Read Medumba Galatia 4 Bible Online

Galatia 4 - Medumba bible

Galatia 4

¹Là me tshob ndù: Njoṅ ngelaṅ fa njùndà ke' à mônke' là, mba fagte ke netèl i bo nkuan, mba mb'a be tàndà là,

²a ke' à tun ngakwiagt'é mba ngalé' tshu, tà nkum lé'njù se tà na' njab là.

³Be ndaṅndaṅ mba be ze be lo be kuan tshu njù ngelaṅ be na' nke' bônke' là.

⁴Là ngelaṅ lo ku'u, Nsi tum Mén i, ze mènnzwi bwe i là, ze bo bwe i tun ntshù' là,

⁵ndùlala ndù a tshu' ben tse bo be tun ntshù' là, ndù bag à bin kwé nekwiagte.

⁶Mba bin b'a bon tse là, Nsi lo tum Ywèt Mén i ntùm ntù be, ts'a num nkua' ndù: Abba, Tà, là.

⁷Ndùlala, o ke' bèn mb'a nkuan, là o b'a njùndà njam kondèn Nsi.

⁸A lo be mo' ngelaṅ bin ke lèn Nsi, bin lo ke mfa' ba nsi neto, tse bo ke' b'a ko' Nsi là.

⁹Là ndonni ze bin lèn Nsi là, a bwô netshob à ndù, bin tse Nsi lèn zin nà, bin ghù nebèn mbèn njam tshen tshu nebot mba tse nebwoṅ nà, nebèn mfa' bo à ndùke?

¹⁰Bin num nze ba lé'njù, ba maṅwù, ba ngelaṅ, ba ngu'njù.

¹¹Me bwôg ndù mo' ndù me na' mfà' netèt bin à banban.

¹²Fèt tshàm, me le'te zine, bin be mba me là, nummbe tu wul àm, me b'a mba bin nà. Bin lo ke ghù sàm nukebwô me.

¹³Bin lèn ndù ngokèl àm bèn ngù kà me ntshob nkùn mebwô bin mbwe i.

¹⁴Ntùm laṅte ze ngokèl àm yab zin bwe là, bin lo ke wag àm, ke kél àm, là bin lo lo' àm mba Angél Nsi là, mba Kristô Yésu là.

¹⁵Ju z'a na' mfà nku'ni bin nà yà? Nummbe me kwé nta min ndù a na' mbe ndù bin lo ku'ni, mba bin lo tsho' miag min mfà me.

¹⁶Ndonni me b'a ngakeban zin mba me tshob nunenùn bin nà ké?

¹⁷Nkôni ze bo ghù num bin nà ke' bwô, là bo ke nkô à nesô zin ndù bin kô yube.

¹⁸A bwô neghù nkôni num ju z'a bwô là njoṅ ngelaṅ fa, ke b'a nda' ngelaṅ ze me be netèt bin nà.

¹⁹Bon tshàm, me tshwèt mbèn njen ya nebwe tà kum ngelaṅ Kristô te wul i netèt bin nà,

²⁰me lo nke nkô nebe netèt bin ndonni, mbate là ntshobe; nummbe me tshwèt nywin num bin.

²¹Bin soṅ àm, bin tse bin tshwèt nkô nebe tun ntshù' là, bin ke' ju' ntshù' ké?

²²Nummbe bo kite ndù Abraham lo ghù bon bàa, mo' bo nkuan, mo' bo ko' mènnzwi.

²³Là, mén nkuan bo bwe i num ze mat mbàb wut; mén ko' mènnzwi, bo bwe i à njam nka'ni.

²⁴Yen ni b'a nkùt; nummbe tshen bènnzwi li b'a nkàn mbàa; mo' b'a kàn mbat Sinaï, nke mbwe bon num kuan, a b'a Hagar;

²⁵là mbat Hagar, Sinaï b'a ntùm ngô Arabia, a b'a mba Yérusalém z'a be ndonni là, nummbe Yérusalém b'a nkuan boa bon tse.

²⁶Là Yérusalém z'a be mfe tù là ke' b'a nkuan, a yi bèn mbe mà be.

²⁷Nummbe bo kite ndù: Tsiaṅte me kebwe, wù z'o ke' bwe là, ṅwate ntùm tsiaṅte, kua' wù z'o ke' yen ya nebwe là, nummbe bon yàm b'a tse ghua' mènnzwi ntshùa tse mènnzwi ndu.

²⁸Fèt tshàm, mba bin nà, bin b'a bon nka'ni mba Isak là.

²⁹Là ndaṅndaṅ mba mén ze bo bwe i num ze mat mbàb wut ke ntsho' nku mén ze bo bwe i njam Ywèt kebàn num yen ngelaṅ nà là, a b'a be ndaṅndaṅ sènni.

³⁰Là ṅwa'ni Nsi num ntshob ndùke? Ta' nkuan mba mén i; nummbe mén nkuan ke nsi jù ndà bo mén ko' mènnzwi.

³¹Fèt tshàm, ndùlala bag à bin ke' b'a bon nkuan, là tse ko' mènnzwi.