Read Medumba Mfa' Ghantum 5 Bible Online

Mfa' Ghantum 5 - Medumba bible

Mfa' Ghantum 5

¹Là mo' mèn lén se Anania bo Safira nzwi i swèn mo' nà yube,

²mbe ntshu ntshù', ngabte nkàb, ndem mo' bag, ndo' mo' nse' njab mbaṅ nku ghantum.

³Là Pétro tshob yi ndù: Anania, numke Satan dun ntù o, o tatte Ywèt Nelàne, ndem mo' nkàb nà o à?

⁴Mba nà na' mb'a yu là, o lo ke ku'ni nelé' i ké? Ngelaṅ z'o bèn nswèn nà, o ke ku'ni nelo' nkàb i fa ké? Numk'o yab yen lèn nu là ntùm ntù o à? O ke' tatt'a benntùn, o tatt'a Nsi.

⁵Anania be ju' men ntshob là, ngwù nsi nkwù. Mo' mà bwôg ndùb tshùb njoṅ benntùn fa tse bo ju' yen nu li là.

⁶Bonnshum lo tù, ndam i ndo' nèn ntshoṅe.

⁷A be tshùa nguan nyam tat, nzwi Anania se', ntsho ndà ke lèn nu z'a lo netshùa là.

⁸Pétro bètt'é ndù: Tshob me, a kua' njoṅ nkàb bin swèn nà zin yi li ké? A tshob ndù: Ṅ, a b'a yen njoṅ i là.

⁹Pétro tshob yi ndù: Numke bin tamte ntshu tsin ntshù' num netatte Ywèt Tshùaben à? Tshù nku ben tse bo fe tshoṅ ndu o là nzendà, bo a' ket mba wù yu.

¹⁰Be ndùse a vù nsi num nku Pétro, nkwù. Bonnshum tse bo ke mbèn njam nà, tèl i ndù a kwù; bo lo' i nèn ntshoṅ mbaṅ ndu i.

¹¹Mo' mà bwôg ndùb tshùb njoṅ ntse'te benkristô fa mba njoṅ benntùn fa tse bo ju' tshen tshu li là.

¹²Tshùaben lo ke ntshùa njam ghantum, ngù nsà mba tshu netshàm yàm netèt benntùn. Njoṅ yub fa nke ntse'te ntùm ntù ntshù' bam ntshundà Salomon.

¹³Sàm mèn netèt tsemo' benntùn ke fèn ntù netamte num bo, là njoṅ benntùn fa lo ke nyàmte yub neshu.

¹⁴Bwoṅ bandum mba bènnzwi tse bo bam Tshùaben nà lo ke nkwi'te nèn mbwe,

¹⁵kà bo nke nket ghangokèt njab num manze num bontsit nkunndà ke nke'kun no, ndù Pétro be tshùa mba nda' netshaṅ i kabte mo' mèn netèt bo.

¹⁶Mba ntùm ngô ts'a be mbaṅ bwe là, bwoṅ benntùn tèn nèn Yérusalém, boa ghangokèt mba benntùn tse ywètkebwô ke ngùtni yub là, njoṅ yub fa lo yate.

¹⁷Là ngale'te Nsi ze ndùb se' boa njoṅ tse ben fa, bo na' mb'a num bag ba Sadukai; ghe'te dun ntùm ntù tshobe;

¹⁸bo tshùb ghantum ma' yub ntùm ndàtsha ngô.

¹⁹Là Angél Tshùaben ghab nzendà ndàtsha bo tèttswe', ngù bo tum,

²⁰a tshob bo ndù: Bin nèn Ndà Nsi, nda'te wut tsine, mbèn nsoṅ benntùn men ntshob yôg li.

²¹Bo ju' ntshu i, ntum kua' mà nkebnjù, ntsho Ndà Nsi, nto' netswite. Mbe be ndù ngale'te Nsi ze ndùb mba ben bo à bo be là se'e, ntse'te ghatsho'te ntsha mba ghakwé mbwe bon Israél fa: Bo tum ndù bo nèn ndo' ghantum ndàtsha.

