Read Medumba Roma 10 Bible Online

Roma 10 - Medumba bible

Roma 10

¹Fèt tshàm, ju ze ntù àm kô là, mba yàm nele'te Nsi num bo b'a ndù bo ghù njôge.

²Me num nkwé nta mub ndù bo ghù fùagwut num Nsi, là bo ke' lèn manze yen nkôni là.

³Nummbe bo lo ke lèn nunetsin Nsi.

⁴Nummbe Kristô b'a miagte ntshù', ndùlala ndù njoṅ benntùn fa tse bo bam i là, tù' ben netsine.

⁵Mosé kite num nunetsin z'a be mfe ntshù' là ndù: Mèn z'a ghù a bumte là nsi yôg num i.

⁶Là, nunetsin z'a fe bamntù là num nke ntshob ndù: Kà tshob ntùm ntù o ndù: We z'a nsi ko' mfe kamànyam à? Yen nà b'a ndù, neghù Kristô swe'e.

⁷Ke netshob ndù: We z'a nsi swe' nèn mànjam nsi à? Yen nà b'a ndù: Neghù Kristô ko' mà netèt fe ben.

⁸A ke ntshob à ndùke? Ntshob b'a mbaṅ o, ntùm ntshu o mba ntùm ntù o. Yen nà b'a ntshob bamntù mi bag num ntshob là.

⁹A be ze ntshu o tshob ndaṅndaṅ ndù Yésu b'a Tshùaben nà, a be ze ntù o bam ndù: Nsi lo bam i num vù là, mb'o nsi yôge.

¹⁰Nummbe bamntù be ngù mèn kwé nunetsine, ntshob bamntù ghù mèn kwé yôg.

¹¹Nummbe ṅwa'ni Nsi tshob ndù: Mba we lo z'a bam i là, tuswe ke nsi ko i.

¹²Nummbe netôte ke' be netèt ze Yuda mba ze Grikia, nummbe Tshùaben njoṅ yub fa b'a ta' i ntshù', a b'a ngabwôntù num njoṅ ben fa tse bo num ntsiaṅ i là.

¹³Mba we lo z'a nsi tsiaṅ lén Tshùaben nà nsi yôge.

¹⁴Bo ghù netsiaṅ mèn ze bo ke' bam i l'à ndùke? Bo ghù nebam mèn ze bo ke' ju' nu num i l'à ndùke? Bo ghù neju' nu num i, ke be ndù mèn tshob nu Nsi à ndùke?

¹⁵Bo ghù netshob nu Nsi, ke be ndù bo kwé ntum à ndùke? Mba bo kite ndù: Nku ben tse bo num ntshob nkùn mebwô là nebwô à!

¹⁶Là, njoṅ benntùn fa ke' ju' ntshu nkùn mebwô. A tshùa ndùlala, Esaya tshob ndù: Tshùaben, we z'a bam ntshob mag à?

¹⁷Ndùlala, bamntù ke mfe à ju ze mèn ju' là, ju ze mèn ju' là se' njam ntshob Kristô.

¹⁸Là, me tshob ndù: Bo ke' ju' ké? Kua' mebwô! Nze yub lo nèn num njoṅ nsitsha' fa, ntshob mub nèn tà nkum num ntôg njù.

¹⁹Là, me bètte ndù: Israél lo ke lèn ké? Mosé lo bwôgmbwe ntshob ndù: Me nsi tshùa num nzwit z'a ke' b'a yàm nà, ma' zin ntùm ghe'te; me nsi tshùa num nzwit z'a ke' ghù zenu là, ma' zin ntùm yantù.

²⁰Là, Esaya lo fèn ntù, ntshob ndù: Ben tse bo ke' be diag àm nà, lo fon àm; ben tse bo ke' bètt'àm nà, me lo tswite wul àm bo.

²¹Mbe se' mba Israél là, a tshob ndù: Njoṅ lé'njù fa, me lo nyit mbu màm, num nzwil àm z'a ke' bam nu àm, z'a be ngatshabte là.