Read Medumba Yoshua 22 Bible Online

Yoshua 22 - Medumba bible

Yoshua 22

¹Yoshua tsiaṅ ben Rubèn, ben Gad bo kam ben Manasé.

²Ntshob bo ndù: Bin be nze njoṅ i fa ze Mosé ngafa' Tshùaben na' nkite bin nà, mbèn nke nju' ntshu num mba ke lo ze me tshob bin nà.

³Bin ke' ghua' fèt tsin fe ndùke lo neto' fe yen ngelaṅ nà tà nse' nkum sènni; bin lo ze ju bo tshob bin nà boa ntshù' Tshùaben Nsi zin.

⁴Ndonni ze Tshùaben Nsi zin ghù fèt tsin ghù fite, mb'a na' ntshob là, bin bèn njam ntùm tsin ntàb, ntùm zin ko' ngô, ze Mosé ngafa' Tshùaben na' mfà bin mo' yoṅ Yordan nà.

⁵A bwô nda' ndù bin ke nze mbèn nke ntshùb ntag boa nkàn mi Mosé ngafa' Tshùaben kite bin nà. Bin kô Tshùaben Nsi zin, nke nzin num njoṅ tse manze fa. Bin ke ntshùb ntshù' mi, bin lat wut num i, nke mfa' yi njoṅ ntù zin fa, nke mfa' yi njoṅ ntù zin fa bo njoṅ zwiag sin fa.

⁶Yoshua tam ntse bo, ndé'te yube, bo lo nèn ntùm ntàb tshobe.

⁷Mosé lo fà ntsi' mo' kam nzwit Manasé Basan, Yoshua bèn mfà ntsi' kam i z'a tù' là netèt fèt tse mo' yoṅ Yordan, yoṅ i z'a be mbinyam nà. Yoshua tam ntse bo, mbe lé'te yub ntshob bo ndù:

⁸Bin lo' tshunkàb, nyàm yàm tse bin ghù là, silba yàm tse bin ghù là, gol, tùn meba, tùne bo nzwe, nèn yi ntùm ntàb tsine. A bwô ndù bin a fèt tsin ghabte ntsha' ghakeban tsine.

⁹Bon Rubèn, bon Gad boa bon kam nzwit Manasé bèn njam, bo faṅ bon Israél Silo, ntùm Kanaan, nèn ntùm ngô Galad z'a be tshob tsha'a, dù' ze bo na' ntete bwe, ndaṅndaṅ mba Tshùaben na' ntshob Mosé là.

¹⁰Ndùse bon Rubèn, bon Gad boa bon kam nzwit Manasé kum ntaṅla' mi a be mbaṅ Yordan, mb'a be tsha' Kanaan nà, bo bom ta' tômbwôg le'te mbaṅ Yordan; sen tômbwôg là lo zi neshu num miag mba we lo.

¹¹Bon Israél ju' bo nke ntshob ndù bon Rubèn, bon Gad boa bon kam nzwit Manasé bom tômbwôg mbwe Kanaan, ntùm ntaṅla' mi a mbaṅ Yordan, mb'a num ze yoṅ bon Israél là.

¹²Ndùse bo ju' ndùlala, njoṅ mbumte bon Israél fa tamte Silo num neko' ma' yub ntsho.

¹³Bon Israél tum Finéas, nshum Eléazar ngale'te mbaṅ bon Rubèn, bon Gad boa bon kam nzwit Manasé, ntùm ngô Galad.

¹⁴Finéas nèn boa kamkam ntu gham, ta' nkam num ta' tunndà tà, num mba zit nzwit Israél lo; njoṅ yub fa fenfen netèt tunndà Israél tse bo yàm neshu là.

¹⁵Bo nèn mbaṅ bon Rubèn, bon Gad boa bon kam nzwit Manasé ntùm ngô Galad, ntshob men ntshob li bo ndù:

¹⁶Tshù ju ze mbumte ben Tshùaben fa tshob li: Yen nebe ke ju' ntshu ze bin ghù num Nsi Israél, ndo' mvèn zin ntam Tshùaben yi ndonni, mbom ta' tômbwôg num nelo' nta tu yi Tshùaben sènni là la't'a ndùke?

¹⁷Nukebwô Peor ze be ke' yoṅ nsôg ndàn num nu tse, mba mba nge' i na' ntsho num mbumte ben Tshùaben fa là ke' ku' ndùlala ké?

¹⁸Kà bin tshwèt ndo' tsin mvèn zin ntam Tshùaben yi à! A be ze bin ta tu Tshùaben sènni là, mba yantù i nsi kam num mbumte ben Israél ndamnjù.

