Read Medumba 1 Korintô 10 Bible Online

1 Korintô 10 - Medumba bible

1 Korintô 10

¹Fèt tshàm, me ke' kô nelem zin ndù ba tà tshag lo be tun ndot, ndù njoṅ yub fa lo tshùa netèt dibantse,

²bo lo nyu' yub num Mosé ntùm ndot mba ntùm dibantse;

³njoṅ yub fa lo jù à be jujù Ywèt ntshù',

⁴mbèn nu à be ntse Ywèt ntshù'; nummbe bo lo ke nu à ntse loṅ Ywèt s'a ke ntam njam bo là. Sen loṅ nà na' mb'a Kristô,

⁵là nu benntùn yàm netèt bo lo ke bwô Nsi, nummbe a lo ghù bo vùte num kônkwa.

⁶Tshen nu là na' mb'a num nefà mfi' be, ndùlala ndù kà be ghù ghe'te kebwô mba bo là.

⁷Kà bin be ghaghamte nsi neto mba tsemo' netèt bo, ndaṅndaṅ mba bo kite ndù: Benntùn tswe nsi nke njù, nke nu, ndo tù, nke nyiaṅe.

⁸Kà bag à bin kat mba tsemo' netèt bo na' nkale, ngwùte ben ntsha' ntshob tat ṅam mbàa num ta' lé'njù ntshù' là.

⁹Kà bag à bin laṅte Tshùaben mba tsemo' netèt bo na' ndaṅt'é, nyu ghù bo bite là,

¹⁰kà bin tshobte tunntô mba tsemo' netèt bo na' ntshobte tunntô, ngabiagte benntùn ghù bo bite là.

¹¹Tshen nu li fa lo se' num bo mba mfi' là; bo kite njoṅ i fa ndù a tagte be tse be b'a netèt miagte njù là.

¹²Ndùlala, mèn z'a kwate ndù a tsin tù là, zete ndù k'a vù nsi.

¹³Sàm laṅte ke' to' se' k'a ke b'a num ze njoṅ mènntùn. Là Nsi b'a mèn nenùne, a ke nsi bam ndù laṅte z'a tshùa zin neta là se' bin, là, a nsi fà neta nefènte ntùm laṅte, mba manze netum yi ntùm bwe.

¹⁴Fèt tshàm tse nkôni, a ndùlala, bin kù nu nsi neto!

¹⁵Me ke tshob bin à mba ben tse bo ze nu là; bin kwate tu zin num nu ze me tshob là,

¹⁶ntu' mbotni ze bag à bin num nde'te Nsi num bwe là, ke b'a netamte num lem Kristô ké? Bàn ze bag à bin num mbe'te là ke' b'a netamte num wut Kristô ké?

¹⁷Mba tu' bàn be ntshù' là, ben tse be yàm nà b'a wut ntshù', nummbe njoṅ be fa num ntamte, njù yen bàn ntshù' là.

¹⁸Bin lôte ba Israél tse mbàb wut njene. Ben tse bo num njù tshu tse bo zwi tômbwôg là, ke' tamte boa tômbwôg nele'te Nsi ké?

¹⁹Ke ze me tshwèt ndiag netshob à? Mbàb ze bo lo' ngamte nsi neto yi là, ghù njoṅ i fa ké?

²⁰Nga, tshu tse bo zwi tômbwôg là, bo zwi à num ba nsi banban, ke b'a num Nsi, là me ke' kô ndù bin tamte bin à ba nsi banban.

²¹Bin ke' ku'ni nenu ntu' Tshùaben mba ntu' nsi banban.

²²Bag à bin kô nekamte ghe'te Nsi ké? Bag à bin ta ntshùa i ké?

²³Mèn ku'ni neghù njoṅ i fa, là njoṅ i fa ke' ywimte. Mèn ku'ni neghù njoṅ i fa, là njoṅ i fa ke' be kut sàm ju.

²⁴Kà sàm mèn diag ju z'a bwô be yi là, là, a diag ju z'a bwô mo' mèn nà.

²⁵Bin fèt njoṅ tshu fa tse bo num nswèn wambàb là, ke bètte sàm nu, mbwôg ndù kà nzentù tsin sa' zine;

²⁶nummbe Tshùaben bèn ngù tsha' mba tshu ts'a be ntùm bwe là.

²⁷A be ze mo' ngakelèn Nsi tsiaṅ zin bin bam nenèn nà, bin fèt njoṅ tshu fa tse bo te mbwe bin nà, ke bètte sàm nu, mbwôg ndù kà nzentù tsin sa' zine.

²⁸Là, a be ze mèn tshob bin ndù: A b'a mbàb ze bo zwi ngamte nsi neto yi là, kà bin fèt, num yen mèn ni z'a soṅ zin nà, mbwôg ndù kà nzentù sa' mèn,

²⁹me ke tshob à yu nzentù, là ze ng'é, nzentù mèn ghù netsho'te ju ze me ku'ni neghù l'a numke?

³⁰A be ze me le'te Nsi num ju ze me jù là, mba bo nsi tshabt'àm num ju ze me le'te Nsi num bwe l'a numke?

³¹Ndùlala, ke bin jù, ke bin nu, ke bin ghù mba ke lo, bin ghù njoṅ i fa num ghamte Nsi.

³²Kà bin be ju fa'te ba Yuda, ba Grikia mba ntse'te ben Nsi,

³³ndaṅndaṅ mba tu wul àm num nkagtùn ntùm njoṅ tshu fa nebwô njoṅ benntùn fa, ke diag ju z'a ywimt'a nda' me là, là ju z'a ywimte ben yàm nà, ndùlala ndù Nsi yôg yube.