Read Medumba Mfa' Ghantum 8 Bible Online

Mfa' Ghantum 8 - Medumba bible

Mfa' Ghantum 8

¹Mba Saulo lo bam mba bo zwi Etiènne nà. Num sen lé'njù là, netsho' nku kebàn vù ntùm ntse'te benkristô Yérusalém. Njoṅ fètfèt fa, tà ntag nda' ghantum, sate nèn bag ngô nzenze, Yudéa mba Samaria.

²Là ben tse bo ke mbwôg Nsi là tshoṅ Etiènne, ngù vù se yàme.

³Mbe se' mba Saulo là, a nke mbagte ntse'te benkristô, nke ntsho ntùm mba', nsoṅ bandum mba bènnzwi nèn yi bo ma' yub ndàtsha.

⁴Fètfèt tse bo sate là nèn ntùm dù' nzenze, nke nsa nkùn mebwô ntshob Nsi.

⁵Filibo nèn ntùm ngô Samaria, nto' netshob nu Kristô bwe.

⁶Njoṅ benntùn fa tswe ndù kam ntùm ntù ntshù', nju' ntshob Filibo, nke nju'u, mbèn nke njen ba nsà ts'a ke ngù là.

⁷Nummbe ba ywètkebwô lo ke ntum num benntùn yàm tse bo ke ntô yub là, nkua' mà neta. Ba kekat mba ghabe'te wut yàm yate.

⁸A na' mb'a kua' mà tsiaṅte ndùb ntùm yen ngô là.

⁹Mo' mèn lo be ntùm ngô, lén se Simon, z'a ke ngù ka, njoṅ ba Samaria fa nke ntshàme, a nke ndo' wul i mba mèn ndùb là.

¹⁰Njoṅ benntùn fa, dùbdùb mba bônke' nke ntaṅ num i, nke ntshob ndù: Yen ni b'a neta Nsi ze bo num ntsiaṅ ndù neta ndùb là.

¹¹Bo nke ntaṅ num i, nummbe fe ngelaṅ yàm a lo ke ndo' mfa' ka mi, nke nso tshàm yi num bo.

¹²Là ngelaṅ bo bam Filibo z'a nke ntshob nkùn mebwô bo mfà num nufen Nsi mba num lén Yésu Kristô là, bo nyu' bandum mba bènnzwi ntse.

¹³Mba Simon bam ze, bo nyu' i ntse, a ke bèn nelo mbaṅ Filibo; mbe yen mba ba nsà ndùb ts'a ke mbumte là, ntshàm neshu.

¹⁴Ghantum tse bo be Yérusalém nà be ju' ndù ba Samaria kwé ntshob Nsi, ntum Pétro mba Yohané bo.

¹⁵Bo kum bwe, nde'te Nsi num bo ndù bo kwé Ywèt Nelàne,

¹⁶nummbe Ywèt lo ke yoṅ nswe' mba num ta' mèn netèt bo, là bo na' nyu' yub ntse à nda' num lén Tshùaben Yésu.

¹⁷Ndùlala Pétro mba Yohané yab mbu num bo, bo kwé Ywèt Nelàne.

¹⁸Ngelaṅ Simon yen mba Ywèt Nelàn se' num benntùn tse ghantum yab mbu num bo là, a fà nkàb bo,

¹⁹ntshob ndù: Bin fà yen neta là mba me yàm ndù mèn ze me nsi yab mbu màm num i là kwé Ywèt Nelàne.

²⁰Là Pétro tshob yi ndù: A bwô ndù nkàb o mba tu wul o bi, nummb'o kwate ndù ju ze Nsi num mfà là, bo ke njun à nkàb.

²¹O ke' ghù yu bag i ke bèn ngù ntsi' ntùm yen nu li, nummbe ntù o ke' tsin mbwe Nsi.

²²Kaṅ ntù o num yen nukebwô o là, nde'te Tshùaben mo' ndù be a lagte nkwatenu ntù o.

