Read Medumba Mfa' Ghantum 21 Bible Online

Mfa' Ghantum 21 - Medumba bible

Mfa' Ghantum 21

¹Ngelaṅ bag fiag wut yag num bo là, bag tsho kenu, nèn ndaṅndaṅ nkum Kôs. A be mbatte lé'njù bag kum Rôdôs, ndo bwe nèn Patara,

²nkum bwe, njen mo' kenu a nke nèn Fénikia, bag tsho bwe nène.

³Bag tshùa mbwe Kiprô, mfaṅ i bag bu kwéb, nèn ndaṅndaṅ Siria, nkum Tiro. A b'a dù' ze kenu ke nse' yab tshu kà nèn nà.

⁴Ngelaṅ bag fon tsemo' ghazi'te nu Yésu là, bag tswe bag à bo lé'njù sammbàa. Ywèt Nelàn tènte tshen nà, bo nke ntshob Paulo ndù k'a ko' nèn Yérusalém.

⁵Tshag lé'njù be mi netèt bo, bag tam manze nenène. Njoṅ yub fa nèn boa bènnzwi mba bônke', ntum ntùm ngô kà nte yage. Bag kum kaṅ ntse, nte nkekwi' mag nsi, nde'te Nsi bag à bo,

⁶ndé'te bag à bo, ntsho ntùm kenu, bo bèn njam la' bo.

⁷Bag be miagte nedut ntse nelo Tiro nkum Ptôlémais, nèn ntsha'te fètfèle, ntswe bag à bo ta' lé'njù.

⁸Njù làn, bag lo bwe, nèn Késaréa, ntsho ndà Filibo ngasa nkùn mebwô, mo' mèn netèt tse sammbàa, bag tswe ndà i.

⁹A lo ghù ngonngon kuà tse bo ke ntshob ntshob ghatshob ntshob Nsi là.

¹⁰Bag be tswe bwe lé'njù yàme, mo' ngatshob ntshob Nsi, lén se Agabô fe Yudéa nse'e.

¹¹Ngelaṅ a kum mbaṅ bag là, a lo' kob Paulo nkut nku mi yi, ntshob ndù: Tshù ju ze Ywèt Nelàn tshob li: Mèn ze sen kob li be se là, ba Yuda nsi kul i be ndaṅndaṅ Yérusalém, fà i mbu ghakelèn Nsi.

¹²Ngelaṅ bag ju' men ntshob là là, bag, mba ba yen dù' là tagte Paulo ndù k'a ko' nèn Yérusalém.

¹³Là Paulo bùnte ndù: Ke z'a ghù bin nke nkua'a, mbèn nke mbagte ntù àm à? Nummbe me b'a nze, ke b'a nda' netsho ntùm mvèt, là nekwù Yérusalém num lén Tshùaben Yésu.

¹⁴Mba bag na' mbe ke ku' nefènt'é là, bag mi ntswe, ntù' tshob be nda' ndù: A bwô ndù ze nekô Tshùaben bumte.

¹⁵Tshen lé'njù là lo be tôge, bag nabte bon tshu tshage, nko' nèn Yérusalém.

¹⁶Tsemo' ghazi'te nu Yésu lo Késaréa nèn ntshag yag ndà Mnason ze Kiprô, dù' ze bag ke ntswe là. A na' mb'a ngazi'te nu Yésu.

¹⁷Bag kum Yérusalém, fètfèt lo' yag ntùm tsiaṅte.

¹⁸Njù làn, Paulo nèn ju Yakobo bag à bo, dù' ze njoṅ ghakwé mbwe fa na' ntse'te là.

¹⁹Paulo tsha'te yube, nto' nesoṅ yub ntshù' ntshù', njoṅ nu fa tse Nsi na' ngù njam fa' se netèt ghakelèn Nsi là.

²⁰Bo be ju' ndùlala, ngamte Nsi, ntshob yi ndù: Mfèt yag, o yen mba ba Yuda ntsha'ntsha' bam nu Yésu là; là njoṅ yub fa num nkô ntshù' Mosé,

²¹là bo lo ju' num o ndù o tshwèt ntswite ndù ba Yuda tse bo netèt ghakelèn Nsi là gha Mosé, nke ntshob ndù kà bo bèn nesi ket bon tshobe, mba ndù kà bo nezin ntùm mat ngô.

