Read Medumba 1 Korintô 7 Bible Online

1 Korintô 7 - Medumba bible

1 Korintô 7

¹Mbe se' mba nu tse bin na' nkite me là, a lo mbwô ndù kà mandum kwag mènnzwi.

²Là, nebémte kat, a bwô ndù mba zit mandum no ghù ze mènnzwi, mba zit mènnzwi lo ghù ze ndu.

³A bwô ndù mandum ghù ju z'a ku' là nzwi i, mènnzwi bèn ngù be ndaṅndaṅ ndu i.

⁴Mènnzwi ke bèn ngù wul i, là, a b'a ndu i; be ndaṅndaṅ mandum ke bèn ngù wul i, a b'a nzwi i.

⁵Kà bin gha netamte, k'a ke b'a be ntùm ntshu ntshù', ntùm mo' ngelaṅ, ndù bin ghù ngelaṅ nele'te Nsi; bin bèn mbèn njam dù' ntshù', mbwôg ndù kà Satan tshùa num zin nebot ndaṅte zine.

⁶Yen ni b'a ntag mi me fà là, me ke' nànte zin num bwe.

⁷Me lo nkô njoṅ benntùn fa ghù mba me là: Là mba we lo ghù ze ju kondèn Nsi à tù' i; mo' ghù yen ni, mo' ghù yen nà.

⁸Là me tshob ben tse bo ke' ghù nandà là, mba fôg bènnzwi ndù a lo mbwô bo ghô ndùlala mba yàm tu wut là.

⁹A be ze bo ke' ku'ni netshùb yub nebot là, bo nandà. Nummbe a bwô nenandà ntshùa neke nkù ntù ntùm ghe'te.

¹⁰Mbe se' mba ben tse bo nandà là, me tshob bo, ke b'a me, là Tshùaben, ndù: Kà mènnzwi fagte num ndu i,

¹¹là, a be z'a fagte là, k'a bèn ngù mo' ndu, ke ndù a bèn ntamte bo ndu i lo. Me tshob mandum ndù k'a sô nzwi i.

¹²Mbe se' mba tsemo' là, me tshob bo - ke b'a Tshùaben - ndù: A be ze mènkristô ghù mènnzwi z'a b'a ngakelèn Nsi, a bam netswe bo yi là, k'a sô i.

¹³A be ze mènnzwi ghù ndu z'a b'a ngakelèn Nsi, a bam netswe bo yi là, k'a gha ndu i.

¹⁴Nummbe mandum ngakelèn Nsi tù' mèn nelàn num nzwi i; mènnzwi ngakelèn Nsi tù' mèn nelàn num ndu i mènkristô, ntag ndùlala mba bon tsin ke' làn; njôg mbe ndù bo b'a nelàn ndonni.

¹⁵A be ze ngakelèn Nsi diag nefagte là, a fagte. Num lèn yen dù' nu li, mènkristô ze mandum ke ze mènnzwi lo ke' b'a nkuan. Nsi lo tsiaṅ be neyôg à ntùm fite.

¹⁶Mènnzwi, o lèn à ke ndù o nsi yôg ndu o à? Mandum, o lèn à ke ndù o nsi yôg nzwi o à?

¹⁷Nda' ndù mba we lo ghô ntùm bag i ze Tshùaben fà yi là, mba we lo ghô ntùm yôg dù' ze Nsi tsiaṅ i bwe là. A b'a ju ze me num ntshob ntùm njoṅ ntse'te benkristô fa là.

¹⁸Nsi lo be tsiaṅ mo' mèn ndù a si ket ké? K'a bam nesi ket. Nsi lo be tsiaṅ mo' ndù a ke' si ket ké? K'a si ket.

¹⁹Nesi ket ke b'a sàm ju, nebe ke si ket ke b'a sàm ju, là ju z'a ku'ni là b'a neze ntshù' Nsi.

²⁰Mba we lo ghô ntùm mat dù' ze Nsi tsiaṅ i bwe là.

