Read Medumba 1 Korintô 11 Bible Online

1 Korintô 11 - Medumba bible

1 Korintô 11

¹Bin be ghafi't'àm mba me be ze Kristô là.

²Me num nyàmte zin nummbe bin num nkwimt'àm num njoṅ nu fa, nke ndé' tshu nezi'te ndaṅndaṅ mba me na' ntswite zin yi là.

³Là me kô bin lèn ndù tu mba zit mandum no b'a Kristô, tu mènnzwi be mandum, tu Kristô be Nsi.

⁴Mba zit mandum no z'a num mbe le'te Nsi ke netshob ntshob Nsi lo, nte tshe' tu i là, num mfà tuswe tu i.

⁵Là mba zit mènnzwi lo z'a num mbe le'te Nsi ke netshob ntshob Nsi lo, ke kut tu i là, num mfà tuswe tu i, a be ndaṅndaṅ à mba bo kom tu i là.

⁶Nummbe a be ze mènnzwi ke' kut tu i là, a kebte nyiaṅtu tse; a be z'a b'a tuswe mènnzwi nekebte nyiaṅtu tse, ke nekom tu i lo là, a kut tu i.

⁷A ke' bwô mandum te tshe' tu i, nummbe a b'a mfuni mba nkuni Nsi; là mènnzwi b'a nkuni mandum.

⁸Là mandum lo ke tum à num mènnzwi, là mènnzwi lo tum à num mandum;

⁹là bo lo ke nabte mandum à num mènnzwi là bo lo nabte mènnzwi à num mandum.

¹⁰A ndùlala, a bwô mènnzwi ghù lèn ngù' num tu i, num ba Angél.

¹¹Mba ndùlala, num Tshùaben, mènnzwi ke' ku'ni nefagte num mandum, mandum ke fagte num mènnzwi.

¹²A b'a nenùn ndù mènnzwi tum à num mandum; njoṅ i fa fe à Nsi.

¹³Bin kwate zin tu, njen ndù a bwô mb'a be mènnzwi le'te Nsi ke kut tu i là ké?

¹⁴Mba kua' ze nebe mènntùn tshwèt nda'te bin ndù a b'a tuswe mb'a be mandum kag nyiaṅtu tse là,

¹⁵mba ndù a b'a ghamte mb'a be mènnzwi kag nyiaṅtu num nekabte tu i yi là.

¹⁶Là, a be ze mèn kwate neta ntshu là, mba bag, ke ntse'te ben Nsi lo, ke' ghù yen mat là.

¹⁷Ndonni, me tshwèt mbe tshob yen nu li, ke ke nyàmte zine, nummbe bin num ntse'te, ke b'a num numebwô, là num nukebwô.

¹⁸Mbwe i, me ju' ndù ngelaṅ bin num ntse'te bin bin benkristô là, fagte be netèt bin, me bam yen nu là mo' mén njoṅ i.

¹⁹Nummbe a bwô ndù nkwate nzenze be netèt bin, ndùlala ndù ben tse bo bwô Nsi là la'te wut tshobe, netèt bin.

²⁰Ndùlala, ngelaṅ bin tse'te là, bin ke jù à jujù Tshùaben.

²¹Nummbe mba we lo num mbwôgmbwe njù à ko' ze jujù; nziku' be ya yen mèn ni, yen mèn nà nke mbum ndu'.

²²Bin ke' ghù ba mba' nejù bwe, mbèn nu bwe ké? Ke bin ke ngwag à ntse'te ben Nsi, nke ma' tuswe tu ben tse bo ke' ghù ju l'à? Me nsi tshob bin à ndùke? Me nsi nyàmte zin ké? Num yen nu là, me ke nsi nyàmte zine.

²³Mba me là, ju ze me na' nkwé Tshùaben nà, a yi ze me na' mfà bin nà, a b'a ndù: A lo be tèttswe' ze bo swèn i là, Tshùaben Yésu lo' bàn,

²⁴ngelaṅ a le'te Nsi là, a be't'é, ntshob ndù: Yen ni b'a wul àm ze me fà num bin nà. Bin ke ngù yen ni, nke nkwimt'àm yi.

²⁵Bo be miagte nejù jujù, a ghù be ndaṅndaṅ num ntu' ndu', ntshob ndù: Yen ntu' li b'a kàn nswe ntùm lem tshàm. Bin ke ngù yen ni njoṅ ngelaṅ fa ze bin tshwèt nu i là, nke nkwimt'àm yi.

²⁶Ndùlala, njoṅ ngelaṅ fa ze bin tshwèt njù yen bàn ni, nke nu yen ntu' li là, mba bin ke nsoṅ à vù Tshùaben tà nkum ngelaṅ z'a se' là.

²⁷A ndùlala, mèn z'a nsi jù bàn ke nenu ntu' Tshùaben no ke be ndù a ku'ni là, mb'a nsi b'a ngavù ntsha mbwe wut mba lem Tshùaben.

²⁸A bwô mèn nèn tsham wul i ze tu kà njù yen bàn ni, kà nu ntùm yen ntu' li.

²⁹Nummbe mèn z'a jù mbèn nu ke be ndù a lèn wut Tshùaben nà, ke njù mbèn nu à ko' ze nevù ntsha.

³⁰A ju z'a ghù ghangokèt mba ben nebot yàm netèt bin, tsemo' bèn nkwù là.

³¹A be ze be tsho'te wut be ze be tu là, mba bo nsi tsho'te be.

³²Là, a be ze Tshùaben tsho'te be là, mb'a ke netagte be, mbwôg ndù kà be se' ngwù ntsha bag à bin yen njù li.

³³Fèt tshàm, ndùlala, ngelaṅ ze bin tse'te num jujù là, bin fènte nebéb fètfèle.

³⁴A be ze nziku' tshwèt nja mèn nà, a jù jujù la' i, mbwôg ndù kà bin tse'te num zin nevù ntsha. Ngelaṅ me nsi se' la' bin nà, me nsi nabte ts'a tù' là.