lé'njù ze me na' nkum ntùm ngô Asia là,

¹⁹me lo ke mfa' Tshùaben ntùm nefà wut nsi, ntùm ntsenyà mba ntùm nge' tse ba Yuda ke mbùn àm yi là.

²⁰Me lo ke to' bènte njam num tshu ts'a ku'ni neywimte zin nà; me lo ke ntshobe, mbèn nke ntswite zin ntshob Nsi mbwe benntùn mba ntùm ndà.

²¹Me lo ke nkwé nta mbwe ba Yuda mba ba Grikia ndù bo kaṅ ntù tshobe, mbèn njam ntèt Nsi, mbèn mbam Tshùaben be Yésu Kristô.

²²Tshù, ndonni me b'a mbu mvèt bu Ywèt Nelàne, nke nèn Yérusalém ke lèn ju z'a nsi tsho ghù àm bwe là,

²³là me lèn ndù ntùm njoṅ dù' fa Ywèt Nelàn be nkwé nta, ntshob me ndù mvèt mba nge' num mbwe àm, nke mbéb àm.

²⁴Là yôg sàm ke b'a ju tanjoṅ num miag màm k'a ke nda' ndù me miagte nde mi me tshwèt nkù là, mbèn ngù ndù fa' se me na' nkwé Tshùaben Yésu là bumte; yen nà b'a ndù nekwé nta mfà num nkùn mebwô kondèn Nsi.

²⁵Tshù, ndonni me lèn ndù bin ke nsi bèn yen se àm, njoṅ zin fa tse me na' ntswe netèt bin, nke ntshob nufen Nsi là.

²⁶Ndùlala me tshob bin mbèn ndo' zin mba ghakwénta là sènni ndù me b'a nelàn num lem njoṅ zin fa.

²⁷Me lo ke to' bènte njam num nebe ke soṅ zin nekô Nsi fa.

²⁸Bin lôte tu wut tsin mba bwoṅ njùmbwe ze Ywèt Nelàn yab zin ghalôte netèt bwe num nebéb ntse'te ben Nsi z'a na' ndo' à be kua' lem tse ntse'te yi là.

²⁹Me lèn ndù ngelaṅ me nsi nèn nà, ba tshùagkèt ngwayit nsi se' mbaṅ bin, mbagte bwoṅ njùmbwe;

³⁰netèt bin benntùn nsi lo bwe, tshob ba nu tatte num nesoṅte ghazi'te nu Yésu yi, mfà njam bo.

³¹Bin zi tshùalo, nke nkwimte ndù ntùm ngu'njù tat, tèttswe' mba mbwôgtshù, me lo ke fite netagte mba we lo netèt bin, ntùm ntsenyà.

³²Ndonni me lem zin Tshùaben mba ntshob kondèn i z'a ku'ni nekut mbèn mfà ntsi' netèt njoṅ ben fa tse Nsi lànte yub là.

³³Me lo ke ghe'te silba ke gol ke nzwe sàm mèn no.

³⁴Tu wut tsin lèn ndù mbu màm lo ke mfà tshu ts'a bwoṅ me là, mba ben tse bag à bo na' mbe là.

³⁵Num njoṅ i fa, me lo ke ntswite ben nebole, nke nkwimte ntshob Tshùaben Yésu, nummbe tu wul i lo tshob ndù: Fen num ntùm nefà ntshùa nekwé.

³⁶A be miagte netshob yen nu li bo, nte nkekwi' mi nsi, nde'te Nsi boa njoṅ yub fa,

³⁷njoṅ yub fa fètte ntsenyà, ntsho' ngwù num tô Paulo, ntat'é,

³⁸nke nywin neshu mb'a tshob ndù bo ke nsi bèn yen se i là. Bo nèn nte i ntùm kenu.