²¹Nsi lo be tsiaṅ o ndù o à be nkuan ké? Kà ghùtni wul o! Là, a be z'o ku'ni nebe mba yu tu là, o fa'!

²²Nummbe nkuan ze Tshùaben na' ntsiaṅ i là b'a nkuan ze Tshùaben tshu' là. Be ndaṅndaṅ, mèn z'a na' nke ntswe ze tu, ze Tshùaben tsiaṅ i là b'a nkuan Kristô.

²³Bo lo jun zin tanjoṅ, kà bin tù' kuan benntùn.

²⁴Fèt tshàm, mba we lo ghô mbwe Nsi, dù' z'a tsiaṅ i bwe là.

²⁵Mbe se' mba num nu kwi là, me ke' ghù ju ze Tshùaben tshob là, là me fà ntag bo mba mèn ze Tshùaben ko ndèn mi, a ku'ni nebam nà.

²⁶Ndùlala, me kwate yub nebe bwô num nge' ts'a ghebte là; ṅ, me kwate ndù a bwô mènntùn be ndùlala.

²⁷O lat num mo' mènnzwi ké? Kà diag nefagte! O ke' lat num mo' mènnzwi ké? Kà diag mènnzwi!

²⁸Là, a be z'o nandà là, mb'o ke' ghù nukebwô; a be ze ménngon nandà là, mb'a ke' ghù nukebwô. Là lèn tshen ben ni nsi yen nge' num yôg mbàb wut; me nesoṅ zine, ndù bin bémte yen nge' là.

²⁹Fèt tshàm, ju ze me tshwèt ntshob bin nà b'a ndù: Ngelaṅ vôg; ndùlala ben tse bo ghù mènnzwi là be mba ben tse bo ke' ghù là;

³⁰ben tse bo tshwèt nkua' là be mba bo ke tshwèt nkua' là; ben tse bo tshwèt ntsiaṅte là be mba bo ke tshwèt ntsiaṅte là; ben tse bo tshwèt njun nà be mba bo ke' ghù sàm ju là;

³¹ben tse bo tshwèt njù bin njù là be mba bo ke' jù bin nà. Nummbe se yen njù li tshwèt ntshùa.

³²Me kô ndù bin tswe ke lab wut. Mèn z'a ke' nandà là num ndab wut num tshu Tshùaben, nke ndiag nebwô Tshùaben.

³³Mèn z'a nandà là num ndab wul i num tshu njù, nke ndiag nebwô nzwi i;

³⁴a ghabte wul i. Mènnzwi z'a ke' nandà là, mba ménngon num ndab wut num tshu Tshùaben, nke ndiag nebe nelàn ntùm wut mba ntùm Ywèle; là mènnzwi z'a nandà là num ndab wul i num tshu njù, nke ndiag nebwô ndu i.

³⁵Me tshob yen ni à num zin numebwô, ke b'a nebùn zin ywi', là ndù bin tswe mb'a ku'ni là, ntaṅ num Tshùaben tù' i.

³⁶Là, a be ze mèn yen ndù a ke' bwô ngon i tôg ngu'njù nandà, là njen ndù a bwô a nandà là, a ghù ju z'a kô là, a ke' ghù nukebwô. Nandà be.

³⁷Mèn z'a ghù nkwate ntù i, ke magte, sàm ju ke nànt'é, ndù yen nu là ko' à fe ntùm ntù i ndù kà ngon i nandà là, mba yen mèn nà ghù a bwô.

³⁸Ndùlala mèn z'a fà ngon i ntùm nandà là, ghù a bwô, mèn z'a ke' fà i ntùm nandà là, bèn ngù ntshùate.

³⁹Mènnzwi lat num ndu i njoṅ ngelaṅ fa z'a ke' ntùn nà. Là, a be ze ndu i kwù là, mb'a ku'ni neghù mo' ndu mb'a kô là, là nda' num Tshùaben.

⁴⁰Là, a nsi be mènfen ntshùate, a be z'a tswe ndùlala, mba me na' ntagte zin nà. Me kwate ndù mba tu wul àm ghù Ywèt Nsi.