Read Medumba Yoshua 8 Bible Online

Yoshua 8 - Medumba bible

Yoshua 8

¹Tshùaben tshob Yoshua ndù: Kà bwôg ke bèn mvètte! Lo nsi ndo' njoṅ ghama' ntsho fa bin à bo ko' nèn num Aï. Tshù, me fà mfen Aï bo ze ngô mum mbu mu. Me fà tusô se bo ngô i wù.

²O nsi ghù num Aï bo mfen i à mb'o na' ngù num Yériko bo mfen i là. Nda' ndù bin lo' ntsha' boa nyàm. A bwô ndù o lem benntùn njam tusô.

³Yoshua boa njoṅ ghama' ntsho fa lo nsi nko' nèn num Aï. A tsho' neta benntùn ntu ntsha' tat, ngù bo nèn tèttswe'.

⁴A tshob bo ndù: Bin bam nà! Bin lem njam tusô, là ke lem tà ngùanesà. Bin be tswe nke mbébe.

⁵Tu wul àm bo ntshu ntsho ze bag yi be là nsi zin nèn num Aï. Ndùse bo nsi tum se' num bag mba mbwe yoṅ i là, bag nsi kù.

⁶Yen ngelaṅ nà bag nsi kù, soṅte yub bo ke njoṅ yage, bag lo' yub nèn yi ngùanesà mbaṅ tusô; nummbe bo nsi tshob ndù: Tshù bo là bo tshwèt nkù mbwe be mba mbwe yoṅ i là.

⁷Yen ngelaṅ nà bin nsi tum dù' bin lo ndem nà lo' tusô, nummbe Tshùaben Nsi zin nsi fà i bin.

⁸Ndùse bin nsi lo' tusô là, bin nsi te mbwôg bwe ndaṅndaṅ mba Tshùaben tshob là. Tshù mba me tshob bin nà.

⁹Yoshua ghù bo nèn, bo lem netèt Bétél bo Ai, nze bag mbinyam. Yoshua zi à boa ntshu ntsho yen tèttswe' là.

¹⁰Yoshua lo nsi kua' mà nkebnjù, ntsha' ntshu ntsho, nèn num Aï boa njoṅ tse ghakwé mbwe ba Israél fa, ndù bo tsin tu ngô.

¹¹Njoṅ ghama' ntsho fa tse boa bo be là ko' ngebte se ngô, nte mbàn num bag Aï z'a tu là, ndù tômbo' be netèt bo.

¹²Yoshua lo' benntùn ntu ntsha' tàn, ndem yub netèt Bétél bo Ai, num bag tusô z'a be mbinyam nà.

¹³Ndùse ntshu ntsho te mbàn tu, ndem tsemo' ben mbinyam nà, Yoshua ko' yen tèttswe' là nèn tômbo'o.

¹⁴Ndùse mfen Aï yen yen nu là là, ben tse bo ke ntswe Aï là lo nsi ndende nkebnjù, nèn mbumte boa ba Israél, nde' yub ntsho. Mfen bo ngô nèn dù' ze bo na' ntshob là, nze bag tômbo'o, ke lèn ndù benntùn lem njam tusô nele' i ntsho.

¹⁵Yoshua boa ntshu ntsho ghù mba bo nebèn nà, nkù nèn nze kônkwa.

¹⁶Ndùlala ngô bu' ngoṅ, ntum ntam njam Yoshua, njoṅ yube, bo soṅte yub ntum yi tusô, nèn yi ngùanesà.

¹⁷Sàm mèn ntùm ngô Aï bo Bétél lo ke ghô ndà, kà ke tum ntam njam ba Israél. Bo faṅ ngô nge, njoṅ ba Israél.

¹⁸Ndùlala Tshùaben tshob Yoshua ndù: Sab kô s'a be bu o là ntshag num Aï, nummbe me fà i wù. Yoshua sab kô se ntshag num Aï.

¹⁹Be ndùse ze ntshu ntsho Israél z'a lem nà lo nsi, ntsho' ngwù ntùm tusô, nànte nte mbwôg bwe.