¹⁹A be ze ngô bo fà bin b'a ze ke làn num miag min nà, bin dut nèn ntùm ngô z'a be ze Tshùaben, bo te Dù'ntswe i bwe là, nte netèt bag; a ke' bwô ndù bin ta tu Tshùaben, ke bèn nta tu bag, mbom mo' tômbwôg, k'a ke b'a nda' se Tshùaben Nsi be.

²⁰Ndùse Akan nshum Zérak na' mbe ke ju' ntshu, ndo' ju ze bo tam ntshù' bwe là, yantù lo ke kam a num njoṅ mbumte bon Israél fa ké? A ke nda' yi na' nkwù num mfànnu mi.

²¹Bon Rubèn, bon Gad boa bon kam nzwit Manasé bùnte fenfen tunndà Israél ndù:

²²Nsi Nganeta Ntshùate, Tshùaben Nsi Nganeta Ntshùate z'a be Tshùaben nà lène, mba Israél nsi lène. A be ze bag ta tu, ke bam neju' ntshu Tshùaben nà, a faṅ nà, ke ywimte yag sènni.

²³A be ze bag bom tômbwôg à nelo' mvèn yag ntam Tshùaben nà, a be z'a b'a neke nton nyàm bwe, nke naṅ ndu' bwe bo neke mfà tshule'te tse ma' mbu bwe là, mb'a bwô ndù tu wut Tshùaben bètte yag ntun mi.

²⁴Bag ke mbwôg à ndù kà bon tsin zi ntshob tshag bon ndù boa Tshùaben Nsi Israél ke' be num mo' nu.

²⁵Bin yen mbe Tshùaben lo' Yordan ngù ndùnsi yi netèt bin. Bin bon Rubèn boa tse Gad ke mbu bàn bin à Tshùaben. A ghù netôg ndùlala bon tsin ta' tshage, ke bam ndù boa bo ke ntamte mfa' Tshùaben.

²⁶Ndùlala na' mbèn ngù kà bag ntshob ndù a bwô bag bom ta' tômbwôg, ke b'a num neton nyàm bwe ke nefà tshule'te bwe lo.

²⁷Là ndù a be kwénta netèt be bag à bin, netèt bon tshag boa tsine, ndù be ke mfa' à Tshùaben, ntùm neton nyàm yi, ntùm nefà tshule'te yi boa tshule'te tse nema' mbu. Mbwôg ndù kà bon tsin tshag ndamnjù ntshob bon tshag mbe boa Tshùaben ke mbu bàn.

²⁸Ndùlala, a be ze bo tshag ndamnjù, ntshob lèn men ntshob là bag, ke bon tshag lo là, mba bag kwate ndù bag nsi bùnte bo ndù: Bin lôte tômbwôg Tshùaben se tà tshag na' mbom be njene. A ke b'a num neton nyàm bwe ke nefà tshule'te bwe lo. Là, a b'a ta' kwénta netèt be.

²⁹Ndonni bag ke' ghù tshag nkwate tu bag neta tu Tshùaben ke neghua' fa' se lo kà mbom tômbwôg num neton nyàm bwe, nefà ju bwôntù bwe boa tshule'te. Bag ke' wag tshag tômbwôg Tshùaben Nsi yag s'a be mbwe Dù'ntswe i là!

³⁰Ndùse bo ju' ntshob bon Rubèn, bon Gad boa bon kam nzwit Manasé là, nu bwô Finéas ngale'te boa kamkam mbumte, fenfen tunndà Israél tse bo se' tshag i là.

³¹Ndùlala Finéas ngale'te, nshum Eléazar tshob bon Rubèn, bon Gad boa bon kam nzwit Manasé ndù: Bag lèn sènni ndù Tshùaben num netèt be, nummbe bin ke' gha neju' i. A tshùa ndùlala bin kwé Israél ntshu Tshùaben.

³²Finéas ngale'te, nshum Eléazar boa kamkam lé'te bon Rubèn, bon Gad, ndo ngô Galad mbèn Kanaan mbaṅ bon Israél nsoṅ yub tshô.

³³Nu tse bwô yube, bo nyàmte Nsi, ke bèn ngù nkwate ne kam ngô ze bon Rubèn boa tse Gad ke ntswe bwe là ntsho.

³⁴Ndùlala bon Rubèn boa tse Gad tswi lén tômbwôg ndù Ed yen nà bagt'a ndù nkwénta, nummbe bo lo ke ntshob ndù: A b'a kwénta netèt bag, bag a Tshùaben z'a be ko' Nsi là.