Read Medumba Mfa' Ghantum 26 Bible Online

Mfa' Ghantum 26 - Medumba bible

Mfa' Ghantum 26

¹Agriba tshob Paulo ndù: Bo bam ndù o tshob nu num tu wul o. Ndùlala Paulo nyit bu i, ntshob ndù:

²Mfen Agriba, me yen ndù me b'a mènfen nekwé nta wut màm mbwe o num njoṅ nu fa tse ba Yuda bot'àm bwe là.

³Mebwô b'a ndù o lèn njoṅ mat ngô fa mba tantshu fa ts'a be mbe netèt ba Yuda là. A ndùlala me le't'o ndù o ju' àm ntùm nefènte.

⁴Yàm mat neyôg fe ménnshum, ndaṅndaṅ mb'a na' mbe fe neto'te ntùm ngô àm Yérusalém nà, njoṅ ba Yuda fa lène.

⁵Mba bo lèn àm fe mbwe là, bo ku'ni nekwé nta, a be ze bo kô là ndù me lo yôg netèt bo ntùm bag nu ba Férésia z'a b'a bag nu ndaṅndaṅ ntùm nu neghamte Nsi yag là.

⁶Ndonni bo ke ntsho't'àm à num nu nenywinte nka'ni mi Nsi na' nka' ba tà tshag là;

⁷tunndà tshag tse ntshob bàa gham num mfa' Nsi tèttswe' mba mbwôgtshù ke bot, nke mbéb nebumte yen nka'ni là. A b'a num nu yen nenywinte là ze ba Yuda tshwèt mbot'àm nà, me mfen Agriba.

⁸Numke netèt bin, be bin ke bam ndù be Nsi bam fe ben num vù à?

⁹Mba tu wul àm lo kwate ndù a bwô neghù nukebwô yàm num lén Yésu ze Nazarèt.

¹⁰Me lo ne ngù Yérusalém: Ntùm ngù' ze me kwé ghale'te Nsi tse ndùbndùb là, me lo ma' ben yàm netèt ben nelàn ndàtsha; ngelaṅ bo bèn nke nzwite tsemo' là, bag à bo be ntshu ntshù'.

¹¹Yoṅ yàme, ntùm ba sinagogue, me lo ke ngùtni yube, mbèn nke nànte yub ndù bo tshabte lén Yésu; ntùm tshùagkèt ntù àm, me lo tsho' nku mub kebàn tà nèn nkum mba ntùm ngô ba tum.

¹²Be num tshen nu là, me nke nèn Damas ndù me kwé ngù' mba neta ghale'te Nsi tse ndùbndùb.

¹³Num manze, me mfen Agriba, a na' mb'a nka mbwôgtshù, me yen mo' nka' swe' mfe kamànyam, nké' ntshùa nkônyam, nse' ndiaṅ àm mba shun zin tshàm mbume.

¹⁴Mba njoṅ yag fa vù nsi là, me ju' mo' nze a nke ntshob me ntshob ba Héber ndù: Saulo, Saulo, numk'o nke ntsho' nku màm kebàn à? Ko' ghom o, netum ke bwe.

¹⁵Me bùnte ndù: Tshùaben, o b'a we? Tshùaben tshob ndù: Me b'a Yésu z'o num ntsho' nku mi kebàn nà.

¹⁶Là lo tù, tsin num nku mu; tshù ju z'a ghù me ṅwag wù li: Me tsho' o ngafa' àm mba ngakwénta màm num nu ts'o lo neyene, mba tse me nsi bèn ṅwag wù bwe là.

¹⁷Me kwé o yen ngô li mba ghakelèn Nsi tse me tshwèt ntum o netèt bo,

¹⁸negha' miag mub ndù bo kaṅ ntù tshob ntum ntùm njam nse' ntùm nelàne, ntum ntùm neta Satan, ntam njam Nsi, mbam àm, nkwé nelagte nukebwô tshob mbèn nkwé ntsi' netèt ben tse Nsi lànte yub là.

¹⁹Ndùlala, mfen Agriba, me ke' ku'ni neta tu njem z'a swe' kamànyam nà,

²⁰là neto'te num tse bo be Damas là nèn nkum Yérusalém, ntùm njoṅ ngô Yuda fa mba netèt ghakelèn Nsi, me lo ke ntshob ndù bo kaṅ ntù tshob ntam njam Nsi, mbèn nke mfa' mfa' mi a ku'ni num nekaṅ ntù là.

²¹A b'a num tshen tshu li tse ba Yuda na' ntshùb àm Ndà Nsi, nke ndiag nezwi àm nà.

²²Là Nsi se' me ntùm ywimte, nkwé àm; me tshwèt nke' njôg tà nkum sènni, nke nkwé nta mbwe bônke' mba dùbdùb, ntshob be nu tshen nà tse ghatshob ntshob Nsi mba Mosé na' ntshob ndù a' bumte là.

²³Yen nà b'a ndù: Kristô nsi yen nge', bèn be mbwe mèn nelo num vù, tshob nu nka' yen ngô li mba ghakelèn Nsi.

²⁴Mb'a ke nke' nkwé nta wut mi là, Fèstô tshob kua' neta ndù: Paulo, o b'a mbabune! Zenu o ze ndùb bagte tu o.

²⁵Paulo tshob ndù: Fèstô ze tanjoṅ, me ke' b'a mbabune, là me ke ntshob à ntshob nenùne, mba mi zenu.

²⁶Nummbe mfen lèn tshen nu li kua' mebwô, yi ze me tshob ntshob yi ke bwôg là; me lèn kua' nenùn ndù mfen ke' b'a ngùn num tshen nu là, nummbe tshen nu là lo ke tôg à ntùm dù' nelemte.

²⁷Mfen Agriba, o bam ghatshob ntshob Nsi ké? Me lèn ndù o num mbame.

²⁸Agriba tshob Paulo ndù: A tù' mén nda'nda' o ghù me tù' mènkristô.

²⁹Là Paulo bùnte ndù: Ke mén nda'nda' ke yàm no, me num nde'te Nsi, ke b'a nda' wù tù' o, là njoṅ benntùn fa tse bo tshwèt nju' àm sènni là, bin tù' zin mba me là, kà ntag nda' netsho ntùm nkù.

³⁰Mfen lo tù bo ngomna, Bèrèniké mba ben tse bo tswe mbaṅ bo là.

³¹Bo sô wut tshob mbèn njam, ntshobte netèt bo, ntshob ndù: Yen mèn ni ke' ghù sàm ju z'a ku'ni neghù bo zwi i ke nema' i tsha là lo.

³²Agriba tshob Fèstô ndù: Yen mèn ni na' mbe ke tsiaṅ Kàsà num ze ntsha, mb'a lo mbwô nekag i.