²⁰Ndùse ba ntùm ngô Aï ke mbèn njam nà, bo yen nzembwôg nke nko' tusô nèn tù, ndùlala bo bwoṅ nze nekù nèn bwe. Tshù, ba Israél tse bo ke njoṅ yub là lo kaṅ wut yub, ntù' bèn nke njoṅ ze ntshu ntsho ngô Aï.

²¹Yoshua boa njoṅ ba Israél fa tù' be yen mba ntshu ntsho z'a lem tum ndo' tusô, nzembwôg nke nko' bwe là, mbèn njam num nku mube, num nebiagte njoṅ ba ntùm ngô Aï fa.

²²Ba Israél tse bo ke ntum ntùm tusô là bumte boa ghakeban tse mo' bag ba Israél ke njoṅ yub là. Tshen ben ni la' nké', ba Israél zwite yub fa kà sàm mèn ke tum bwe nkù mba nekù.

²³Bo ghom mfen Aï ntùnntùn, ndo' i nèn yi mbwe Yoshua.

²⁴Ndùse ba Israél miagte nezwite ba ntùm ngô Aï fa, ke tse mà tshwèt, ke tse bo yoṅ yub nkum kônkwa lo là, nzwite yub kà nkum num miagte mèn nà, ghayob ngu' bèn nkam tusô, nzwite tshé' benntùn tse bo tù' bwe là.

²⁵Ba Israél zwite benntùn ntùm ngô Aï ntu ntsha' ntshob bàa gham, bandum boa bènnzwi.

²⁶Yoshua ke yab bu i z'a sab kô yi là nsi tà nkum ndùse bo zwite njoṅ benntùn fa Aï là, nummbe bo lo tam bu' mum ngô num yen nu là.

²⁷Ba Israél lo' a nda' nyàm bo ntsha' z'a be tusô là, ngù a be ndaṅndaṅ mba Tshùaben tshob Yoshua là.

²⁸Ndùlala Yoshua so mbwôg num Ai. Tà nse' nkum sènni Aï ke' a be fèt bwembwôge.

²⁹A ghù bo taṅ mfen Aï num ta' tù tà nèn nkum mfetnjù. L'a be mfetnjù ndùse lagnyam ke mbi là, a ghù bo kiag fe i num tù, ma' ntshu ngô. Bo bag mo' mà fèt ndoṅ num i; men ndoṅ nà ke' bwe tà nkum sènni.

³⁰Ndùlala Yoshua bom tômbwôg Tshùaben, Nsi ba Israél num mbat Ebal.

³¹A ghù ndaṅndaṅ mba Mosé ngafa' Tshùaben na' ntshob bon Israél là. A b'a mba bo kite ntùm ṅwa'ni ntshù' Mosé là. Bo lo' à ndoṅ mi tùn ke' kwag i là mbom i yi. Bo ton nyàm Tshùaben num sen tômbwôg là, mfà tshule'te tse nelo' nyàmte yi.

³²Yoshua tshebte ntshù' mi Mosé na' nkite mbwe bon Israél là num ndoṅ yen dù' là.

³³Njoṅ ba Israél fa, tshob ghakwé mbwe, tshob tàmànjô boa tshob ghatsho'te tsinte tù bag bag mbaṅ Koṅ, mbwe ghale'te Nsi, ben Lévi tse bo ke nket Koṅ Kàn Tshùaben nà. Ba ghùn lo be bwe ndaṅndaṅ mba ba Israél là; mo' kam benntùn be bag mbat Garizim, mo' bèn mbe bag mbat Ebal, ndaṅndaṅ mba Mosé ngafa' Tshùaben na' mbwôgmbwe ntshob là. A lo tshob ndù bo yab kàn ntù nzwit Israél.

³⁴Yen nà be tôge, Yoshua siaṅ njoṅ ntshù' fa, nsiaṅ mbotni bo ndon a be ntùm bwe là, ndaṅndaṅ mba bo kite ntùm ntshù' là.

³⁵Yoshua ke nèn num ju ze Mosé na' nkite là nsô sàm ju bwe ndùs'a ke nsiaṅ i mbwe mbumte ba Israél, bènnzwi, bônke' boa ghùn tse bo ke ntswe netèt bo là.