Read Medumba Roma 12 Bible Online

Roma 12 - Medumba bible

Roma 12

¹Ndùlala, fèt tshàm, me tsiaṅ zin ntshùa num kondèn Nsi, ndù bin fà wut tsin mba ju nele'te Nsi, ze ntùn, ze nelàne, z'a bwô Nsi là; yen ni b'a zin nefa' z'a ku'ni là.

²Kà bin lo' fi'te yen njù li, là bin tshùa num zenu z'a tù' ze nswe là, mbate zin nebe, ndùlala ndù bin lôte, ndèn ze nekô Nsi, ju z'a bwô là, ju z'a bwô i là, ju z'a bwô miagte là.

³Njam kondèn ze Nsi na' mfà me là, me tshob mba zit mèn no netèt bin ndù: Kà bin lèn njoṅ wut tsin ntshùa mba bin be Là, là bin be kum benntùn ntùm mfi' bamntù ze Nsi fi' mfà bin nà.

⁴Nummbe, ndaṅndaṅ mba be ghù nkam wut yàm num ta' wut ntshù', njoṅ nkam wut fa ke ghù à ta' fa' ntshù' là,

⁵be ndaṅndaṅ, be tse be b'a yàm nà, be b'a ta' wut ntshù' num Kristô, njoṅ be fa b'a nkam wut, be be,

⁶là, ntùm kondèn ze Nsi na' mfà be là, be kwé à tshu nzenze: A be ze be kwé ntum nà, be ghù ntùm mfi' bamntù be;

⁷mèn z'a kwé fa' là, a fà wul i num fa'; mèn z'a b'a ngatswite là, a fà wul i num netswite;

⁸mèn z'a b'a ngafà ntag là, a fà wul i num nefà ntage; ngafà ju fà ntùm ntù mebwô; ngatshagte tshagte ntùm nenùne; ngakondèn ghù ntùm tsiaṅte.

⁹Kà nkùnkù be ntùm nkôni. Bin bémte nukebwô, ndat num numebwô.

¹⁰Bin tshùa num nkôni fètfèt nke nku'ni wut tsin bin bin, mba we lo ke ndo' mfèl i mb'a tshùa i là.

¹¹Bin ghù fùagwut, kà bin lô; bin dun mbwôg Ywèle, mfa' Tshùaben.

¹²Bin tsiaṅte ntùm nenywinte, mfènte ntùm nge', nkagtùn ntùm nele'te Nsi.

¹³Bin tomte ben nelàn ntùm bwoṅ; bin ke nkù ntù nelo' ba ghùn.

¹⁴Bin naṅ mbotni num ben tse bo num ntsho' nku min kebàn nà; bin naṅ mbotni, ke so ndon.

¹⁵Bin tsiaṅte bin à ben tse bo tshwèt ntsiaṅte là, ndàn bin à ben tse bo tshwèt ndàn nà.

¹⁶Bin ghù be nkwate ntshù' bin bin; kà bin ko'te nkwatenu mine, là bin ghù ndù nefà wut nsi tshagte zine. Kà bin yen wut tsin mba ghazenu là.

¹⁷Kà bin lo' nukebwô njagte nukebwô yi sàm mèn. Bin diag nu z'a bwô là mbwe njoṅ benntùn fa.

¹⁸Bin yôg ntùm fite bin à njoṅ benntùn fa, a be ze bin ku'ni là, bin ghù ju ze bin ku'ni neghù là.

¹⁹Fèt tshàm tse nkôni, kà bin yagte mba' zin tu, là bin faṅ dù' yantù Nsi, nummbe bo kite ndù: Tshùaben tshob ndù: Neyagte mba' b'a yàm nu, me nsi bèn keb ntsha.

²⁰Là, a be ze nziku' ya ngakeban no là, o fà jujù yi; a be ze ntù i kù là, o fà ntse yi; nummbe a nsi tshùa ndùlala, o tse'te nge'mbwôg num tu i.

²¹Kà bam ndù nukebwô tshùa o, a bwô o lo' numebwô ntshùa nukebwô yi.