Read Medumba Yoshua 14 Bible Online

Yoshua 14 - Medumba bible

Yoshua 14

¹Tshù tsha' tse bon Israél na' nkwé ntùm ngô Kanaan mba ntsi' li. A b'a ndaṅndaṅ mba Eléazar ngale'te bo Yoshua nshum Nun, boa fenfen tunndà nzwit Israél na' ngabte bo là.

²Bo tam tô kà ndo' ngabte yi ndaṅndaṅ mba Tshùaben na' ntshob Mosé mfà num tshé' nzwit bwe'e kam nà.

³Nummbe Mosé lo fà tse tsha' nzwit bàa kam mo' yoṅ Yordan; nda' ndù a lo ke fà tsha' nzwit Lévi.

⁴Manasé bo Efraim tse nshumnshum Yosèf lo tamte mbe yub nzwit benntùn bàa. Bo ke fà tsha' ben Lévi ntùm ngô, mb'a b'a nda' dù' tusô num netswe bwe, bo dù' z'a njamnjam nà ndù nyàm tshob ke mfèt bwe, tshu tshob ke mbe bwe.

⁵Ba Israél ghù ju ze Tshùaben na' ntshob Mosé là, ngabte ngô.

⁶Ndùse bon Yuda se' ntèt Yoshua Guilgal là, Kaléb nshum Yéfoné ze Kénizia tshob yi ndù: O lèn ju ze Tshùaben na' ntshob Mosé mèn Nsi Kadèsh-Barnéa num yàm tu mba num yu là.

⁷Me lo ghù ngu'njù ṅam nkuà ndùse Mosé ngafa' Tshùaben na' ntum àm, me lo Kadèsh-Barnéa nèn tsha' ngô là. Me lo soṅ i nunenùn num njoṅ nu fa.

⁸Fèt tshàm tse bag à bo be là lo kag bwôg mum ngô, là tu wul àm, me lo be yàm à be kua' njam Nsi àm.

⁹Mosé lo nu ngu sen lé'njù là ntshob ndù: Tsha' ts'o lo nyiaṅte nku mu là nsi b'a yu bo ze bon tsho njoṅ ngu'ngu' fa, nummb'o lo be be kua' njam Tshùaben Nsi àm.

¹⁰Ndonni Tshùaben kabte yôg sàm mb'a na' ntshob là. Ngu'njù ntshob tàn ṅam nkuà tôg fe mba Tshùaben na' ntshob yen nu là Mosé là. A na' mb'a ndùse bo ke nzin num kônkwa là. Ngu'njù tshàm be ndonni à ntshob tàn ṅam fome.

¹¹Ngù' z'a ke' me là b'a be lèn ze me na' ngù ndùse Mosé ke ntum àm nà. Me ke nke' nju' à be lèn neta ze me na' ngù ndùse là num àm, k'a b'a num ntsho, ke nenèn mo' ntum ghua lo, k'a b'a nenèn ke nefe lo.

¹²A ndùlala, a bwô ndù o fà mbat ze Tshùaben na' ntshob ndùse là me. O lo ju' ndù ba Anakim ke ntswe à bwe, ndù ntusô ndùb mi bo kut kàbngô bwe là num bwe; là, a be ze bag Tshùaben bèn mbe là, mba m'a' tswe nkwé yen ngô là mb'a na' ntshob là.

¹³Ndùlala Yoshua yab kàn, tam ntse Kaléb nshum Yéfoné, mfà Hébron yi mba mi ntsi' là.

¹⁴A ndùlala ze Hébron ke' a be tsha' Kaléb nshum Yéfoné, ze Kénizia tà nkum sènni là. A b'a nummb'a lo b'a be kua' njam Tshùaben Nsi ba Israél.

¹⁵Bo na' nke ntsiaṅ Hébron mo' ngelaṅ a Kirjat-Araba. Araba na' mb'a neta mèn netèt ba Anakim. Fe ndùke lo ngô na' mb'a ntùm fite, ke ke nde' ntsho.