Read Medumba Mfa' Ghantum 27 Bible Online

Mfa' Ghantum 27 - Medumba bible

Mfa' Ghantum 27

¹Ngelaṅ bo nabte ndù bag tsho sitima nèn Italia là, bo fà Paulo mba tsemo' ghandàtsha mo' tà ba soyé, lén se Yuliô; a na' mb'a num ntshu ntsho Kàsà.

²Ngelaṅ bag ko' ntùm sitima ba Adramatia s'a ke nèn nze kaṅ ntse Asia là, bag nèn, bag à Aristarkô ze Tésalônikà mà Màkédônia.

³A be mbatte lé'njù, bag kum Sidon. Yuliô lo' Paulo mba mènntùn nà, mbam a nèn ndôte shun tse ndù bo ywimt'é.

⁴Bag lo bwe ntshùb nze nenèn kaṅ ntse Kiprô, nummbe fetmbaṅ na' nke ntum à mbwe bag.

⁵Ngelaṅ bag dut dibantse z'a be mbwe Kilikia mba Pamfilia là, bag kum ngô Mira mà Likia.

⁶Tà ba soyé yen sitima ba Aléksaṅdria bwe, a nke nèn Italia. A ghù bag tsho ntùm bwe.

⁷Bag zin be nda'nda' ntùm nge' lé'njù yàme, nèn nkum mfe tu Knidô, fetmbaṅ ke bèn nebam bag zin ndaṅndaṅ, bag tù' tshùa tun Krèta, ngô tètntse mbaṅ Salmône,

⁸ndo' à be nge' yàm kà nkum yi num mo' dù' ze bo ke ntsiaṅ ndù ntshuntse mebwô, mbaṅ ngô Lasaya là.

⁹Mb'a na' ntshùa ngelaṅ yàm fe mba bag be num ntse, nelo' sitima nzin yi nke nta nèn be mbwe, nummbe ngelaṅ netswe nziku' lo à tôg là, Paulo tagte yub,

¹⁰ntshob ndù: Benntùn, me yen ndù nelo' sitima nèn yi mbwe nsi tôg à ntùm fetmbaṅ ndùb, be be miagte, ngù bi yàme, ke b'a nda' num tshu mba sitima, là mba benntùn.

¹¹Là tà ba soyé ju' ntshu ghatshagte sitima mba ngasitima ntshùa neju' ju ze Paulo ke ntshob là.

¹²Mba yen ntshuntse là na' mbe ke bwô netswe bwe ngelaṅ ndùsàn nà, benntùn yàm be ntshu ntshù' nelo bwe nèn Fénix, mo' ntshuntse Krèta z'a be nze bag mbinyam nà, nejù sàn bwe.

¹³Là mo' fetmbaṅ fe nze mà ntèn, ntshu'te mén nda'nda', bo kwate ndù a bwô bo nèn mbwe. Bo kiag sitima ndo ndiaṅte kaṅ ntse mbaṅ Krèta, ngô tètntse.

¹⁴Là, a be ghubte, mo' fetmbaṅ ndùb bo ke ntsiaṅ i ndù Eurakilôn nà tum ntùm ngô, ngwù num ntse,

¹⁵ntèn sitima nkel i nke nèn yi kà bag ke bèn nku'ni neghù sàm ju, bag tù' faṅ tshag sitima nèn dù' ze fetmbaṅ kô là.

¹⁶Ngelaṅ bag ke ntshùa tun Klaudia mo' metsit ngô tètntse là, bag yen nge' neshu kà ntshùb metsit sitima num nete i ntùm se ndùb.

¹⁷Ngelaṅ bo miagte nete i ntùm bwe là, bo lo' tshu ywimte, nkut sitima ndiaṅ mbume; mba bo ke mbwôg nenèn ntsham num Siria là, bo kôg nzwe sitima, mfaṅ sitima nke nèn mb'a kô là.

¹⁸Njù be làne, fetmbaṅ nke nta nèn be mbwe, bo ghua' tshu ntàn ntùm ntse.

¹⁹A be mbatte lé'njù tat, bo ghua' tshu sitima ntùm ntse mbu mube.

²⁰Ntùm lé'njù yàme, lagnyam mba nsa ke be, fetmbaṅ nke nta nèn be mbwe yàme, kà njoṅ nenywinte yôg fa mi num bag.

