Read Medumba Galatia 2 Bible Online

Galatia 2 - Medumba bible

Galatia 2

¹A lo be tshùa ngu'njù ntshob kuà gham, me bèn nko' nèn Yérusalém bag Barnaba, mba Titô ze me na' ndo' i là.

²Ju ze Nsi la'te me là ghù me ko' nèn bwe; nsoṅ yub nkùn mebwô ze me num ntshob ghakelèn Nsi là. Me lo bwôgmbwe nsoṅ kum benntùn tù' bo, ndùlala ndù kà nde mi me tshwèt nkù là mba mi me kù là be banban.

³Là mba Titô ze bag yi be là, bo lo ke nànt'é ndù a si ket, mba mb'a na' mb'a ze Grikia là.

⁴Fètfèt tse tatte lo be bwe, tse bo tsho bwe neton be, tse Kristô Yésu tshu' be là, ndùlala ndù bo bèn ma' be ntùm kuan.

⁵Bag lo ke fà bu yag bo mba yoṅ ntshù', ndùlala ndù nenùn nkùn mebwô ghô num bin.

⁶Mbe se' mba kum benntùn nà, ke bo na' mb'a ndùke mbwe lo, mb'a ke' ywimt'àm mo' ju, Nsi ke' be lôt'a num miag benntùn. Me tshob ndù kum benntùn lo ke bètt'àm sàm ju.

⁷Là bo lo yen ndù Nsi fà nkùn mebwô me netèt ben tse bo ke' si ket là, mb'a fà Pétro netèt tse bo si ket là.

⁸Nummbe mèn z'a fà neta Pétro num ntum netèt ben tse bo si ket là, fà neta mba me num ghakelèn Nsi,

⁹bo lèn kondèn ze Nsi fà me là; ndùlala Yakobo, Kéfa mba Yohané, tse bo ke ndo' yub mba ntom nà fà tsha'te me mba Barnaba, ndù bag à bo tamte, bag num ghakelèn Nsi, bo num ben tse bo si ket là.

¹⁰Bo bètte yag nda' ndù bag kwimte bwoṅbwoṅ, ju ze me ke nto' ngù ntùm tsiaṅte là.

¹¹Là ngelaṅ Kéfa se' Antiôkia là, me ta tu yi mbwe benntùn, nummbe a lo fàne.

¹²Nummbe ben tse bo fe mbaṅ Yakobo là lo be se'e, a nke njù jujù à boa ghakelèn Nsi; là ngelaṅ bo se' là, a yi wul i, mfagte num bo, nummbe a lo ke mbwôg ben tse bo si ket là.

¹³Mba tsemo' ba Yuda tsho ntùm nkùnkù i, mba kua' Barnaba faṅ bo soṅt'é ntùm nkùnkù yub.

¹⁴Là ngelaṅ me yen ndù bo ke tshwèt nzin kua' ndaṅndaṅ num nenùn nkùn mebwô là, me tshob Kéfa mbwe njoṅ benntùn fa ndù: A be ze wù z'o be ze Yuda tshwèt njôg à num ze mat ghakelèn Nsi, ke b'a num ze mat ba Yuda là, mb'o ku'ni nenànte ghakelèn Nsi ndù bo yôg mba ba Yuda l'a ndùke?

¹⁵Be b'a kua' ko' ba Yuda, ke b'a ben kebwô, ghakelèn Nsi.

¹⁶Là bag à bin lèn ndù mènntùn ke' tù' mèn netsin à num mfa' ntshù', là nda' njam bamntù num Yésu Kristô, mba be ze be lo bam Kristô Yésu, ndùlala ndù be tù' ben netsin njam bamntù num Kristô, ke b'a num mfa' ntshù', nummbe sàm mèn ke nsi tù' mèn netsin num mfa' ntshù'.

¹⁷Là, a be ze be tse be num ndiag netù' ben netsin num Kristô là, b'a ben kebwô là, mba ndùlala b'a ndù Kristô b'a ngafa' nukebwô ké? A ke b'a ndùlala.

¹⁸Nummbe a be ze tu wul àm bèn nkut ju ze me na' nsate là, mba me lo' tu wul àm mba ngabagte ntshù' là.

¹⁹Nummbe njam ntshù', me lo kwù num ntshù', ndùlala ndù me yôg num Nsi. Bo lo kwimt'àm bag Kristô num fanta'tù.

²⁰A ke b'a me bèn mbèn nke njôge, là, a b'a Kristô z'a tshwèt njôg num àm nà. Ndonni, me ke njôg à ntùm mbàb wut, mbèn nke njôg à ntùm bamntù num Mén Nsi z'a kô àm, mbèn mfà tu wul i num tu àm nà.

²¹Me ke ghua' kondèn Nsi; nummbe a be ze nunetsin b'a njam ntshù' là, mba Kristô kwù à banban.