Read Medumba Roma 13 Bible Online

Roma 13 - Medumba bible

Roma 13

¹A bwô ndù mba we lo fà wut nsi mbwe ghatô ngô. Nummbe sàm netô ke bwe z'a ke' fe à Nsi là; ghatô ngô tse bo be là, Nsi bèn njab yube,

²ndùlala mèn z'a bù' wul i nsi mbwe netô là, ta tu mbwe nu ze Nsi na' njab là; tshen ghatatu là nsi soṅte nevù ntsha num tu wut tshobe.

³Nummbe bo ke' yab fenfen à ndù mèn bwôg yub num numebwô, là num nukebwô. O kô nebe ke bwôg ngatô ngô ké? Ghù numebwô, a nsi nyàmt'o!

⁴A b'a ngafa' Nsi num yu numebwô. Là, a be z'o ghù nukebwô là, o vètte! Nummbe a ke' ke ntshùb ṅwi à banban. Nummbe a b'a ngafa' Nsi, a be njagte mba' ngaghù nukebwô num nela'te Nsi.

⁵A ndùlala, a bwô nefà wut nsi, ke b'a ntùm nebwôg yantù, là mba nze ntù kô là.

⁶Nummbe a b'a num ndùlala ze bin ke mfà ntshub là; nummbe bo b'a ghafa' Nsi tse bo be nkagtùn num sen fa' là là.

⁷Bin fà ju ze njoṅ benntùn fa ku'ni nekwé bin nà bo; mfà ntshub ngakwé ntshub, mfà ju fé' ngakwéfé', mbwôg mèn z'a bwô ndù bin bwôg i là, ngamte mèn z'a bwô ndù bin ghamt'é là.

⁸Kà bin faṅ njo mèn bam bin, k'a ke nda' nkôni bin bin; nummbe mèn z'a num nkô mo' mèn nà, ghù ntshù' bumte.

⁹Nummbe men ntshù' li: Kà ghù màndà, kà zwi mèn, kà yi tshô, kà ghe'te, mba memo' ntshù' tamte mb'a ntùm men ntshob li ndù: Kô mèn z'a ghebte mbaṅ o là mba tu wul o là.

¹⁰Nkôni ke' be ghù sàm nukebwô num mèn z'a ghebte là. Ndùlala, nkôni b'a mbumte ntshù'.

¹¹Bin ghù ndùlala, mba bin lèn yen ngelaṅ ni là, ndèn ndù nyam nelo num miaglo ku'u; nummbe yôg ghebte mbaṅ ben ntshùa ngelaṅ ze bag à bin na' nto' nebam nà.

¹²Tèttswe' à tôge, mbwôgtshù à ghebte. Ndùlala bag à bin sô mfa' njame, ma' tshu ntsho nka' num be.

¹³Bag à bin zin mb'a bwô là, mba bon mbwôgtshù là, ke b'a ntùm neyôg yôg kebwô ke yôg ngùa lo, ke b'a ntùm nediag ntsha, ke ghe'te lo,

¹⁴là bin ma' Tshùaben Yésu Kristô num bin, ke fa' mbàb wut ghe'te tse.