²¹Mb'a na' ntswe yàm sàm mèn ke jù ju là, Paulo lo tù netèt bo, ntshob ndù: Bin na' mb'a kà nju' ntshu àm, be ke lo Krèta, mba bin ke' bi tshen tshu li mba neyen yen ngùtni là.

²²Ndonni me tshwèt ntagte zin ndù bin fèn ntù: Sàm mèn netèt bin ke bi, nda' sitima bèn bi.

²³Yen tèttswe' li, Angél Nsi z'a ghù àm, ze me ke mfa' yi là ṅwag me,

²⁴ntshob ndù: Paulo, kà bwôg! A bwô ndù o tsin mbwe Kàsà; tshù, kondèn Nsi fà ben tse bin à bo be là wù.

²⁵Bin tshùb fènntù zine, nummbe me yab ntù àm num Nsi ndù nu z'a lo netshob me là nsi bumte.

²⁶Là, a bwô ndù sitima kum num mo' ngô tètntse, ntsin num nkwa.

²⁷Mbatte tèttswe' ntshob kuà gham lo be se'e, mba bag be num dibantse Adria, a nke ndo' yag nèn yi bag bag là, num nguan tshaṅ tèttswe', ghafa' ntùm sitima kwate ndù bo tshwèt ngebte num tsha'a,

²⁸bo so nta'tù ntse nezwi'te mfi' ntse yi, njen a be ma' ṅam mbàa; ngelaṅ bo bèn nèn mbwe mén nda'nda' là, bo bèn nso, njen ma' ntshob tàn gham.

²⁹Mba bo ke mbwôg nenèn ntsham num loṅ nà, bo lo' hanga nkuà, ma' ntùm ntse, njam sitima, nke nde'te Nsi ndù njù làne.

³⁰Là ghafa' ntùm sitima ma' num ntse, ndo' latnta yi ndù bo nèn ma' à hanga ntùm ntse mbwe sitima.

³¹Paulo tshob tà ba soyé ndù: A be ze tshen ben ni ke' tswe ntùm sitima là, mba bin ke nsi yôge.

³²Ndùlala ba soyé keb nkù metsit sitima, mfaṅ a vù ntse.

³³Bo be béb njù làne, Paulo nke ntagte benntùn ndù bo jù ju, ntshob ndù: A b'a mbatte lé'njù ntshob kuà gham ni mba bin tswe, nke mbéb ke jù sàm ju là.

³⁴A ndùlala me tagte zin ndù bin jù ju, nummbe a' ywimte zin num yôg sine; mba ntàn nyiaṅtu sàm mèn netèt bin ke nsi bi.

³⁵Ngelaṅ z'a tshob ndùlala là, a lo' bàn, nde'te Nsi mbwe njoṅ benntùn fa, mbe'te nto' nejù.

³⁶Njoṅ yub fa fèn ntù, njù yub jujù mba Paulo là.

³⁷Tshù, Bag na' mb'a benntùn ntshob ntôg bon sammbàa nkù bàa ntùm sitima.

³⁸Ngelaṅ bo ywèt là, bo sô nsa ma' ntùm ntse num neghù sitima fùage.

³⁹Ngelaṅ njù làn nà, bo yen tsha'a, là ke lèn dù' ze bo be là; bo yen nda' mo' kaṅ ntse ndù nkwa be bwe, bo kwate ndù a bwô netèn sitima nèn nkum yi num nkwa, a be ze bo ku'ni là.

⁴⁰Bo kebte nkù hanga nkag ntùm dibantse, nkiagte nkù sitia, mbù' nzwe sitima, ntam nze nèn ndaṅndaṅ kaṅ ntse.

⁴¹Là bo nèn ngwù num mo' kam tsha' ze ntse ke ntshùa bwe bag bàa là, ntsham sitima, tu i tsin num tsha' ke bèn nenyi'te, tun i tù' njam, fetntse nke nshùm i, mbe't'é mfémfé.

⁴²Ba soyé nke ndiag nezwite ghandàtsha, mbwôg ndù kà bo vù ntse, nda ntse nkù.

⁴³Là tà ba soyé be diag mb'a yôg Paulo là, nga nkwatenu mube, ntshob ndù ben tse bo ku'ni là vù ntse, nda ntse, nèn num tsha'a.

⁴⁴A bèn ntshob tsemo' ndù bo tshùb mbag tù mi a be'te num sitima là. Ndùlala njoṅ benntùn fa nèn kà ntum num tsha' ntùn.