Read Medumba 1 Korintô 5 Bible Online

1 Korintô 5 - Medumba bible

1 Korintô 5

¹Bo num nju' njoṅ dù' fa ndù kat num netèt bin, lèn kat z'a ke' be mba netèt ghakelèn Nsi là; a ndùlala, mo' mèn netèt bin lo' nzwi tàab.

²Bin tshwèt nko'te wut, ngelaṅ z'a lo mbwô ndù bin tswe ntsenyà, nsô mèn z'a ghù lèn yen nu là netèt bin nà.

³Tu wul àm, me ke' b'a netèt bin; là me b'a netèt bin ntùm Ywèle, m'a tsho'te mèn z'a ghù yen nu là là mba me b'a netèt bin nà;

⁴ngelaṅ bin mba ywèt tshàm nsi tse'te num lén Tshùaben Yésu mba ntùm neta Tshùaben Yésu là,

⁵be fà yen mèn nà Satan num nebagte mbàb wut, ndùlala ndù Ywèt se' njôg mum lé'njù Tshùaben.

⁶Min nta'nsoṅ ke' bwô! Bin ke' lèn ndù metsit ntsha' be ngù njoṅ bàn fa ko' ké?

⁷Bin sô njwèn ntsha' num bin, ndùlala ndù bin tù' bàn nswe, nummbe ntsha' ke' bèn mbe num bin; nummbe ze be njùmbwe Pasa ze bo zwi là b'a Kristô.

⁸Ndùlala bag à bin tsiaṅte lé'njù jùa, ke b'a ntùm njwèn ntsha' ke ntsha' netshùage, mba nukebwô lo, là ntùm ntsha' nelàne, mba nenùne.

⁹Me lo kite bin ntùm mo' ṅwa'ni ndù kà bin à kattù be num nu;

¹⁰me lo ke tshob à kattù tse ntùm njù, ke ghaghe'te lo, ba fimntshu ke ghaghamte nsi neto lo, nummbe mb'a lo mbwô ndù bin tum ntùm njù,

¹¹là me lo kite bin à ndù kà bin à mèn z'a num ntsiaṅ wul i mènkristô mbe kattù, ngaghe'te, ngaghamte nsi neto, ngaso ndon, mbum ndu', ke fimntshu là lo, be num nu; kà bin lèn yen mèn nà jù jujù.

¹²Be me tsho'te ben tse bo be njù l'à numke? Mbe se' mba tse bo be ndà là, bin ke' ku' netsho'te yub ké?

¹³Nsi nsi tsho'te tse njù. Bin sô mèn kebwô netèt bin.