Read Medumba Efésô 1 Bible Online

Efésô 1 - Medumba bible

Efésô 1

¹Me Paulo, ngantum Kristô Yésu, njam ze nekô Nsi, me kite yen ṅwa'ni li à ben nelàn tse bo be Efésô là mba ben tse bo bam Kristô Yésu là.

²Kondèn mba fite z'a fe Nsi Tà be, mba Tshùaben Yésu Kristô là be bin.

³Ghamte be Nsi mba Tà Tshùaben be Yésu Kristô, z'a naṅ njoṅ mbotni Ywèt fa ts'a mfe kamànyam nà num be, num Kristô là.

⁴Be ndaṅndaṅ, a lo bwôgmbwe ntsho' be num i kà nabte njù, ndù be be nelàne, ke lo' mbwe i,

⁵ntùm nkôni, a lo nabte be tà fe mbwe, ndù be bèn ntù' bon ts'a kwiagte là njam Yésu Kristô; yen ni b'a mb'a bwô i ntùm ze nekô là;

⁶bag nyàmte nkuni kondèn i z'a fà be num ngankôni i là.

⁷Bag à bin ghù netshu' num i njam lem tse, ngù nelagte mfànnu be njam kondèn i ze ndùb,

⁸kondèn z'a na' mfètte num be ntshùate ntùm njoṅ zenu fa mba njoṅ nelèn fa,

⁹ngù be lèn tsham ze nekô, ndaṅndaṅ mb'a bwô i, a nabte njab tà fe mbwe ntùm ntù i là.

¹⁰A nsi ghù njoṅ i fa ngelaṅ lé'njù nsi dune, a tamte njoṅ tshu fa ts'a be mfe kamànyam mba num nsitsha' là, te njam Kristô z'a be tu là.

¹¹Bag à bin lo tù' jùndà num i, ndù Nsi lo à tsho' be, ndaṅndaṅ mb'a be ntùm nkwatenu mi là, yi z'a be ngù njoṅ i fa ntùm ko' ze nekô,

¹²ndù be nyàmte nkuni mi, be tse be num nywinte num Kristô tà fe mbwe là.

¹³Mba bin lo ju' ntshob nenùne, nkùn mebwô z'a yôg zin nà num i; bin lo bam i, bo san zin Ywèt Nelàn tse Nsi na' nka' là;

¹⁴tshen Ywèt là b'a tsho'tu ntsi' be tà kum ngelaṅ be nsi kwé netshu' z'a be ntsi' be là, ndùlala ndù be nyàmte nkuni Nsi.

¹⁵Mba me yàm lo ju' bamntù zin num Tshùaben Yésu, mba nkôni zin num ben nelàne,

¹⁶a ndùlala, me ke' tsin nelabte Nsi num bin, nke ntsi lén sin ntùm nde'te Nsi.

¹⁷Ndùlala ndù Nsi Tshùaben be Yésu Kristô Tà nkuni fà Ywèt zenu mba làn miag bin ndù bin lèn i,

¹⁸mfà nka' miag ntù tsine, ndù bin lèn nenywinte ze netshaṅ i te mbwe bin nà, mbèn ndèn nkuni ndùb mi a be ntùm ntsi' mi mi a lem ben nelàn nà,

¹⁹mbèn ndèn neta i ze ndùb z'a tshùate là, num be tse be bam nà, ndaṅndaṅ mba ngù' i ze ndùb,

²⁰la'te fa' se num Kristô là: A lo bam i num vù, nte i num bag bu i ze zwim mfe kamànyam,

²¹nte i mfe tù num njoṅ netô fa, njoṅ ngù' fa, njoṅ neta fa, njoṅ tshùaben fa, mba njoṅ ndèn fa mi bo tswi, ke b'a nda' ntùm yen njù li, mba ntùm z'a nsi se' là.

²²A lo ma' njoṅ tshu fa tun nku mi, mfà i mba ju z'a tshùa njoṅ tshu fa là num ntse'te benkristô,

²³z'a be wul i, mbe nedun mèn z'a num ndunte njoṅ i fa num njoṅ tshu fa là.