Read Medumba Roma 16 Bible Online

Roma 16 - Medumba bible

Roma 16

¹Tshù mfèt be ze mènnzwi, Fébé, z'a be ngafa' ntse'te benkristô mà Kenkréa là, me fà i bin;

²bin lo' i num Tshùaben ntùm mat z'a ku'ni ze ben nelàn nà, bin ywimt'é mba ntùm zit nu lo z'a tshùa i là, nummbe mba yi ywimte ben yàme, mba kua' tu wul àm.

³Bin tsha'te Prisila mba Akila shunfa' tshàm num Kristô Yésu;

⁴tshen ben nà lo fà tu wut yub num àm, a ke nda' me bèn nke ndabte yube.

⁵Bin tsha'te mba benkristô tse bo num ntse'te ndà Prisila mba Akila là. Bin tsha'te nshun nkôni àm Ebènètô z'a be mbwe mèn z'a kaṅ ntù i mfà Kristô ntùm ngô Asia là.

⁶Bin tsha'te Maria z'a fa' bin neshu là.

⁷Bin tsha'te Andrônikô mba Yunia, ba la' bag, shun tshàm ndàtsha, lén sob ju'ni netèt ghantum, bo lo bwôg be benkristô me.

⁸Bin tsha'te Ampliatô, nshun nkôni àm num Tshùaben.

⁹Bin tsha'te Urbanô, nshun fa' àm num Kristô, mba nshun nkôni àm Stakis.

¹⁰Bin tsha'te Apélés, mèn nenùn num Kristô. Bin tsha'te ba ndà Aristôbul.

¹¹Bin tsha'te Hérodion, nzwit yag. Bin tsha'te ba ndà Narkisô tse bo be num Tshùaben nà.

¹²Bin tsha'te Trifène mba Trifôs tse bo be mfa' Tshùaben neshu là. Bin tsha'te Pèsida nshun ze tanjoṅ z'a fa' num Tshùaben yàm nà.

¹³Bin tsha'te Rufô ze tanjoṅ num Tshùaben, mba màab z'a be mba yàm nà.

¹⁴Bin tsha'te Asinkri, Flègô, Hèrmès, Patrôpas, Hèrmas, mba njoṅ fètfèt fa tse bo à bo be là.

¹⁵Bin tsha'te Filôlôgô mba Yulia, Néréo mba mfèl i ze mènnzwi, Olimpas mba njoṅ ben nelàn fa tse bo à bo be là.

¹⁶Bin tsha'te wut tsin bin bin ntùm nenyô nge' ze nelàne. Njoṅ ntse'te benkristô fa tsha'te zine.

¹⁷Fèt tshàm, me le'te zine, bin zete num ben tse bo ke ma' fagte mba ywi' num netswite ze bin na' nzi'te là, bin kù yube.

¹⁸Nummbe lèn tshen ben nà ke' be fa' à Kristô Tshùaben be, là bo ke mfa' à num bam sube; bo num ntshùa num ntshob nedùmte mba mbwô ntshobe, mfùte ghabam njoṅ i fa.

¹⁹Nummbe zin neju' ntshu tam toṅ njoṅ benntùn fa; ndùlala me tsiaṅte num bin. Là, me kô ndù bin ghù zenu num numebwô, ndàn num nukebwô.

²⁰Nsi fite nsi gho' Satan tun nku min ndende. Kondèn Tshùaben Yésu Kristô be njoṅ zin fa. Amén.

²¹Nshunfa' àm Timôtio tsha'te zine, mba Lukius, Yason mba Sôsipatèr nzwit yag.

²²Me Tèrtius ze me kite yen ṅwa'ni li là tsha'te zin num Tshùaben.

²³Gaius mèn z'a lo' àm ngùn i mba njoṅ ntse'te benkristô fa là tsha'te zine, Erasta ngalé' nkàb ngô tsha'te zine, mba mfèt be Kuartus. [

²⁴Kondèn Tshùaben be Yésu Kristô be njoṅ zin fa. Amén.]

²⁵Ndùlala, me lem zin Nsi z'a ku'ni nefà tànntù bin njam nkùn mebwô àm mba Yésu Kristô ze me num ntshob là, njam netswite tsham s'a na' ndem fe tà mbwe,

²⁶là ntum num miag benntùn ndonni ntùm ṅwa'ni ghatshob ntshob Nsi, mba Nsi z'a tswe yoṅ ntshù' tshob là, ndùlala ndù njoṅ ghakelèn Nsi fa lène, nju' ntshu Nsi ntùm bamntù.

²⁷Ghamte be Nsi z'a be nzenu tù' i ngu'ngu' ntshùa njam Yésu Kristô là. Amén.