Read Medumba Yoshua 6 Bible Online

Yoshua 6 - Medumba bible

Yoshua 6

¹Yériko na' mb'a ngô ndù a fùne, ndù a fùn mbwe ba Israél. Mènntùn lo ke be tsho bwe, ke bèn ntume.

²Tshùaben tshob Yoshua ndù: Tshù, m'a' fà Yériko wù bo mfen i, boa tse sa'nde' neta ghale' ntsho fa.

³Bin diaṅ tusô mbume, ghale' ntsho lam tusô yoṅ ntshù' mbume. A bwô o ghù ndùlala mum lé'njù ntôge.

⁴A bwô ndù ghale'te ntu sammbàa ket nta tse nze tshob ta là sammbàa nèn yi mbwe Koṅ. A mbe mbatte lé'njù sammbàa, bin diaṅ tusô yoṅ sammbàa mbume; ghale'te nsi tô nta neta.

⁵Ndùse bin nsi ju' nze medub tô neta, bin bèn nju' nta tô là, ngô nsi tshag nz'é tù tshu'te, kàbngô kôg ngwù nsi. Yen ngelaṅ nà mba we lo tsho ntùm ngô ndende num dù' z'a lo ntsin bwe là.

⁶Yoshua nshum Nun tsiaṅ ghale'te ntshob bo ndù: Bin ket Koṅ Kàn, ghale'te ntu sammbàa tsin mbwe Koṅ Kàn boa nta bu bo.

⁷A tshob ngô ze ndù: Bin nène. Bin diaṅ tusô mbume. Ben tse bo tshùb tshu ntsho là tsin mbwe Koṅ Tshùaben.

⁸Ndùse Yoshua miagte ntshob mi là, ghale'te ntu sammbàa tse bo ket nta sammbàa là to' netô kua' neta, nke nzin mbwe Tshùaben, nke ntô tshu netshobe, Koṅ Kàn Tshùaben tam njam bo.

⁹Ben tse bo tshùb tshu ntsho là lo ke nzin mbwe ghale'te ntu sammbàa tse bo ke ntô nta là, tse bo tù' njam nà be yub njam Koṅ. Bo be zin nke ntô nta.

¹⁰Tshù, Yoshua lo fà sen keki li ngô ntshob ndù: Kà mèn fà nz'é tù, kà mèn ju' nze zin; kà sàm mèn tshob nu tà nkum ngelaṅ me nsi tshob bin ndù bin kua' là! Yen ngelaṅ nà bin nsi kua'a, bu' ngoṅ ntsho.

¹¹Koṅ Tshùaben diaṅ tusô yoṅ ntshù' mbume, bo bèn njam ntùm mbàn nzi bwe.

¹²Yoshua lo nsi nkebnjù, ghale'te ket Koṅ Tshùaben.

¹³Ghale'te ntu sammbàa tse bo ket nta sammbàa là be zin mbwe Koṅ Tshùaben nke ntô nta. Ben bo tshùb tshu ntsho là nèn mbwe Koṅ Tshùaben, tsemo' tam njam bwe. Bo be zin nke ntô nta.

¹⁴A be mbatte lé'njù bo diaṅ tusô yoṅ ntshù' mbume, mbèn mbèn njam mbàn. Bo nke ngù be ndùlala mum lé'njù ntôge.

¹⁵A be num mbatte lé'njù sammbàa, bo lo nsi kua' mfôgnjù, ndiaṅ tusô mbum num yoṅ sammbàa.

¹⁶A lo be kum mbatte yoṅ sammbàa mba ghale'te ke ntô nta là, Yoshua tshob ngô ndù: Bin bu' ngoṅ ntsho, nummbe Tshùaben fà sen tusô li bin.

¹⁷Yen ngô li nsi b'a ze Tshùaben. Bo nsi biagt'é boa tshu ts'a ntùm bwe là mba Tshùaben bètte là. Nda' Rahab kàttù mènnzwi boa ben tse bo ntùm ndà i là bèn yôge, nummb'a lo lem ba ntom tse bag na' ntum nà.

¹⁸Là, bin zete nekwag ju ze bo tam bu' bwe là; nummb'a be ze bin lo' ju ze bo tam bu' bwe là, mba bin nsi ghù bo tam bu' num mbàn ba Israél, bin bèn nkag va' ntùm bwe.

¹⁹Njoṅ silba fa, njoṅ gol fa, njoṅ tshu ntùn meba fa, tse ntùne, nsi b'a tse Tshùaben. Bo nsi yab njoṅ i fa ntùm tshunkàb Tshùaben.

²⁰Ngô tshag nz'é tù, ghale'te tô nta. Ndùse ngô yoṅ nju' mba nta tô là, a bu' ngoṅ ntsho, kàbngô yoṅ nkôg ngwù nsi. Bwoṅ benntùn tsho ntùm tusô, mba we lo num dù' z'a lo ntsin nà; bo lo' tusô.

²¹Bo tam bu' ntùm tusô, nzwite njoṅ benntùn fa ntshùag ṅwi: Bandum, bènnzwi, bon boa ywèn benntùn, tà nèn nkum num nyàmna', njùmbwe boa kekwène.

²²Yoshua tshob ben tse bo na' ntom ngô là ndù: Bin tsho ndà kàttù mènnzwi, ngù a tume, boa njoṅ tse ben fa.

²³Tshen bonnshum nà, ba ntom tsho ndà Rahab , nsô i, tàab, màab, fèt tse boa njoṅ tse ben fa. Bo ghù njoṅ benntùn fa ntùm ndà Rahab tum, bo yab njam mbàn bon Israél.

²⁴Bo te mbwôg tusô, nton njoṅ tshu fa ts'a be ntùm bwe là, kà ntag nda' silba, gol, njoṅ tshu tùn meba fa boa tse tùne, tse bo yab ntùm tshunkàb ndà Tshùaben nà.

²⁵Yoshua kabte yôg Rahab, kàttù mènnzwi mba ze tunndà tàab boa njoṅ tse ben fa. Nzwit Rahab ke' netèt ba Israél tà nse' nkum sènni, nummb'a lo lem ba ntom tse bo tum yub bo tsha' Yériko là.

²⁶Ndùlala Yoshua kàn mfe ntshob ndù: Ndon be tu mèn mbwe Tshùaben nà, a be ze ng'é kagtùn nebèn nkut yen Yériko li là. A be ndùlala mb'a' lo' tuswe i ma' tun ba' yi, ndo' kebatnjab i nte nzendà tse yi.

²⁷Tshùaben lo ke mbe bo Yoshua, lén se nke nju'ni ntùm ngô.