Read Medumba 1 Korintô 1 Bible Online

1 Korintô 1 - Medumba bible

1 Korintô 1

¹Me Paulo, ze Nsi tsiaṅ àm ntùm ze nekô ndù me be ngantum Yésu Kristô là, mba Sôstène, mfèt be,

²me kite yen ṅwa'ni li à ntse'te ben Nsi tse bo be mà Korintô, tse Nsi lànte yub num Kristô Yésu, ben nelàn tse Nsi tsiaṅ yub là, boa njoṅ ben fa tse bo num ntsiaṅ lén Tshùaben be Yésu Kristô njoṅ dù' fa, Tshùaben yub mba ze be là.

³Kondèn mbà fite z'a fe Nsi, Tà be, mba Tshùaben Yésu Kristô là be bin.

⁴Me num ndabte Nsi njoṅ ngelaṅ fa num bin, num kondèn Nsi z'a na' mfà bin num Kristô Yésu là.

⁵Bin lo tshùa num i ntù' ghafu' num njoṅ tshu fa, ntùm ntshobe, mba ntùm nelène,

⁶ndaṅndaṅ mba kwénta Kristô na' ntaṅ nga netèt bin,

⁷ndùlala ndù kà bin bwoṅ sàm ju kondèn, bin tse bin tshwèt mbéb netswite wut Tshùaben be Yésu Kristô là.

⁸Tu wul i nsi ghù bin dun neta tà nèn miagte, ndù bin be ke lo' ntùm lé'njù Tshùaben be Yésu Kristô.

⁹Nsi b'a mèn nenùne, yi z'a na' ntsiaṅ zin ndù bin tamte bin à Mén i Yésu Kristô, Tshùaben be là.

¹⁰Fèt tshàm, me tsiaṅ zin num lén Tshùaben be Yésu Kristô; bin be ntshu ntshù', kà fagte be netèt bin, là bin tamte ntùm ta' ywèt ntshù' mba ntùm ta' nkwate ntshù'.

¹¹Fèt tshàm, me lo ju' ben Klôé ndù ntsha num netèt bin.

¹²Me tshob à nummbe mba we lo netèt bin tshwèt ntshob ndù: Me b'a ze mèn Paulo, me b'a ze Apôlô, me b'a ze Kéfa, me b'a ze Kristô.

¹³Kristô b'a nkam nkam ké? Bo na' nkwimt'a Paulo num fanta'tù num tu zin ké? Bo na' nyu' zin ntse à num lén Paulo ké?

¹⁴Me labte Nsi mba me ke' nyu' sàm mèn ntse netèt bin nà, mb'a b'a nda' Krispô mba Gayô,

¹⁵ndùlala sàm mèn ke' ku' netshob ndù bo lo nyu' zin ntse num lén sàm.

¹⁶Me lo bèn nyu' mba tunndà Stéfana ntse. Ntôg nsen nà, me ke' lèn, a be ze me nyu' mo' mèn ntse là.

¹⁷Nummbe Kristô lo ke tum àm à ndù me nyu' benntùn ntse, là ndù me tshob nkùn mebwô, ke b'a ntùm zenu ntshobe, mbwôg ndù kà fanta'tù Kristô tù' ju banban.

¹⁸Nummbe ntshob fanta'tù b'a nu bà num miag ben tse bo tshwèt mbi là, là, a b'a neta Nsi num miag be tse be yôg là.

¹⁹Nummbe bo kite ndù: Me nsi biagte zenu ghazenu, me nsi ghua' nelèn ghalèn.

²⁰Nzenu b'a yà? Ngalèn ṅwa'ni Nsi b'a yà? Ngadiag zenu yen njù li b'a yà? Nsi ke' ghù zenu njù tù' bà ké?

²¹Là mba njù be ke tshùa num zenu ndèn Nsi ntùm zenu Nsi là, Nsi lo yen ndù a bwô netshùa num nu bà z'a b'a ntshob fanta'tù là, njôg ben tse bo nsi bam nà.

²²Ba Yuda num mbètte nsà, ba Grikia nke ndiag zenu,

²³là bag b'a num ntshob Kristô ze bo kwimt'é num fanta'tù là, a b'a nu fa'te ba Yuda, mbe nu bà ghakelèn Nsi,

²⁴Là, mbe se' mba ben tse Nsi tsiaṅ yub là, ba Yuda mba ba Grikia, a b'a Kristô, neta Nsi mba zenu Nsi.

²⁵Nummbe nu bà z'a b'a ze Nsi là, ze nu ntshùa benntùn, nebot z'a b'a ze Nsi là ta ntshùa benntùn.

²⁶Fèt tshàm, bin lôte netèt bin tse Nsi tsiaṅ zin nà njene, ghazenu num ze mat mbàb wut, ghaneta mba ben ndùbndùb ke' yàm netèt bin.

²⁷Là Nsi lo tsho' tshu bà ts'a b'a tse njù là, ndù a ma' tuswe yi tu ghazenu; Nsi lo tsho' tshu nebot ts'a b'a tse njù là, ndù a ma' tuswe yi tu tse neta.

²⁸Nsi lo tsho' tshu newag ts'a b'a tse njù là mba tshu banban, tshu ts'a ke' be là, ndù a biagte ts'a be là yi,

²⁹ndùlala ndù kà sàm ju Nsi nabte là ta' nsoṅ mbwe Nsi.

³⁰Là Nsi lo ghù bin tamte num Kristô Yésu, z'a tù' zenu z'a fe Nsi, mbèn ntù' nunetsine, nu nelàne, mba netshu' be là,

³¹ndùlala ndù mèn z'a tshwèt nta' nsoṅ nà, ta' nsoṅ à num Tshùaben, ndaṅndaṅ mba bo kite là.