²³Nummbe me yen ndù o vù ntùm tsheb nezwe mba ntùm nkù nukebwô.

²⁴Simon bùnte ntshob ndù: Bin le'te Tshùaben num yàm tu ndù kà sàm nu netèt tse bin tshob là se' me.

²⁵Pétro mba Yohané be miagte nekwé nta mba nesoṅ ntshob Tshùaben, mbèn njam Yérusalém, nzin nke ntshob nkùn mebwô ngô ba Samaria yàme.

²⁶Mo' Angél Tshùaben se' ntshob Filibo ndù: Lo nsi nèn bag mà ntèn num manze z'a tshwèt mfe Yérusalém, nke nèn Gaza là; a b'a kônkwa.

²⁷A lo nsi nène. A yen mo' mén Etiopia, njabmfenkune, z'a na' mbe ngafa' Kandaké mfen Etiopia ze mènnzwi, mbèn mbe ngabéb njoṅ tshunkàb tse fa là;

²⁸a lo ke mfe Yérusalém dù' z'a na' nèn neghamte Nsi là, ndù a tswe ntùm kalig se nke nsiaṅ ṅwa'ni ngatshob ntshob Nsi Esaya.

²⁹Ywèt tshob Filibo ndù: Kù' nèn mbaṅ kalige.

³⁰Filibo kù nde nèn bwe, nju' mba mén Etiopia tshwèt nsiaṅ ṅwa'ni ngatshob ntshob Nsi Esaya là, ntshob yi ndù: O ju' ju z'o tshwèt nsiaṅ nà kua' mebwô ké?

³¹Yen mèn ni bùnte yi ndù: Be me neju' à ndùke, a be ze mèn ke' tshagt'àm n'à? A tsiaṅ Filibo ndù a ko' ntswe mbaṅ i ntùm kalige.

³²Tshù, kam ṅwa'ni Nsi z'a ke nsiaṅ nà, na' mb'a yen ni ndù: Mba njùmbwe là, bo lo' i nèn nzwi i; mba mén njùmbwe num ntswe mba ketshob mbwe mèn z'a tshwèt nkeb nyiaṅ tse là, be ndaṅndaṅ a ke gha' ntshu i ntshob nu.

³³Ntùm nefà wut nsi, bo lo biagte ntsha i. We z'a nsi soṅ tshô ze zwiaṅ i à? Nummbe bo lo' yôg se num nsitsha'a.

³⁴Njabmfenkun bùnte ntshob Filibo ndù: Me le't'o, ngatshob ntshob Nsi ke ntshob yen nu l'a num we? A b'a be num tu wul i ke mo' mènghua à?

³⁵Filibo gha' ntshu i nto' num yen dù' ṅwa'ni Nsi là, ntshob nkùn mebwô Yésu yi.

³⁶Mba bo ke nèn num manze là, bo kum mbaṅ ntse, njabmfenkun tshob ndù: Tshù ntse li, ke z'a tshwèt mbèn ntshètte ndù k'o nyu' àm ntse à? [

³⁷Filibo tshob yi ndù: A be z'o bam à njoṅ ntù o fa là, mba yen nà ku'ni. A bùnte ntshob ndù: Me bam ndù Yésu Kristô b'a Mén Nsi.]

³⁸A tshob bo ghù kalig tsin. Ntu tshob bàa swe', ntsho ntse, Filibo mba njabmfenkune, Filibo nyu' i ntse.

³⁹Ngelaṅ bo tum ntùm ntse là, Ywèt Tshùaben lo' Filibo nèn yi; njabmfenkun ke bèn neyen i; a lo nzin nke ntsiaṅte nèn tse.

⁴⁰Là Filibo, a na' mb'a Azôg, ndo nèn nke ntshob nkùn mebwô njoṅ ngô fa ts'a ke ntshùa bwe là, tà nkum ngelaṅ z'a nèn nkum Késaréa là.