Read Medumba Yoshua 23 Bible Online

Yoshua 23 - Medumba bible

Yoshua 23

¹A lo tswe neshu mba Tshùaben ghù Israél be ntùm fite là; a lo ke nkwé i ntshu njoṅ ghakeban tse fa tse bo diaṅ i mbum nà. A lo be be ndù ngu'njù Yoshua tènte, a ywèn neshu.

²Ndùlala, a tsiaṅ njoṅ ngô Israél fa, ghakwé mbwe, fenfen, ghasa'kame boa tse tàmànjô, ntshob bo ndù: Bin yen ndù ngu'njù tshàm tènte, me ywèn.

³Bin lo yen mba ke lo ze Nsi zin na' ngù njoṅ tshen ngôngô li mbwe bin nà. Tshùaben Nsi zin na' mbèn nde' ntsho num zin tu mba bin lèn nà.

⁴Bin yen mba me na' ndo' tô ngabte ntsi' bin yi, num tshen ngô ts'a na' ntù'ù, nelo Yordan boa ngôngô tse me na' mbiagte yub tà nèn nkum dibantse ndùb, nze mbinyam nà. Me lo fà tshen ngô là bin, ndaṅndaṅ mba tsin nzwit be yi là.

⁵Tshùaben Nsi zin nsi yoṅ yub mbwe bin, bin lo' ngô yub mba Tshùaben Nsi zin na' ntshob bin nà.

⁶A bwô ndù bin yab ntù zin neke nze mba ke lo ze bo kite ntùm ṅwa'ni ntshù' Mosé là, ke faṅ nze nèn bu zwim ke bu kwéb lo.

⁷Kà bin so wut mum ngô tse bo ghô netèt bin nà; kà bin tsi lén tshob nsi, ke lo' yub nkàn mfe yi, ke fa' bo, ke bèn ngwù nsi mbwe bo.

⁸Bin ke nso wul à be num Tshùaben Nsi zin, mba bin ghù tà nse' nkum sènni là.

⁹Tshùaben lo yoṅ ngô ndùbndùb ts'a ghù neta là mbwe bin; tà nkum sènni sàm mèn ke' to' tshùa zine.

¹⁰Ta' mèn netèt bin lo ke nde' ben ntsha' mbùm, nummbe Tshùaben Nsi zin lo ke nde' ntsho num zin tu mb'a na' ntshob bin nà.

¹¹A ndùlala, bin zete num yôg sine, ndù bin kô Tshùaben kua' mebwô.

¹²A be ze bin kaṅ mvèn zin, nso wut num tshen tshé' ngô tse bo be netèt bin, ntshùa njam nandà ntamte bin à bo, ntamte ntù' ke nzin à nze ntshù' là,

¹³bin lèn kua' mebwô ndù mba Tshùaben Nsi zin ke bèn neta' yub mbwe bin; bin lèn ndù tshen ngô là nsi tù' ywi' bo nkù bin, be shua' s'a ke lab nsa tsine, be njô ts'a ke sob miag mine, tà bin bite ntùm yen ngô ze Tshùaben Nsi zin na' mfà bin nà.

¹⁴Ndonni me ke nèn à num nze ze njoṅ benntùn fa ke nèn bwe là. Bin lèn njoṅ ntù zin fa bo njoṅ zwiag sin fa ndù njoṅ ntshob ntùn fa mi Tshùaben na' ntshob num bin nà bumte, ke faṅ sàm ta' i. Njoṅ i fa bumte num bin mba ta' i ntshù' ke' tù'.

¹⁵Ndaṅndaṅ mba ntshob ntùn mi Tshùaben Nsi zin na' ntshob bin bumte num bin nà, ntshob kebwô mi Tshùaben na' ntshob num bin nà nsi bumte, tà nkum ndùs'a biagte zin fa ntùm mbwô ngô ze Tshùaben Nsi zin na' mfà bin nà.

¹⁶A be ze bin fàn kàn se Tshùaben Nsi na' nkite bin, a be ze bin fa' tsemo' nsi, ngwù nsi mbwe bo là. A be ndùlala mba yantù Tshùaben nsi kam num bin, biagte zin ndende ntùm mbwô ngô z'a na' mfà bin nà.