²²Kà be a' ghù à ndùke? Kà ke tag, bo nsi ju' ndù o se'e.

²³Num ndùlala ghù ju ze bag nsi tshob wù là: Ben kuà num netèt bag tse bo ghù nka'ni là.

²⁴Lo' yub bin à bo nèn ndànte wut tsine, o bèn mfà njoṅ tshu fa num yub tu, mba ntshù' num mbètte là ndù bo kom tu yube. Ndùlala njoṅ benntùn fa nsi lèn ndù nu tse bo ke nju' num o là ke b'a nenùne, mbèn ndèn ndù mba wù num mbe zin nke nze ntshù'.

²⁵Là mba ghakelèn Nsi tse bo na' mbam Yésu là, bag lo tum ṅwa'ni, ntshob ndù bo gha tshu tse bo ghamte nsi neto yi là, nenu lem, nefèt mbàb nyàm ze bo ke' wat nsô lem tse là, mba nekale.

²⁶Njù làn, Paulo lo' tshen ben nà, mbe miagte nelànte wut bo à bo, ntsho Ndà Nsi, ntshob ndù ngelaṅ nka'ni à bumte k'a tù' à mba mba we lo fà ze ju nele'te Nsi là.

²⁷Mba lé'njù sammbàa ke nèn nemi là, ba Yuda tse bo fe Asia là yen Paulo ntùm Ndà Nsi, nkag tshu'tu netèt bwoṅ benntùn, ntshùb Paulo,

²⁸nkua' ntshob ndù: Ba Israél, bin ywimte yage! Yen mèn ni b'a mèn z'a tshwèt ntswite njoṅ benntùn fa ntùm njoṅ dù' fa nu z'a tshwèt mbagte ngô, ntshù' mba yen dù' li là; a lo' mba ba Grikia ntsho yi ntùm Ndà Nsi, mbagte yen dù' nelàn ni.

²⁹Nummbe bo lo yen Trôfimô ze Efésô bo yi ntùm ngô, nke nkwate ndù Paulo lo' i ntsho yi ntùm Ndà Nsi.

³⁰Dù' nyi'te ntùm ngô, benntùn kù nde mfe bag bag, ntshùb Paulo, nsoṅ i ntum yi ntùm Ndà Nsi. Bo ghab nzendà ntam tu be ndende.

³¹Mba bo ke ndiag nezwi i là, yen tshô là nèn nkum mbwe mfen ba soyé ndù njoṅ Yérusalém fa tshwèt ntshu'te.

³²Be ndùse, a lo' ba soyé mba ba tà ba soyé, nkù nde bo à bo nèn bwe. Ngelaṅ benntùn yen mfen ba soyé là, bo tsin nelab Paulo.

³³Mfen ba soyé kù'te nèn mbaṅ Paulo, ntshùb i, ntshob bo kul i nkù tùn bàa. A bètte Paulo ndù: O b'a we, ke z'o ghù à?

³⁴Netèt bwoṅ benntùn tsemo' nke nkua' ntshob yen ni, tsemo' bèn nke nkua' ntshob yen nà. Là, a ke ku'ni nelèn nunenùn ntùm tshu'te, ntshob ba soyé lo' Paulo nèn yi ndà ba soyé.

³⁵Ngelaṅ a kum num tuko' ba' là, ba soyé kel i à nekele,

³⁶nummbe bwoṅ benntùn lo ke ntèn yube, nke mbwe yube, nke nkua' ntshob ndù: Zwi i!

³⁷Ngelaṅ bo ke nèn netsho ndà ba soyé là, Paulo tshob mfen ba soyé ndù: Be o bam me tshob nu wù ké? Mfen ba soyé bùnte ndù: O lèn ntshob Grikia ké?

³⁸O ke b'a ze Egipto yen nà z'a be ntùm lé'njù ts'a tôg là nkag tshu'tu, ndo' ghazwite benntùn ntsha' kuà, nèn yi kônkwa là ké?

³⁹Là Paulo tshob ndù: Me b'a mén Yuda ze Tarsô mà Kilikia, mèn ngô ze lén se ke' b'a nelemte là. Me le't'o, bam me ndù me tshob nu benntùn.

⁴⁰Ngelaṅ a bam yi là, Paulo tsin tu tuko' ba', ma'te bu benntùn bo tswe ke netshobte, a tshob nu bo ntùm ntshob Héber, ntshob ndù: