Read Medumba 1 Tésalônikà 3 Bible Online

1 Tésalônikà 3 - Medumba bible

1 Tésalônikà 3

¹A ndùlala, bag lo ke bèn nku'ni nefènte, njen ndù a bwô neghô Atèn tù' bag,

²là ntum Timôtio, mfèt be, ngafa' Nsi ntùm nkùn mebwô Kristô, ndù a fà tànntù bin, ntagte zin num nu bamntù zine,

³ndùlala ndù kà sàm mèn nyi'te num tshen nge' là, nummbe mba bin lèn ndù bo lo yab be à num bwe.

⁴Ngelaṅ bag na' mbe la' bin nà, bag lo tshob bin ndù bag à bin nsi yen nge'; yen nu là lo bumte mba bin lèn nà.

⁵A ndùlala, tu wul àm lo ku'ni nefènte, me lo tum ntum la' bin ndù me ju' tshô bamntù zine; me lo nywinte ndù ngalaṅte ke laṅte zine, ndù fa' sag ke' tù' banban.

⁶Là ndonni, Timôtio fe la' bin nse' mbaṅ bag, nsoṅ yag ndù bin num nkwimte yag kua' mebwô njoṅ ndù fa, nke nkù ntù neyen yage, mba bag num nkù ntù neyen zin nà.

⁷Fèt tshag, a ndùlala bin lo fite ntù tshag ntùm ngùtni mba nge' yag, njam bamntù zine,

⁸ndonni bag bèn mb'a ntùn, mba bin ghô num Tshùaben nà.

⁹Ke lèn ndab mi be bag fà Nsi num tu bin, num njoṅ tsiaṅte fa ze bag num ntsiaṅte num bin mbwe Nsi be l'à?

¹⁰Bag num nde'te Nsi neshu tèttswe' mba mbwôgtshù, ndù a bam bag yen miag mine, mba ndù bag zwiagte ju z'a tsi bamntù zin nà.

¹¹A bwô ndù tu wut Nsi, Tà be mba Tshùaben be Yésu la'te manze bag se' la' bin.

¹²Mba bin nà, Tshùaben ghù bin ku' ntshùate ntùm nkôni ze bin ghù bin bin mba num njoṅ benntùn fa, ndaṅndaṅ mba bag ghù yen nkôni là num bin nà.

¹³Tshùaben fà tànntù ntùm ntù tsine, ngù bin be ke lo' ntùm nelàne mbwe Nsi, Tà be, ngelaṅ Tshùaben be Yésu nsi se' ntùm nkuni mi boa njoṅ ben tse tse nelàn fa là.