Read Medumba Mfa' Ghantum 24 Bible Online

Mfa' Ghantum 24 - Medumba bible

Mfa' Ghantum 24

¹Lé'njù tàn lo be tôge, ngale'te Nsi ze ndùb Anania swe' nèn Késaréa boa tsemo' ghakwé mbwe mba mo' lôya, lén se Tèrtulô, mbote Paulo mbwe ngomna.

²A ghù bo tsiaṅ Paulo. Tèrtulô to' netete tun njoṅ nu fa num Paulo ntshob ndù: Félix ze tanjoṅ, bag ke ntswe fite à njam o; ntùm yu neta, yen ngô li ghù tshu mebwô.

³Njoṅ dù' fa, ntùm njoṅ ngelaṅ fa, bag num mbame, mbèn nke ndabt'o num njoṅ numebwô fa.

⁴Me ke' kô neghùtni o yàme, là me labt'o ndù o na' nju' yag metsili ntùm bwôntù o.

⁵Bag yen yen mèn ni a b'a mo' ngokèt z'a tshwèt nkag tshu'tu netèt njoṅ ba Yuda fa ntùm njù fa là; a bèn mbe ngalo' mbwe num nu ba Nazarèt;

⁶a lo diag nenaṅ tuswe Ndà Nsi kà bag ngom i. [Bag lo ke ndiag netsho't'é mb'a be ntùm ntshù' yag là,

⁷là Lisia mfen ba soyé sa' i neta ntùm mbu mage,

⁸ntshob ndù ghabot'é lo' ntsha nse' yi mbwe o.] Mba tu wul o ghù nebe bètt'é nu, ntshùa num mbùnte nu mi ndèn nenùn yag nebot'é.

⁹Ba Yuda kwét'é, mbam ndù a b'a nenùne.

¹⁰Là Paulo ze ngomna ghù lèn yi ndù a tshob nu là, bùnte ndù: Me lèn ndù o bèn mbe ngakeb ntsha yen ngô li fe ngu'njù yàme, ndùlala me ghù nekwé nta wul àm ke bwôg.

¹¹Tu wul o ghù nebètte, njen ndù a ke' tôg lé'njù ntshob bàa gham mba me na' nko' nèn Yérusalém neghamte Nsi là.

¹²Bo ke' to' yen bag mèn nke nsoṅte ntshobe, ke bèn njen me kag tshu'tu netèt bwoṅ benntùn, ke ntùm Ndà Nsi ke ntùm sinagogue ke mba ntùm ngô lo.

¹³Bo ke' ku'ni nela'te nenùn nu ze bo tshwèt mbot'àm bwe là.

¹⁴Me tshob yen nu li wù ndù: Me ke mfa' à Nsi ba tà tshàm num nu Yésu ze bo tshwèt ntshob ndù a b'a nu ba Nazarèt là; me ke mbam à njoṅ nu fa tse bo kite ntùm ntshù' mba ntùm ṅwa'ni Nsi là.

¹⁵Ndaṅndaṅ mba bo là, me num nywinte num Nsi ndù nelo num vù ben netsine, mba tse ketsin nsi be.

¹⁶Ndùlala me num nkagtùn njoṅ ngelaṅ fa neghù à be ntù z'a ke' fàn nu mbwe Nsi mba mbwe benntùn nà.

¹⁷Fe ngu'njù yàm me lo ke be ntùm ngô, ndonni me bèn njam nefà tshu neywimte ghayennge' yi ngô àm, mba tshu nele'te Nsi.

¹⁸Ngelaṅ me fà tshen tshu li, mbe ndù m'a lànte wut là, bo yen àm Ndà Nsi, me ke tse'te benntùn ke bèn nkag tshu'te.

¹⁹Tsemo' ba Yuda tse bo fe Asia là yen àm ntùm Ndà Nsi; a lo mbe mebwô ndù bo bèn nse' mbot'àm mbwe o, ke bag à bo ghù mo' nu lo.

²⁰Tshen ben ni nsen ni tshob nukebwô ze bo yen me fàn, ngelaṅ me na' mbe netèt ntse'te ghatsho'te ntsha là.

²¹Mo' ndù mb'a b'a nda' men ntshob li me na' ntshob netèt bo ndù: A num nu nelo num vù ze bin tshwèt ntsho't'àm sènni là.

²²Félix z'a na' ndèn nu kua' mebwô mfà num nu Yésu là, lé' ntsha, ntshob ndù: Ngelaṅ Lisia mfen ba soyé nsi se' là kà me ndôte zin ntsha.

²³A tshob tà ba soyé ndù a lo' Paulo ndé' ndàtsha, là ke ghùtni ke bèn nto' tse ben ndù kà bo se' ndôt'é.

²⁴Tsemo' lé'njù lo be tshùa, Félix mba nzwi i Drusila, ngon Yuda se', ntum bo nèn ntsiaṅ Paulo num neju' mba Paulo tshob nu mfà num bamntù num Kristô Yésu là.

²⁵Là mba Paulo ke ntshob nu num nunetsine, num nu nebe mèn, mba num netsho'te ntsha z'a nsi se' là, Félix bwôg, ntshob yi ndù: Ndonni nène, m'a' bèn ntsiaṅ o ngelaṅ me fon lé'njù là.

²⁶A lo ke nywinte ndù Paulo a' fà nkàb yi; a ndùlala bèn ngù k'a nke ntsiaṅ i netshobte bo yi njoṅ ngelaṅ fa.

²⁷Ngu'njù bàa lo be tshùa, Pôrkiô Fèstô jù ndà Félix, là Félix faṅ Paulo ndàtsha, nummbe a lo ke ndiag nebe mèn mebwô mbwe ba Yuda.