Read Medumba Roma 6 Bible Online

Roma 6 - Medumba bible

Roma 6

¹Be nsi tshob à ndùke? Bag bin nsi ghô ntùm nukebwô, ndùlala ndù kondèn yàm ké?

²Nga, a ke b'a ndùlala! Be tse be na' nkwù, mfagte bag à bin nukebwô là, nsi bèn yôg ntùm bwe à ndùke?

³Bin ke' lèn ndù njoṅ be tse bo na' nyu' be à num Kristô Yésu là, bo na' nyu' be à num vù se ké?

⁴Ndùlala, bo na' tshoṅ be bag à bin bo ntshùa njam kwéntse num vù, ndùlala ndù mba Kristô lo num vù ntshùa njam nkuni Tà là, be ndaṅndaṅ mba be nsi zin ntùm yôg nswe.

⁵A be ze bag à bin bo tamte ntù ntshù' njam vù s'a fute se là, mba bag à bin nsi ghù ze be bag i ntùm ze nelo num vù;

⁶a *gi*bwô bag à bin lèn ndù bo lo kwimte ze be njwèn mèn bag à bin bo num fanta'tù, ndùlala ndù bo biagte wut nukebwô, mba ndù kà bag à bin bèn ntù' kuan nukebwô.

⁷Nummbe mèn z'a kwù là mi njo bo nukebwô.

⁸Là, a be ze bag à bin Kristô kwù là, mba bag à bin bam ndù bag à bin bo nsi yôge,

⁹nummbe bag à bin lèn ndù Kristô z'a lo num vù là ke bèn nkwù, vù ke bèn netô i.

¹⁰Vù s'a kwù là, a kwù à num nukebwô, a lo kwù à yoṅ ntshù' num njoṅ yoṅ tse fa; yôg s'a tshwèt njôg là, a yôg à num Nsi,

¹¹mba bin, bin lo' wut tsin mba bin kwù num nukebwô, là njôg num Nsi, njam Kristô Yésu là.

¹²Ndùlala kà nukebwô ke ntô wut tsin ts'a kwù là, kà bin ju' ntshu tse ghe'te.

¹³Kà bin ke mfà nkam wut min nukebwô mba tshu ntsho nuketsin nà, là bin fà wut tsin Nsi, bin tse bin tum ntùm vù, njôg là; bin fà nkam wut min Nsi mba tshu ntsho nunetsin nà.

¹⁴Nukebwô ke nsi tô zine, nummbe bin ke b'a tun ntshù', là bin b'a tun kondèn.

¹⁵Ndùlal'o? Bag bin nsi ghù nukebwô mba be ke' b'a tun ntshù', là tun kondèn nà ké? Nga, a ke b'a ndùlala!

¹⁶Bin ke' lèn ndù ngelaṅ ze bin fà wut tsin mo' mèn mba kuan num neju' ntshu i là, mba bin b'a kuan yen mèn nà bin tshwèt nju' ntshu i là: Ke nukebwô num vù lo, ke neju' ntshu num nunetsin no là ké?

¹⁷Là, ghamte be Nsi! Bin lo be kuan nukebwô, là njoṅ ntù tsin fa, bin kô neju' ntshu ju netswite ze bo fà bin nà.

¹⁸Là, bin lo tum kuan bu nukebwô, bin tù' kuan nunetsine.

¹⁹Me ke ntshob à mba benntùn nyiaṅtu num ntshob là num zin nebot mbàb wut. Nummbe mba bin na' mfà nkam wut min num mfa' ṅu' mba nukebwô num nukebwô là, be ndaṅndaṅ, ndonni bin fà nkam wut min fa' nunetsin num nu nelàne.

²⁰Nummbe ngelaṅ bin na' mbe kuan nukebwô là, bin na' ntswe à zin tu mbwe nunetsine.

²¹Ntàm mi bin na' nkàb bwe là b'a ke? A tshu ts'a tshwèt mfà tuswe bin ndonni là. Nummbe miagte tshen tshu là b'a vù.

²²Là, ndonni ze bin tum kuan bu nukebwô, ntù' kuan Nsi là, bin tshwèt nkàb ntàm num nu nelàn ze miagt'é b'a yô matmat là.

²³Nummbe nkàbfa' nukebwô b'a vù, là ju kondèn Nsi b'a yôg matmat njam Kristô Yésu Tshùaben be.