Read Medumba 1 Korintô 9 Bible Online

1 Korintô 9 - Medumba bible

1 Korintô 9

¹Me b'a nkuan ké? Me b'a ngantum ké? Me lo ke yen Yésu Tshùaben be ké? Tu wut tsin ke b'a bu fa' àm num Tshùaben ké?

²A be ze me ke' b'a ngantum num miag tsemo' ben nà, mba me b'a kua' yi num miag mine, nummbe bin b'a sitam yàm ntum num Tshùaben.

³Yen ni b'a yàm kwénta mbwe ben tse bo tshwèt mbot'àm nà.

⁴Bag ke' ku'ni nejù mbèn nu ké?

⁵Bag ke' ku'ni nelo' mo' mfèt yag ze mènnzwi bag à bo nèn tshwèt fa' mba tsemo' ghantum, fèt Tshùaben, mba Kéfa là ké?

⁶Nda' bag, me mba Barnaba bèn mbe ke ku'ni nefaṅ fa' mbu là ké?

⁷Zit ngama' ntsho z'a ke njù à bàm i à? Zit mèn z'a num njwit ntù ke jù ntàm mi à? Zit mèn z'a num mbéb mbwe ke ke njôg à num mbùn mbwe à?

⁸Me tshob tshen nu li à mba mènntùn nyiaṅtu là ké?

⁹Bo kite ntùm ntshù' Mosé ndù: Kà kut ntshu nyàmna' z'a tshwèt mfa' num nsa là. Nsi ke ngùtni wul i à num ba nyàmna' ké,

¹⁰k'a ke ntshob à nda' num be à? Nummbe bo lo kite men ntshob l'a num be; ndùlala, a bwô ngadù' nà dù' nà ntùm nenywinte, ngalab nsa nywinte neghù ze bag i.

¹¹A be ze bag na' njwit tshu Ywèt num bin nà, mb'a b'a nu ndùb, a be ze bag tsho' tshu tsin tse mbàb wut là ké?

¹²A be ze tsemo' ku'ni neghù yub bag i num tshu tsin nà, mba bag ke' ku'ni ntshùate ké? Là bag lo ghù ju ze bag ku'ni num bwe là, nket njoṅ i fa num bag, mbwôg ndù kà bag tshètte nkùn mebwô Kristô nenèn mbwe.

¹³Bin ke' lèn ndù ben tse bo ke mfa' fa' Ndà Nsi là ke njôg à num tshu ts'a tum Ndà Nsi là ké? Bin ke' lèn ndù ghafa' tômbwôg ke njôg à num tômbwôg ké?

¹⁴Be ndaṅndaṅ, Tshùaben lo te ndù ngatshob nkùn mebwô ke njôg à num nkùn mebwô.

¹⁵Là tu wul àm, me lo ke bètte sàm ju num njoṅ i fa. Me ke' kite yen ṅwa'ni li à nebètte yi, nummbe me kô nekwù ntshùa mb'a be mèn sô yàm ju nta'nsoṅ nà.

¹⁶Nummbe, a be ze me num ntshob nkùn mebwô là, mb'a ke' b'a nu nta'nsoṅ me; a b'a fa' se bo yèn me là; ndon tu àm, a be ze me ke' tshob nkùn mebwô là.

¹⁷Me lo nke ngù à ntùm yàm nekô mba m'a' ghù ntsho'fa'. Là mb'a ke' b'a ntùm yàm nekô là, a b'a fa' se bo yab àm bwe là.

¹⁸Màm ntsho'fa' b'a ke? A b'a ndù me be tshob nkùn mebwô, mfà nkùn mebwô à banban, ndù kà me jù bin nkùn mebwô, ze me ku'ni num bwe là.

¹⁹Mba mba me ke' b'a nkuan sàm mèn nà, me lo' wul àm ngù nkuan njoṅ benntùn fa yi, ndùlala ndù me yôg ben yàme.

²⁰Netèt ba Yuda, me lo tù' ze Yuda, ndùlala ndù me soṅte ba Yuda; netèt ben tse bo be tun ntshù' là, me lo tù' à mba mèn z'a be tun ntshù' là, mba mba me ke' b'a tun ntshù' là, ndùlala ndù me soṅte ben tse bo be tun ntshù' là.

²¹Netèt ben tse bo ke' ghù ntshù' là, me lo tù' à mba mèn z'a ke' ghù ntshù' là, mba mba me ke' b'a mèn z'a ke' ghù ntshù' Nsi, nummbe me b'a mèn ntùm ntshù' Kristô, ndùlala ndù me soṅte ben tse bo ke' ghù ntshù' là.

²²Netèt ben nebole, me lo tù' mèn nebole, ndùlala ndù me yôg ben nebole. Netèt njoṅ benntùn fa, me lo tù' njoṅ i fa, ndùlala ndù me yôg tsemo'o.

²³Me num ngù njoṅ i fa num nkùn mebwô, ndùlala ndù mba tu wul àm ghù yàm bag i bwe.

²⁴Bin ke' lèn ndù a num mbe num nsém, njoṅ ghakù nde fa kù nde, là ta' mèn nkwé ntsho'ngu' ké? Bin kù nde à ntùm mat nekwé ntsho'ngu'u.

²⁵Njoṅ ghamaṅ ndù' fa num ntshùb ntù num njoṅ tshu fa; tshen ben ni ke ngù à nekwé tshe'ngu' s'a num mbagte là, là bag à bin nsi kwé s'a ke nsi bagte là.

²⁶A ndùlala ze me num nkù nde là, ke ke nèn à ke ju' nze; a ndùlala ze me be ntsham nto', ke ke ndab à mfùag là,

²⁷là me num ngùtni wul àm, nke ntô i mba nkuan nà, mbwôg ndù kà me tshob ntshob Nsi tsemo' ben, nse' ngô yàm njù.