Read Medumba Galatia 5 Bible Online

Galatia 5 - Medumba bible

Galatia 5

¹Kristô na' ntshu' be à ndù be tum kuan, ndùlala bin tshùb wut tsine, ke bam ndù bo bèn ma' zin ntùm lèt kuan.

²Tu wul àm Paulo, me tshob bin ndù: A be ze bin si ket là, mba Kristô ke nsi ywimte zin sàm ju.

³Me bèn ntshob njoṅ benntùn fa tse bo tshwèt nsi ket là mo' yoṅ i ndù: A b'a njo tu bo neze njoṅ ntshù' fa.

⁴Bin bi Kristô, bin tse bin tshwèt ndiag nunetsin ntùm ntshù' là; bin vù nsi nummbe bin tum ntùm nkôni Nsi.

⁵Mba bag là, Ywèt bèn nke ngù bag mbéb nenywinte nunetsin njam bamntù.

⁶Nummbe num Kristô Yésu nesi ket ke nebe ke si ket lo ke' b'a sàm ju, là nda' bamntù z'a be mfà njam nkôni là.

⁷Bin lo to' nekù nde mebwô; we z'a tshètte zin ndù kà bin ju' ntshu nenùn à?

⁸Yen nkwate nekaṅ mèn nà ke' fe à mèn z'a tsiaṅ zin nà.

⁹Metsit ntsha' num ngù njoṅ bàn fa ko'.

¹⁰Num Tshùaben, me tshwèt nywinte num bin ndù bin ke kwate mo' mat ghua. Mbe se' mba mèn z'a tshwèt ntshu' tu zin nà, a yi nsi bèn vù ntsha, k'a b'a mba we lo.

¹¹Fèt tshàm, mba me là, a be ze me bèn ntshob nesi ket là, mba bo bèn nke ntsho' nku màm kebàn à numke? Ndùlala nefa'te fanta'tù mi!

¹²A lo mbwô ndù ben tse bo tshwèt ntshu' tu zin nà keb wut tshobe!

¹³Fèt tshàm, bo na' ntsiaṅ zin à ndù bin tum kuan, nda' ndù kà bin lo' Ywèt netum kuan nà mba dù' neyi'te bwe, mfa' mbàb wut là, là bin tshùa njam nkôni nke mfa' netèt bin, bin bin.

¹⁴Nummbe njoṅ ntshù' fa bumte ntùm ta' ntshob ntshù'; men ni ndù: Kô mèn z'a ghebte mbaṅ o là mb'o num nkô tu wul o là!

¹⁵Là, a be ze bin num nke ntshôgte mbèn mfèt wut tsin bin bin nà, bin zete ndù kà bin sate wut tsin bin bin.

¹⁶Ndùlala me tshob bin ndù bin zin ntùm Ywèt mba bin ke nsi fa' ghe'te mbàb wut.

¹⁷Nummbe ghe'te mbàb wut b'a ngakeban Ywèle; Ywèt b'a ngakeban mbàb wut; bo num mbàn netèt bo, ndùlala ndù kà bin ghù ju ze bin kô là.

¹⁸Là, a be ze Ywèt bèn nke ntshagte zin nà, mba bin ke' b'a tun ntshù'.

¹⁹Là mfa' mbàb wut num nda'te wul i, a b'a men ni ndù: Nekale, yôg ṅu'u, yôg ngùa,

²⁰nefa' nsi neto, nu ka, kebàn, ntsha, ghe'te, tshùagntù, nediag ntsha, fagte, nkwate nzenze,

²¹miag ghe'te, nebum ndu', nejù yàme, mba tsemo' tshu ts'a fute tshen ni là; me bwôgmbwe ntshob bin, me lo à to' tshob bin ndù ben tse bo num ngù lèn tshen tshu li là ke nsi ghù yub bag i ntùm nufen Nsi.

²²Là ntàm Ywèt b'a nkôni, tsiaṅte, fite, fènntù, bwôntù, nku'ni, bamntù,

²³nefite, nebe mèn; ntshù' ke' b'a ngakeban tshen tshu li.

²⁴Ben tse bo b'a tse Kristô là lo kwimte mbàb wut num fanta'tù boa nukebwô tse, mba ghe'te tse.

²⁵A be ze bag à bin ke njôg à ntùm Ywèt là, bag à bin zin à ntùm Ywèle.

²⁶Kà bag à bin diag nkuni banban, kà bag à bin ke nkam ntsha be be, ke bèn nke nge'te netèt be, be be.