Read Medumba Roma 14 Bible Online

Roma 14 - Medumba bible

Roma 14

¹Bin lo' mèn z'a bot ntùm bamntù là, ke soṅte nu num nkwatenu.

²Mo' mèn num mbam ndù a ku'ni nejù njoṅ i fa, là mèn z'a bot là fèt njab.

³Kà mèn z'a num njù là wag mèn z'a ke' be jù là; kà mèn z'a ke' be jù là tsho'te mèn z'a num njù là. Nummbe Nsi lo' i.

⁴Wù, o b'a we kà nke ntsho'te mènghua à? K'a tsin tù, k'a vù nsi, mba yen nà lôt'a tàfa' i. Là, a nsi tsin tù, nummbe Nsi b'a mèn neta num neghù a tsin tù.

⁵Mo' mèn be ndo' mo' lé'njù ntshùa mo'o, mo' mèn lo' njoṅ lé'njù fa be ndaṅndaṅ; a bwô mba we lo tshùb nkwatenu mi kua' mebwô.

⁶Mèn z'a num ngamte tsemo' lé'njù là, ke ngamte yub à num Tshùaben; mèn z'a num njù là, ke njù à num Tshùaben, nummbe a num nde'te Nsi, mèn z'a ke' be jù là, ke' be jù i à num Tshùaben, mba yi num nde'te Nsi.

⁷Sàm mèn netèt be ke ke njôg à num tu wul i, sàm mèn ke ke nkwù à num tu wul i.

⁸Nummbe, a be ze be yôg là, mba be yôg à num Tshùaben; a be ze be kwù là, mba be kwù à num Tshùaben. Ndùlala, ke be yôg, ke be kwù, mba be b'a ben Tshùaben.

⁹Nummbe Kristô kwù, mbèn njôge, ndùlala ndù a be Tshùaben fe ben mba ben tse bo be ntùn nà.

¹⁰Là wù, numk'o nke ntsho'te mfèl o à? Nummbe njoṅ be fa nsi tsin mbwe diaṅ ntsha Nsi,

¹¹nummbe bo kite ndù: Tshùaben tshob ndù: Me b'a ntùn, njoṅ ntunkekwi' fa nsi kwim mbwe àm, njoṅ ndém fa fà ghamte Nsi.

¹²Ndùlala, mba zit mèn no netèt be nsi soṅ ze nu mbwe Nsi be tu wul i.

¹³Ndùlala, kà bag à bin bèn netsho'te wut be, be be, là bin zete ndù kà bin yab nu fa'te ke ywi' lo mbwe mo' mfèle.

¹⁴Me lène, mbèn ndèn kua' mebwô num Tshùaben Yésu ndù sàm ju ke' be ze nesagte num i, là, a b'a nesagte num mèn z'a kwate ndù a sagte là.

¹⁵Nummbe, a be z'o tshùa num jujù ngù mfèl o nywin nà, mb'o ke' bèn nke nzin à ntùm nkôni. Kà ghù nu jujù ghù mèn ze Kristô kwù num i là bi.

¹⁶Ndùlala kà bin bam bo tshabte ju mebwô ze bin kwé là.

¹⁷Nummbe nufen Nsi ke b'a jujù mba ju nenu, a b'a nunetsine, fite mba tsiaṅte ntùm Ywèt Nelàne.

¹⁸Nummbe mèn z'a num mfa' Kristô ndùlala là, num mbwô Nsi, benntùn nke nyàmt'é.

¹⁹Ndùlala bag à bin ke ndiag à nu fite mba nu nekut yôg be, be be.

²⁰Kà bagte fa' Nsi num nu jujù, njoṅ jujù fa b'a nelàne, là nukebwô num bwe, a be ze mèn z'a num njù njoṅ i fa tù' ywi' là.

²¹Mebwô b'a ndù k'o fèt mbàb, ke nu ndu', ke ghù sàm ju z'a ghù mfèl o fa'te là.

²²Bamntù z'o ghù là, a bwô, a lôt'a wù bin Nsi. Mènfen b'a mèn z'a ke' be tsho'te wul i ntùm nu z'a lo' mba nunenùn nà.

²³Là mèn z'a be magte, ngelaṅ z'a tshwèt njù jujù là, vù ntsha, nummbe yen nà ke fe à bamntù. Njoṅ tshu fa ts'a ke' fe à bamntù là, b'a nukebwô.