Read Medumba Mfa' Ghantum 3 Bible Online

Mfa' Ghantum 3 - Medumba bible

Mfa' Ghantum 3

¹Pétro mba Yohané ko' nèn Ndà Nsi nyam bwe'e nele'te Nsi.

²Mo' mèn z'a na' mbe kekat fe bam màab là lo be bwe, bo lo ke nkel i njoṅ lé'njù fa, njab nzendà Ndà Nsi, bo ke ntsiaṅ i mbwô nzendà là, ndù a lon tshu benntùn tse bo ke ntsho Ndà Nsi là.

³A be yen Pétro mba Yohané mba bo tshwèt tsho Ndà Nsi là, ndon yub ju.

⁴Pétro mba Yohané te miag num i, ntshob yi ndù: Lôte yage!

⁵Kekat te miag num bo kua' mebwô, nke mbéb ndù bo nsi fà ju yi.

⁶Là Pétro tshob yi ndù: Me ke' ghù silba ke gol lo, là ju ze me ghù là, me nsi fà wù: Num lén Yésu Kristô ze Nazarèt, zine!

⁷Pétro tshob ndùlala, ntshùb bu i ze zwim, ngù a lo tù. Be num yen ngelaṅ nà nga nku mi nyit, nta;

⁸a tsho' ketshat, ntsin tù, nto' nezine, ntsho bo à bo Ndà Nsi, nzine, ntsho' ketshat, nke ngamte Nsi.

⁹Njoṅ benntùn fa yen mb'a tshwèt nzine, ngamte Nsi là.

¹⁰Bo be lèn ndù a b'a mèn z'a ke ntswe mbwô nzendà Ndà Nsi, nke ndon tshu là, ntshàm neshu; bwôg bèn ntshùb yub num nu z'a se' kekat là.

¹¹Mba yen mèn ni be ke kô nekag Pétro mba Yohané là, njoṅ benntùn fa nkù nde nèn mbaṅ bo bam ntshundà ze bo ke ntsiaṅ bam ntshundà Salomon nà ntùm netshàme.

¹²Pétro be yen ndùlala, ntshob benntùn ndù: Bon Israél, numke bin nke ntshàm num ju z'a lo netshùa l'à? Numke bin nke nte miag num bag mba bag lo' à yag neta ke yag nebwôg Nsi lo kà ngù yen mèn ni nzin à?

¹³Nsi Abraham, Isak mba Yakob, Nsi tà tshag kuni ngafa' i Yésu ze bin na' mfà i, mbèn nga i mbwe Pilato z'a na' nke ndiag nekag i là.

¹⁴Bin lo gha mèn nelàne, mèn netsine, mbètte ndù bo ko ndèn ngazwi benntùn, mfà i bin.

¹⁵Bin lo ghù mfen yôg kwù, Nsi bam i num vù; bag b'a tse ghakwénta.

¹⁶A tshùa num bamntù num lén Yésu, sen lén nà fà neta yen mèn ni ze bin tshwèt njen mbe ndù bin lèn i là. Bamntù z'a num Yésu là yate yen mèn ni yoṅ ntshù' mbwe njoṅ zin fafa.

¹⁷Fèt tshàm, me lèn ndù bin mba kamkam tsin na' ngù ndùlal'a ntùm kagni.

¹⁸Là Nsi lo tshùa num yen mat là ngù nu z'a na' mbwôgmbwe ntshob num ntshu njoṅ ghatshob ntshob Nsi fa ndù Kristô i nsi yen nge' là, bumte.

¹⁹Ndùlala bin kaṅ ntù tsine, mbate ngùninu mine, ndù Nsi bwete nukebwô tsine,

²⁰ndùlala Tshùaben fà ngelaṅ nefite bin, mbèn ntsho' mèn z'a na' ntsho' njab bin, Yésu Kristô.

²¹Z'a bwô ndù kamànyam lé' i tà nkum ngelaṅ ze njoṅ tshu fa tse Nsi na' ntshob num ntshu ghatshob ntshob Nsi tse tse nelàn tse mbwe nsi bumte là.

²²Mosé lo tshob ndù: Tshùaben Nsi nsi tsho' mo' ngatshob ntshob Nsi mba me là netèt fèt tsin fà bin; a bwô ndù bin ju' ntshu i num njoṅ nu fa ts'a nsi tshob bin nà.

²³Mèn z'a ke nsi ju' ntshu yen ngatshob ntshob Nsi là là, mba bo a' sô i netèt benntùn.

²⁴Be ndaṅndaṅ, njoṅ ghatshob ntshob Nsi fa tse bo tshob nu fe num Samuél mba tse bo tum njam i là, lo tshob nu mfà num tshen lé'njù là.

²⁵Bin b'a bon ghatshob ntshob Nsi mba bon kàn se Nsi na' ngwat boa tà be là, a lo tshob Abraham ndù: Njam nzwil o, njoṅ nzwit benntùn fa ntùm njù nsi ghù mbotni.

²⁶Nsi lo bwôgmbwe ntum ngafa' i z'a tsho' là bin ndù a naṅ mbotni num bin, mbèn nkaṅ mba we lo num nukebwô tse.