Read Medumba 2 Korintô 5 Bible Online

2 Korintô 5 - Medumba bible

2 Korintô 5

¹Nummbe bag lèn ndù a be ze ntàb ze bag à bin num ntswe bwe num nsitsha' là, fagte là, mba bag à bin ghù dù'ntswe z'a fe Nsi là, ba' ze bu mènntùn ke' bèn nkut là, ba' z'a tswe yoṅ ntshù' là, mfe kamànyam.

²Bag à bin tshwèt nkua' ntùm yen ntàb li, nke nkù ntù nema' dù'ntswe z'a be mfe kamànyam nà, num ntàb nsitsha'a,

³a be z'a be bo tèt be ndù bag à bin ke' à ntùm ntàb be, ke b'a tunntôg là.

⁴Nummbe be tse bag à bin ke tshwèt nkô nesô yen ntàb li là, bag à bin tshwèt nkua'a, nke mfame, bag à bin ke tshwèt nkô nesô yen ntàb li, là nema' mo' num bwe, ndùlala ndù yôg mi ju z'a num nkwù là.

⁵Mèn z'a nabte be num yen dù' nu là b'a Nsi z'a fà tsho'tu Ywèt be nà.

⁶Ndùlala bag num ndun fènntù njoṅ ngelaṅ fa, là bag lèn ndù bag tswe à ngùanesà mbaṅ Tshùaben, ngelaṅ bag tswe ntùm yen wut li là.

⁷Bag ke ndo' à bamntù nzin yi, ke b'a neyen miag.

⁸Bag dun fènntù, là bag kwate ndù a bwô netum ntùm yen wut li, nèn ntswe mbaṅ Tshùaben.

⁹Ke bag tswe ntùm yen wut li lo, ke bag tum ntùm bwe lo, mba bag lo' neke mbwô i mba yag ghamte là.

¹⁰Nummbe a bwô ndù bo tsiaṅ njoṅ be fa mbwe diaṅ ntsha Kristô, ndùlala ndù mba we lo kwé ju mebwô ke ze kebwô lo, mat mb'a na' mfa' ngelaṅ z'a ke' ntùm wul i là.

¹¹Ndùlala, mba bag lèn nebwôg Tshùaben nà, bag num ndiag neghù benntùn kaṅ ngùninu mube; Nsi lèn yage, me kwate ndù mba bin lèn yag ntùm ntù tsine.

¹²Bag ke' ghù nebèn nke nkwé nta tu wut yag mbwe bin, bag ke mfà à dù' ze be bin yi'te bwe nta' nsoṅ num bag là bin, ndùlala ndù bin ghù nu ze bin nsi bùnte ben tse bo num nta' nsoṅ num tshu ts'a be njù, ke b'a ts'a be ntùm ntù lo là.

¹³A be ze tu wut yag ke' bwô là, mb'a b'a num Nsi, a be ze tu wut yag ghù zenu là, mb'a b'a num bin.

¹⁴Nummbe nkôni Kristô num ntshagte ben tse be num nkwate ndù ta' mèn lo kwù num tu njoṅ benntùn fa là, ndùlala njoṅ benntùn fa kwù.

¹⁵A lo kwù num tu njoṅ benntùn fa, ndùlala ndù kà ben tse bo be ntùn nà bèn nke njôg à num tu wut tshobe, là num mèn z'a kwù num tu yub, mbèn mbam num vù là.

¹⁶Ndùlala, fe ndonni, bag ke' bèn nelèn sàm mèn num ze mat mbàb wut. A be ze bag na' ndèn Kristô à mba num ze mat mbàb wut là, mba bag ke' bèn ndèn i à ndùlala.

¹⁷Ndùlala a be ze mèn be num Kristô là, mb'a b'a mèn nswe; njwèn tse tôg; tshù, njoṅ i fa tù' tse nswe.

¹⁸Njoṅ i fa fe à Nsi z'a tshùa njam Kristô ntamte be bag à bin tu wul i, mbèn mfà fa' netamte be là.

¹⁹A b'a Nsi na' mbèn ntshùa num Kristô ntamte njù num tu wul i, ke siaṅte mfànnu benntùn, nte ntshob netamte netèt be.

²⁰Ndùlala bag b'a ghanze num ze tu Kristô, Nsi bèn nke ntshùa num bag ntsiaṅ zine; bag le'te zin num ze tu Kristô ndù bin tamte bin à Nsi.

²¹Mèn z'a be ke to' ghù nukebwô là, Nsi lo lo' i mba nukebwô là num tu be, ndùlala ndù be tshùa num i, ntù' nunetsin Nsi.