Read Medumba 1 Korintô 2 Bible Online

1 Korintô 2 - Medumba bible

1 Korintô 2

¹Fèt tshàm, mba me là, ngelaṅ me na' nse' la' bin nà, me lo ke lo' à ntshob mi a tshùate là ke zenu z'a tshùate là lo, ntshob kwénta Nsi yi bin.

²Nummbe me lo yen ndù a ke' bwô me lèn sàm ju netèt bin, k'a ke nda' Yésu Kristô, yen nà ze bo kwimt'é num fanta'tù là.

³Mba me là, me lo be netèt bin à ntùm nebwôge, mba ntùm nevèt yàme.

⁴Mat ze me na' ntshob ntshob Nsi yi là lo ke b'a mat ntshob zenu z'a num nsoṅte benntùn nà, là, a na' mb'a nela'te neta mba Ywèt Nsi,

⁵ndùlala ndù kà bamntù zin yi't'a num zenu benntùn, là num zenu Nsi.

⁶Là mba ndùlala, bag ke ntshob à zenu ben tse bo à ku' là, là ke b'a zenu yen njù, ke b'a zenu fenfen yen njù li tse bo nsi bi là,

⁷là bag ke ntshob à zenu Nsi, zenu z'a na' ndem ntùm tsham, ze Nsi na' nabte tà fe mbwe num nkuni be là.

⁸Sàm mèn netèt fenfen yen njù li lo ke lèn yen zenu là, nummbe bo na' ndèn i, mba bo lo ke kwimte Tshùaben nkuni num fanta'tù.

⁹Là mba bo kite ndù: Ju ze bag ke' be yen nà, ju ze toṅ ke' be ju' là, ju z'a ke' ko' ntù mènntùn nà, njoṅ tshu fa tse Nsi na' nabte num ben tse bo num nkô i là.

¹⁰Nsi lo tshùa njam Ywèle, nda'te njoṅ i fa be; nummbe Ywèt num ntswe' ntun njoṅ tshu fa, ntswe' ntun mba num Nsi.

¹¹Zit mèn netèt benntùn lèn tshu mènntùn, k'a ke nda' ywèt mènntùn z'a be num mènntùn n'à? Be ndaṅndaṅ, sàm mèn ke' lèn tshu Nsi, k'a ke nda' Ywèt Nsi.

¹²Mba be là, be lo ke kwé à ywèt njù, là be lo kwé à ywèt ts'a fe à Nsi là, ndùlala ndù be lèn tshu tse Nsi fà be ntùm kondèn i là.

¹³Bag num ntshob tshen tshu là, ke b'a ntùm ntshob mi zenu mènntùn tswite là, là ntùm ntshob mi Ywèt tswite bag là, nke mfi'te tshu Ywèt num tshu Ywèle.

¹⁴Mèn nyiaṅtu ke' be tshùb tshu ts'a b'a tse Ywèt Nsi là, nummbe a b'a tshu ts'a b'a tse Ywèt Nsi là, nummbe a b'a tshu bà num miag mi, a ke' ku'ni nelèn yube, nummbe a bwô ndù a tshùa num Ywèt kà ndèn yube.

¹⁵Mèn z'a ghù Ywèt là ku'ni nelèn njoṅ i fa, là sàm mèn ke' ku'ni nelèn i.

¹⁶Nummbe, we z'a lèn nkwatenu Tshùaben, we z'a ku'ni netswit'é à? Là, mba be là, be ghù nkwatenu Kristô.