Read Medumba 2 Korintô 10 Bible Online

2 Korintô 10 - Medumba bible

2 Korintô 10

¹Tu wul àm Paulo, me tshùa njam fite mba bwôntù Kristô ntsiaṅ zine, me ze me num mbe fimèn netèt bin, mbe dummèn num bin, ngelaṅ me be ngùanesà là.

²Me le'te, ngelaṅ me nsi se' la' bin nà, kà bin ghù me be dummèn, mba me nkwate neton mbu ben tse bo num ndo' yag mba bag ke nzin à num ze mat mbàb wut là.

³Bag ke nzin à ntùm mbàb wut, là bag ke' ke ma' ntsho à num ze mat mbàb wut.

⁴Nummbe tshu ntsho tshag ke' b'a tse mbàb wut, là, a b'a tse neta mbwe Nsi num nesate ba kàb ntùne;

⁵bag num nsate nkwatenu, mba ko'tewut ts'a num ntsin tù, ntshètte nelèn Nsi là, bag num ma' njoṅ nkwatenu fa ndàtsha ndù bo ju' ntshu Kristô,

⁶bag ku'ni neyagte mba' nebe keju' ntshu, ngelaṅ zin neju' ntshu nsi bumte là.

⁷Bin ke ndôt'a num miag. A be ze mèn lo' wul i mb'a num Kristô là, a kwate ntù i mebwô, ndèn ndù mb'a b'a num Kristô là, mba bag yag b'a num Kristô.

⁸Mba ndùlala, a be ze me num nta' nsoṅ neshu num ngù' ze Tshùaben fà bag num zin nekule, ke b'a num zin nesate là, mba tuswe ke nsi ko àm.

⁹Kà bin kwate ndù tshàm ṅwa'ni na' mb'a nelo' nkag bwôg yi num bin.

¹⁰Bo num ntshob ndù: Ṅwa'ni tse num ndèle, mbèn nta, là ngelaṅ tu wul i be nsi là, a b'a fenyu' mèn, ntshob mi be ke be mo' ju.

¹¹Lèn yen mèn ni lèn ndù: Mba bag num ntshob ntùm ṅwa'ni ngelaṅ bag ke' be nsi là, b'a mba bag nsi be ntùm mfa' mag ngelaṅ bag be nsi là.

¹²Nummbe a ke' bwô ndù bag tsho netèt ben tse bo num nkwé nta wut yub là, ke nelo' mfi' num bo lo. Là tshen ben ni num mfi' wut yub num tu wut tshobe, ndùlala mbwoṅ zenu.

¹³Là mbe se' mba bag là, bag ke' be ta' nsoṅ ke mfi', là bag tsin à ntùm ndù mfi' ze Nsi fi' mba bag, kà bag zin tà nkum la' bin nà.

¹⁴Bag ke' be tôg tshag ndù; a ke b'a ndù bag lo ke se' tà nkum la' bin, nummbe a b'a kua' la' bin ze bag zin nkum bwe, bag à nkùn mebwô Kristô là.

¹⁵Bag ke' be ta' nsoṅ à ke mfi', bag ke' ke nta' nsoṅ à num mfa' ben ghua, là bag tshwèt nywinte ndù ngelaṅ bamntù zin nsi ku' là, bag tù' ndùb ntshùate num bin ntùm yag ndù mfi',

¹⁶ndù bag tshob nkùn mebwô ntôg mba la' bin, ke ta' nsoṅ ntùm ndù ghua, ntùm fa' se mènghua fa' là.

¹⁷Mèn z'a tshwèt nta' nsoṅ nà, ta' nsoṅ à num Tshùaben.

¹⁸Nummbe a ke b'a mèn z'a be nkwé nta tu wul i là bèn mbwô Nsi, là, a b'a mèn ze Tshùaben kwé nta mi là.