Read Medumba Efésô 4 Bible Online

Efésô 4 - Medumba bible

Efésô 4

¹Ndùlala, me ze me be ngandàtsha num Tshùaben nà, me tsiaṅ zin ndù bin zin mb'a ku'ni num netsiaṅ ze Nsi tsiaṅ zin yi là,

²ntùm nefà wut nsi, ntùm nefite mba ntùm nefènte, nke mfènte wut tsin bin bin ntùm nkôni,

³nke nkagtùn netswe ntùm Ywèt ntshù' ntùm nkù fite.

⁴Wut b'a ntshù', Ywèt be ntshù', ndaṅndaṅ mba Nsi tsiaṅ zin num ta' nenywinte z'a be ntùm netsiaṅ zin nà.

⁵Tshùaben b'a ntshù', bamntù be ntshù', kwéntse be ntshù';

⁶Nsi b'a ntshù', mbe Tà njoṅ benntùn fa, mba num njoṅ benntùn fa.

⁷Mba we lo netèt be kwé kondèn ntùm mfi' ju ze Kristô fà là.

⁸A ndùlala, bo tshob ndù: A lo be ko' nèn mfe tù ndo' ghandàtsha ts'a ma' yub ndàtsha là, a lo fà tshu benntùn.

⁹A lo ko'o, yen nà b'a ndùke? A b'a ndù a lo bwôgmbwe nswe' mànjam nsitsha'a.

¹⁰Mèn z'a na' nswe' là, a be yi bèn nko' nèn tà mfe kamànyam, ndùlala ndù a dunte njoṅ tshu fa.

¹¹A b'a yi bèn mfà tsemo' mba ghantum nà, tsemo' mba ghatshob ntshob Nsi là, tsemo' mba ghatshob nkùn mebwô là, tsemo' mba ghabéb mbwe là, tsemo' mba ghatswite là,

¹²ndù bo tse'te ben nelàne, ngù bo ku'ni nefa' fa', ndù bo kut wut Kristô,

¹³tà kum ngelaṅ njoṅ be fa nsi kum ntùm bamntù ntshù', mba nelèn Mén Nsi, tamte tù' kua' ko' mèn ntùm mfi' ntse Kristô z'a dun nà.

¹⁴Ndùlala ndù kà bag à bin bèn nebe bônke' tse mba zit netswite lo tshwèt nshùm be fèl i, nke nket be bag bag, ntùm tatte benntùn, ntùm nkùnkù yub, nke ndiag nefùte be là.

¹⁵Là ndù bag à bin be ben nenùn ntùm nkôni, nke nku' num njoṅ tshu fa tà nkum num z'a be tu là, Kristô.

¹⁶A num nkém njoṅ wut fa ze nga tse taṅt'é mbèn ntamt'é num i là, ngù a ku' njam fa' se mba zit kam wut lo fa' là, ndù a kut tu wul i ntùm nkôni.

¹⁷Ndùlala, me tsiaṅ zine, ntshob bin num Tshùaben ndù: Kà bin bèn nezin mba ghakelèn Nsi num nzin ntùm nkwatenu mub mi banban nà.

¹⁸Zenu yub tam njame, bo b'a mfàm ntùm yôg Nsi, nummbe nefemni ke' num bo, sagntù ke' ntù bo,

¹⁹mba tuswe ke' bèn neko yub là, bo fà wut tshob num yôg ngùa, nke mfa' njoṅ mfa' ṅu' fa ntùm ze'te.

²⁰Là bin, bin lo ke zi'te Kristô à ndùlala.

²¹A be ze bin na' nju' nu i, a be ze bo na' ntswit'é bin ntùm nenùne, ndaṅndaṅ mb'a be num Yésu là,

²²mb'a bwô ndù bin gha mbwe yôg sine, nsô njwèn mèn, nummbe ghe'te tatte bagt'é.

²³Là, a bwô ndù Ywèt ghù bin tù' ben nswe ntùm nkwatenu mine.

²⁴Ma' mèn nswe ze Nsi nabt'é mb'a bwô i là ntùm nunetsin mba ntùm nu nelàn z'a fe nenùn nà.

²⁵Ndùlala, bin faṅ tatte, mba we lo ke ntshob nenùn mèn z'a ghebte mbaṅ i là, nummbe bag à bin b'a nkam wut, be be.

²⁶Bin ya ntù, là kà bin ghù nukebwô: Kà lagnyam bi, ke be ndù yantù zin mi;

²⁷kà bin fà dù' Satan!

²⁸Kà mèn z'a be njé là bèn neyi, a bwô ndù a fa' fa' mbu mi, ngù ju mebwô ndù a ywimte mèn z'a bwoṅ yi là.

²⁹Kà sàm ntshob kebwô tum ntshu bin, là bin tshob ntshob mebwô num nekut ben ts'a bwoṅ bo là, ndùlala ndù a fà kondèn ben tse bo tshwèt nju' là;

³⁰kà bin fà yantù Ywèt Nsi tse Nelàn tse bo na' nsan zin ntùm bwe mum lé'njù netshu' là,

³¹a bwô zwentù, tshùagntù, yantù, tshu'te mba tshabte boa njoṅ nukebwô fa mi netèt bin.

³²Bin be ben mebwô mba ghakondèn, bin bin, mba Nsi lagte nukebwô tsin num Kristô là.