²²Tshe' tshob nèn bwe ke yen yube, mbèn njam

²³ntshob bo ndù: Bag tèt ndàtsha ndù a fùne, ghabéb bèn mbe njù nzendà. Bag ghab ndà, ntsho ndà ke tèt sàm mèn ntùm bwe.

²⁴Ngatshagte Ndà Nsi mba ghale'te Nsi tse ndùbndùb be ju' men ntshob li, nu tshùa yub num nu ghantum, bo nke mbètte ju ze yen nu là bagte là.

²⁵Là mo' mèn se' ntshob bo ndù: Ben tse bin ma' yub ndàtsha là, tshù, bo b'a mà Ndà Nsi nke ntswite benntùn.

²⁶Ngatshagte Ndà Nsi nèn boa tshe' tse, ndo' yube, ke ghù nukebwô bo, nummbe bo lo ke mbwôg benntùn, ndù kà bo tamte yub ndoṅ.

²⁷Bo lo' yub nse' nte mbwe ghatsho'te ntsha. Ngale'te Nsi ze ndùb bètte yub,

²⁸ntshob ndù: Bin lèn ndù bag lo tshù' zin ndù kà bin bèn netswite nu num sen lén nà; tshù, bin tshwèt nkô netswite ntùm njoṅ Yérusalém fa; bin tshwèt nkô neghù lem yen mèn nà tsho tu bag!

²⁹Là Pétro mba ghantum bùnte, ntshob ndù: A bwô neju' ntshu Nsi ntshùa benntùn.

³⁰Nsi ba tà tshag lo bam Yésu ze bin kwimt'é num fanta'tù ngù a kwù là num vù.

³¹Nsi bù' i bu i ze zwim, a be mfen mba ngayôg benntùn, ndù a fà nekaṅ ntù mba nelagte nukebwô Israél.

³²Bag b'a ghakwénta tshen tshu là, bag mba Ywèt Nelàn tse Nsi fà ben tse bo num nju' ntshu i là.

³³Bo be ju' men ntshob là ndun yantù, nke ndiag nezwite yube,

³⁴Là mo' ze Férésia, lén se Gamliél, ngalèn ntshù' Nsi ze njoṅ benntùn fa ke ngamt'é là, lo tù netèt ghatsho'te ntsha, ntshob bo ghù tshen ben ni tum nèn njù metsili.

³⁵A tshob ndù: Ba Israél, bin bam nà num ju ze bin tshwèt ndiag neghù tshen ben ni là.

³⁶Nummbe ntùm lé'njù ts'a tôg là, Tedas z'a ke ndo' wul i mba mèn nà lo tume, benntùn nguan nkù tàn tam njam i; bo lo zwi i; benntùn tse bo be njam i là sate, mbèn mbite fa.

³⁷A lo bèn mbe ngelaṅ ze bo ke nsiaṅ ndèn nà, Yuda ze Galiléa tum, nsoṅte kua' benntùn yàm njam i. Mba yi bèn mbi ze; njoṅ benntùn fa tse bo be njam i là sate.

³⁸Ndonni, me tshob bin ndù: Bin lo num tshen ben ni, mfaṅ yub bo nène. A be ze yub nekô ke mfa' mub lo fe à benntùn nà, mb'a nsi sate ze tu;

³⁹là, a be z'a fe à Nsi là, mba bin ke' ku'ni nesate yube. Bin bam nà ndù kà bin ma' mba Nsi ntsho. Njoṅ yub fa bam ju a tshob là.

⁴⁰Bo tsiaṅ ghantum, ngù bo lab yub nshua'a; bo tshù' yub ndù kà bo bèn ntshob nu num lén Yésu. Bo tshob ndùlala nkag yube.

⁴¹Ndùlala ghantum tum netèt ghatsho'te ntsha ntùm tsiaṅte, nummbe Tshùaben lo yen ndù bo ku'ni nekwé tuswe num lén se.

⁴²Njoṅ lé'njù fa ntùm Ndà Nsi mba ntùm ndà nzenze, bo lo ke be tsin netswite mba netshob nkùn mebwô Kristô Yésu.