Read Medumba 1 Tésalônikà 4 Bible Online

1 Tésalônikà 4 - Medumba bible

1 Tésalônikà 4

¹Fèt tshag, ndonni bag le'te zine, ntsiaṅ zin num lén Tshùaben Yésu: Me lo tswite zin mb'a bwô ndù bin zine, kà mbwô Nsi là, a ndaṅndaṅ mba bin tshwèt nzin nà, bin ghù ntshùate.

²Nummbe bin lèn ntshù' mi bag na' mfà bin njam Tshùaben Yésu là.

³Ju ze Nsi kô là b'a zin nelàne, bin kù kat,

⁴mba we lo netèt bin ke ndèn nenabte ko' wul i ntùm nelàne, mba ntùm nenùne,

⁵ke b'a ntùm kùntù ghe'te mba ghakelèn Nsi tse bo ke' lèn Nsi là.

⁶Kà mba we lo tôg mfi', ke fùte wul i ntùm ze'te, ntùm ntàne, nummbe Tshùaben num njagte mba' num lèn tshen nà, ndaṅndaṅ mba bag na' ntshob bin, mbèn nkwé nta là.

⁷Nummbe Nsi lo ke tsiaṅ be à num yôg kelàn, là ntùm yôg nelàne.

⁸A ndùlala, mèn z'a wag là, ke wag à mènntùn, là, a wag à Nsi, yi z'a so Ywèt tse tse Nelàn num bin nà.

⁹Mbe se' mba num nkôni fètfèt là, a ke' ywimte nebèn nkit'é bin. Nummbe Nsi lo tswite zin neghù nkôni bin bin;

¹⁰bin num ngù be ndaṅndaṅ num njoṅ fètfèt fa tse bo be ntùm njoṅ ngô Makédônia fa là. Fèt tshag, bag tsiaṅ zin ndù bin ghù ntshùate,

¹¹bin yab ghamte zin ntùm yôg fite, nke nabte ko' tsin tshu, nke mfa' fa' mbu mine, mba bag na' ntshob bin nà,

¹²ndùlala ndù bin zin mb'a bwô là mbwe ba njù, ke ke ngùtni sàm mèn.

¹³Fèt tshag, bag ke' kô nelem zin nu num ben tse bo kwù là, ndùlala ndù kà bin tswe nenywin mba tsemo' ben tse bo ke tshwèt nywinte là.

¹⁴Nummbe, a be ze bag à bin bam ndù Yésu kwù, mbèn ndo num vù là, bag à bin bèn mbam ndù Nsi nsi tshùa njam Yésu, sô ben tse bo kwù là bo à bo.

¹⁵Tshù, yen ni b'a ju ze bag ghù netshob bin njam ntshob Tshùaben nà. Be tse be ke' ntùn, tse be ke' njôge, tà kum ngelaṅ Tshùaben nsi se' ntùm nkuni mi là, bag à bin ke nsi kwé mbwe ben tse bo kwù là.

¹⁶Ngelaṅ ze nze mfen ba Angél nsi tshobe, nze nta Nsi tô là, tu wut Tshùaben nsi swe' mfe kamànyam; ben tse bo kwù num Kristô là nsi bwôgmbwe lo num vù,

¹⁷mbatte be tse be ke' ntùn, tse be ke' njôg là: Bag à bin bo nsi tamte, ba Angél ket be ntùm ndot ndù be à Tshùaben bumte mfe tù; ndùlala be nsi ghô be à Tshùaben njoṅ ngelaṅ fa.

¹⁸Bin tswe'te ntù tsin bin bin ntùm men ntshob li.