Read Medumba 1 Tésalônikà 2 Bible Online

1 Tésalônikà 2 - Medumba bible

1 Tésalônikà 2

¹Fèt tshag, tu wut tsin lèn mba yag nese' la' bin na' mbe là, a lo ke b'a banban.

²Bag lo bwôgmbwe njen nge' mba tshabte Filipi, mba bin lèn nà, là bag lo fèn ntù num Nsi be, ntshob nkùn mebwô Nsi netèt ntsho yàme.

³Nummbe ntag mag ke' b'a mi tatte, mi kelàn mba mi fùte,

⁴là mba Nsi laṅte yag njen ndù bag ku'ni, mfà nkùn mebwô bag là, bag ke ntshob à be ndaṅndaṅ ke b'a ndù bag bwô benntùn, là ndù bag bwô Nsi z'a num ndaṅte ntù tshag là.

⁵Bag lo ke to' be ntùm ntshob netatte mba bin lèn nà, ke bèn mbe ntùm nkwate neze'te netèt bin, Nsi b'a nkwénta,

⁶bag lo ke diag ghamte z'a fe benntùn nà, ke z'a fe bin ke tsemo' benntùn nà lo,

⁷mba mba bag na' nku'ni nebe lèt bin mba ghantum Kristô là, là bag lo be ben nefite netèt bin; mba mà be nkém bon tse là,

⁸be ndaṅndaṅ bag lo kô zine, nkwate ndù a bwô nefà nkùn mebwô Nsi bin, ke b'a nda' nkùn mebwô, là mba yôg sage, nummbe bin lo tù' fètfèt tse nkôni bag.

⁹Fèt tshag, bin kwimte fa' sage, mba ngùtni yag: Bag lo be tshob nkùn mebwô Nsi bin, nke mfa' tèttswe' mba mbwôgtshù ndù kà bag be lèt sàm mèn netèt bin.

¹⁰Bin b'a ghakwénta, mba Nsi, ndù bag lo be nelàne, netsine, ke lo', netèt bin, bin tse bin na' mbam nà;

¹¹be ndaṅndaṅ bin lèn ndù bag lo lo' mba we lo netèt bin mba tà be ndo' ko' bon tse là, nke ntagte zine, nke mfà fènntù bin,

¹²nde'te zin ndù bin zin mb'a ku'ni num Nsi z'a tsiaṅ zin num ko' nufen se mba nkuni mi là.

¹³A ndùlala, mba bag num ndabte Nsi ke tsin, mba bin na' nkwé ntshob Nsi mi bag na' ntshob netèt bin nà; bin lo kwé i, ke b'a mba ntshob benntùn nà, là ndaṅndaṅ mb'a be là, ndaṅndaṅ mba ntshob Nsi mi a tshwèt mfa' num bin tse bin bam nà.

¹⁴Fèt tshag, bin lo tù' ghafi'te ba ntse'te ben Nsi tse bo be mà Yudéa num Kristô Yésu là, nummbe mba bin zin lo yen be lèn nge' ntshù' bu ko' ba la' bin, mba tu wut tshob na' njen nge' bu ba Yudéa là.

¹⁵Tshen ben nà lo zwi Tshùaben, z'a be Yésu là, nzwite ghatshob ntshob Nsi mbèn ntsho' nku mag kebàn, bo ke' be diag nebwô Nsi, bo b'a ghakeban njoṅ benntùn fa,

¹⁶nke ntshètte yag netshob ntshob Nsi ghakelèn Nsi ndù bo yôge, ndùlala ndù bo zwiagte nukebwô tshob njoṅ ndù fa, là yantù lo se' num bo tà nèn miagte.

¹⁷Fèt tshag, mba bag na' nkag zin mba bontse là num miag ke b'a ntùm ntù num mo' metsit ngelaṅ nà, bag tshwèt nànte kua' neshu neyen miag mine, ntùm kùntù yàme.

¹⁸A ndùlala, bag lo ke nkô nese' la' bin, tu wul àm Paulo lo ke nkô nese'e, ke b'a yoṅ ntshù', là yoṅ bàa, là Satan tshètte yage.

¹⁹We z'a be yag nenywint'à? Tsiaṅte yag à? Ntsho'ngu' mag à? A ke b'a bin ké? Bag ke nsi ta' nsoṅ à num bin mbwe Tshùaben be Yésu, ngelaṅ z'a nsi se' ntùm nkuni mi là ké?

²⁰Ṅ, bin b'a ghamte yag mba tsiaṅte yag.